ەلىمىزدە جەلىلىك «اباي مەكتەپتەرىنىڭ» وقۋشىلارى اراسىندا V رەسپۋبليكالىق ء«ىشى - التىن, سىرتى - كۇمىس ءسوز جاقسىسى» شەشەندىك ونەر بايقاۋى ءوز مارەسىنە جەتتى. وعان ءار وڭىردەگى اباي مەكتەپتەرىنەن 30-عا جۋىق ءبىلىم الۋشى قاتىسىپ, ويدىڭ ۇشقىرلىعى, ءتىلدىڭ شەشەندىگى بويىنشا ءوزارا باسەكەگە ءتۇستى. بيىل رەسپۋبليكالىق بايقاۋدىڭ قورىتىندىسى اقمولا وبلىسىندا شىعارىلدى, دەپ حابارلايدى Egemen.kz.
قاتىسۋشىلار بايقاۋ تاقىرىبىن جەرەبە تارتىپ تاڭدادى جانە جۇپتاسىپ سايىستى. بايقاۋ تاقىرىپتارى «ۇلتتىق قۇندىلىق», «الاششىل جاس», «ىسكەرلىك – ىسمەرلىك», «ابايدىڭ ءتالىم مەكتەبى» جانە ت.ب جەتى بولىمگە نەگىزدەلگەن تاپسىرمالارعا بولىنگەن.
«وسى ءىس-شارانىڭ ماقساتى - وقۋشىلارعا ءسوز ونەرىنىڭ ەرەكشەلىگى مەن جۇيەلى ءسوز ساپتاۋ شارتتارىن كورسەتە وتىرىپ, ساۋاتتى ءارى جاتىق سويلەۋ داعدىسىن, مادەنيەتىن قالىپتاستىرۋ, ءسوز ونەرىمىزدىڭ تاريحي-مادەني جانە ەتنومادەني بولمىسىن تانىتۋ, شەشەندىك ونەردى جاڭاشا ۇلگىدە جانداندىرىپ دامىتۋ», دەيدى اباي اتىنداعى رەسپۋبليكالىق مامانداندىرىلعان دارىندى بالالارعا مەكتەپ-ينتەرناتىنىڭ وقىتۋشىسى جارقىن سالەن ۇلى.
بايقاۋ قورىتىندىسى بويىنشا باس جۇلدەنى الماتى ق. رممي وقۋشىلارى امينا سماعۇلقىزى مەن ايسىمبات تاقىلبەك جەڭىپ الدى. 1 ورىندى ۇلىتاۋ وبلىسىنان كەلگەن ءىنجۋ تىلەۋلى مەن راۋان جاقسىلىق جانە باتىس قازاقستاننان كەلگەن ايىم حاميدۋللينا مەن ايانا مالىك يەلەندى. الماتى وبلىسىنىڭ نامىسىن قورعاعان اقەركە نۇرجانقىزى مەن نۇرسۇلتان ورىنباسار جانە استانا قالاسىنان اياجان ازاماتقىزى مەن عابيت رۋستەموۆ 2 ورىنعا يە بولدى. قاراعاندى وبلىسىنىڭ وقۋشىلارى جىبەك قالياقپار مەن ايالا القازى, اقمولالىق اجار جانۇزاق پەن فاريزا شامەنوۆا 3 ورىندى ءبولىستى.
سونىمەن قاتار ونەر بايقاۋى اياسىندا جەلىلىك «اباي مەكتەپتەرى» پەداگوگتەرىنە ارنالعان «قازاق ءتىلى مەن ادەبيەتى, شەشەندىك ونەردى دامىتۋداعى وزەكتى ماسەلەلەر مەن جەتىستىكتەر» تاقىرىبىندا رەسپۋبليكالىق سەمينار ءوتتى.