پاۆلودار قالاسىنىڭ № 2 سوتى تۇرعىنجايعا زاڭسىز باسىپ كىرۋ جانە جابىرلەنۋشىنىڭ دارمەنسىز كۇيىن پايدالانىپ زورلىق كورسەتۋ فاكتىسى بويىنشا ايىپتالعان سوتتالۋشىعا قاتىستى قىلمىستىق ءىستى قارادى. سوت وتىرىسى جابىق ءوتتى, زاڭ بويىنشا ءىستىڭ ءمان-جايىن جاريا ەتۋگە تىيىم سالىندى, دەپ حابارلايدى Egemen.kz وبلىستىق سوتتىڭ ءباسپاسوز قىزمەتىنە سىلتەمە جاساپ.
پروكۋرور ايىپتالۋشى ز.-عا التى جىل باس بوستاندىعىنان ايىرۋ جازاسىن سۇرادى. الايدا جابىرلەنۋشىنىڭ وكىلى مەن ونىڭ ادۆوكاتى مورالدىق زياننىڭ وتەلگەنىن ەسكەرە وتىرىپ, ز.-مەن تاتۋلاسقاندارىن جانە وعان ەشقانداي تالاپتارى جوق ەكەنىن جەتكىزدى. ولار سوتتان باس بوستاندىعىنان ايىرۋ جازاسىن قولدانباۋدى سۇرادى.
ال سوتتالۋشى كىناسىن مويىنداپ, ارەكەتىنە وكىنەتىنىن ايتىپ, شارتتى تۇردە باس بوستاندىعىنان ايىرۋ جازاسىن تاعايىنداۋدى ءوتىندى.
«سوتتالۋشىنىڭ قىلمىستى تۇنگى ۋاقىتتا ماساڭ كۇيدە جانە جابىرلەنۋشىنىڭ ەركىنەن تىس ۇيىنە زاڭسىز باسىپ كىرىپ جاساعانى, سونداي-اق جابىرلەنۋشىنىڭ مۇگەدەك ەكەنىن پايدالانىپ, دارمەنسىز كۇيدە بولعانى ەسكەرىلدى. وسى فاكتورلاردى ەسكەرە وتىرىپ, سوت ز.-عا بەس جىل مەرزىمگە باس بوستاندىعىنان ايىرۋ جازاسىن تاعايىندادى. جازا قىلمىستىق-اتقارۋ جۇيەسىنىڭ ورتاشا قاۋىپسىزدىك مەكەمەسىندە وتەلەدى», دەلىنگەن حابارلامادا.
ۇكىم زاڭدى كۇشىنە ەنگەن جوق.