ءال-فارابي اتىنداعى قازاق ۇلتتىق ۋنيۆەرسيتەتىنىڭ اقپاراتتىق تەحنولوگيالار فاكۋلتەتىندە «قازاقستان حالىق بانكى» اق قولداۋىمەن «Halyk Academy» زەرتحاناسى اشىلدى.
جاڭا بۋىن ماماندارىن دايارلاۋعا ارنالعان زەرتحانا ستۋدەنتتەرگە بانك جانە قارجى سالاسىندا تەوريالىق ءبىلىم مەن تاجىريبە الۋعا مۇمكىندىك بەرەتىن كاسىبي الاڭعا اينالماق ءارى ولار جاڭا تەحنولوگيالاردىڭ جەتىستىكتەرىن يگەرەتىن بولادى.
سالتاناتتى شاراعا حالىق بانكىنىڭ رەسمي وكىلدەرى, قازۇۋ عالىمدارى مەن ستۋدەنتتەرى قاتىستى.
ءال-فارابي اتىنداعى قازۇۋ ءبىرىنشى پرورەكتورى ەركىن دۇيسەنوۆ ارىپتەستىك نەگىزدە اشىلعان زەرتحانا مۇمكىنشىلىكتەرى جايىندا ايتىپ ءوتتى.
«بۇل ءوز كەزەگىندە ستۋدەنت جاستاردىڭ ۋنيۆەرسيتەت قابىرعاسىندا الىپ جاتقان تەوريالىق بىلىمدەرىن پراكتيكامەن ۇشتاستىرۋعا بەرىلگەن بىرەگەي مۇمكىندىك. زەرتحانادا ستۋدەنت جاستار قارجى سالاسىندا ءبىلىم مەن ءارتۇرلى داعدىلاردى مەڭگەرىپ, بولاشاقتا تابىستى جۇمىس ىستەي الادى. سوندىقتان حالىق بانكىمەن ارىپتەستىگىمىز ارى قاراي نىعايا بەرەدى», دەدى پرورەكتور.
ءوز كەزەگىندە «قازاقستان حالىق بانكى» اق باسقارما توراعاسىنىڭ ورىنباسارى داۋرەن سارتاەۆ:
«قازاقستاننىڭ جەتەكشى جوعارى وقۋ ورىندارىنىڭ ءبىرى – ءال-فارابي اتىنداعى قازۇۋ-دا ستۋدەنتتەرگە ارنالعان زەرتحانامىزدىڭ اشىلۋى ءبىز ءۇشىن ۇلكەن مارتەبە. بۇگىندە اقپاراتتىق تەحنولوگيالار فاكۋلتەتىنىڭ تۇلەكتەرى ءارتۇرلى سالادا قىزمەت ەتىپ, ءوز بىلىكتىلىكتەرىن كورسەتىپ جاتىر. وعان دالەل – ءبىزدىڭ حالىق بانكتىڭ HR ديرەكتورى ينديرا اشيروۆا وسى فاكۋلتەتتىڭ تۇلەگى, ءوز سالاسىنىڭ كاسىبي مامانى. سوندىقتان دا فاكۋلتەت ماتەماتيكا, قارجى, IT سالاسىنىڭ مىقتى ىرگەتاسى قالانعان ۇلكەن مەكتەپ بولىپ قالا بەرەدى», دەپ اتاپ ءوتتى.
بۇگىندە «قازاقستان حالىق بانكى» اق ءال-فارابي اتىنداعى قازۇۋ-دىڭ نەگىزگى سەرىكتەسى عانا ەمەس, سونىمەن قاتار باكالاۆريات, ماگيستراتۋرا جانە دوكتورانتۋرا دەڭگەيلەرىندە «دەرەكتەر تۋرالى عىلىم/Data Science» ءبىلىم بەرۋ باعدارلاماسىنىڭ بىرلەسكەن قۇراستىرۋشىسى جانە جۇمىس بەرۋشى بولىپ تابىلادى. بۇل ءادىس وقۋ باعدارلاماسى مەن كاسىبي ستاندارتتاردىڭ ۇيلەسىمدىلىگىن قامتاماسىز ەتىپ, تۇلەكتەرگە مانساپتىق قادامدارعا جول اشىپ, دەرەكتەر بازاسىمەن جۇمىس ىستەۋگە مۇمكىندىك بەرەدى.
«Halyk Academy» باعدارلاماسى اياسىندا ستۋدەنتتەرگە بانك ساراپشىلارىنىڭ دارىستەرى, اشىق ەسىك كۇندەرى, سونداي-اق يندۋستريانىڭ زاماناۋي تالاپتارىن ەسكەرە وتىرىپ ازىرلەنگەن بانك ماماندىقتارى بويىنشا كۋرستار وتەتىن بولادى. سونىمەن قاتار اكادەميا اياسىندا عىلىمي زەرتتەۋلەر مەن تەحنولوگيالىق ازىرلەمەلەردى (R&D) دامىتۋ جوسپارلانىپ جاتىر. بۇل ستۋدەنتتەر مەن وقىتۋشىلارعا قارجى سالاسىنداعى يننوۆاتسيالاردىڭ دامۋىنا ىقپال ەتەتىن وزەكتى جوبالارمەن جۇمىس ىستەۋگە مۇمكىندىك بەرەدى.
الماتى