الماتىدا جىل سوڭىنا دەيىن 50 مىڭ بەينەباقىلاۋ كامەراسىن بىرىڭعاي بەينەباقىلاۋ جۇيەسىنە (ببج) قوسۋ جوسپارعا الىنعان, دەپ حابارلايدى Egemen.kz.
قالا اكىمدىگىنىڭ ءباسپاسوز قىزمەتىنىڭ ءمالىم ەتۋىنشە قازىرگى ۋاقىتتا جۇيەگە 209 جەكە جانە 613 مەملەكەتتىك نىساندارداعى 45 مىڭ كامەرا قوسىلعان, ال 2025 جىلعا قاراي ولاردىڭ سانى 70 مىڭعا جەتەدى. جولداعى قاۋىپسىزدىكتى ارتتىرۋ ءۇشىن «سەرگەك» كەشەنىنىڭ 300 كامەراسى ورناتىلىپ, قالاداعى وسىنداي كەشەندەردىڭ جالپى سانى 1 مىڭ 641-گە جەتكەن. سونىمەن قاتار, «كەشەندى قاۋىپسىزدىك جۇيەسى» جوباسى شەڭبەرىندە جىل سوڭىنا دەيىن 71 دەنساۋلىق ساقتاۋ نىسانىندا دا قاۋىپسىزدىك شارالارى جۇزەگە اسىرىلماق.