10 قاراشادا بالقاش-سارىشاعان تاس جولىندا ەسىرتكى تاسىمالدادى دەگەن كۇدىكپەن اسكەري قىزمەتكەر ۇستالدى. ۇستالعانى تۋرالى اقپاراتتى قۇرلىق اسكەرلەرىنىڭ ءباسپاسوز قىزمەتى راستادى, دەپ حابارلايدى Egemen.kz.
قاراعاندى وبلىسىنىڭ پوليتسيا دەپارتامەنتىنىڭ مالىمەتىنشە, 10 قاراشادا بالقاش-سارىشاعان تاس جولىندا پاترۋلدىك پوليتسيا 31 جاستاعى ازاماتتىڭ باسقارۋىنداعى Geely Coolray كولىگىن توقتاتقان. توقتاۋعا جول ەرەجەسىن بۇزۋ, اتاپ ايتقاندا مەملەكەتتىك ءنومىرسىز ءجۇرۋى سەبەپ بولعان.
«اۆتوكولىكتى تەكسەرۋ كەزىندە باگاج بولىگىندە جالپى سالماعى 12 كەلىگە جۋىق اق ءتۇستى ۇنتاق زاتى بار 18 قاپ تابىلدى. وقيعا ورنىنا جەدەل-تەرگەۋ توبى شاقىرىلىپ, تىيىم سالىنعان زات بار دەگەن كۇدىك راستالدى. اتالعان فاكتى بويىنشا قىلمىستىق ءىس قوزعالدى. جۇرگىزۋشى ۇستالىپ, ۋاقىتشا ۇستاۋ يزولياتورىنا قامالدى», دەپ حابارلادى پوليتسيا دەپارتامەنتى.
قۇرلىق اسكەرلەرىنىڭ ءباسپاسوز قىزمەتى سارىوزەك گارنيزونى اسكەري بولىمدەرىنىڭ ءبىرىنىڭ دەمالىستا جۇرگەن اسكەري قىزمەتكەرىن جەتىسۋ وبلىسى بويىنشا ۇلتتىق قاۋىپسىزدىك دەپارتامەنتىنىڭ قىزمەتكەرلەرى ەسىرتكى زاتتارىن تاسىمالداپ بارا جاتقان جەرىندە ۇستاعانىن راستادى.
«اتالعان فاكتى بويىنشا قىلمىستىق ءىس قوزعالدى, جەدەل-تەرگەۋ ءىس-شارالارى جۇرگىزىلىپ جاتىر. قۇرلىق اسكەرلەرى وسى وقيعانى جان-جاقتى جانە وبەكتيۆتى تەرگەۋ ماقساتىندا قۇقىق قورعاۋ ورگاندارىنا تولىق كومەك كورسەتەدى. زاڭناما تالاپتارىنا سايكەس تەرگەۋ مۇددەسى ءۇشىن وزگە اقپارات جاريا ەتىلمەيدى», دەپ ءتۇسىندىردى قۇرلىق اسكەرلەرىنىڭ ءباسپاسوز قىزمەتى.