قاسىم-جومارت توقاەۆ شەتەلدىك ينۆەستورلار كەڭەسىنىڭ 36-شى پلەنارلىق وتىرىسىنا قاتىسۋ ءۇشىن قازاقستانعا كەلگەن ەۋروپالىق قايتا قۇرۋ جانە دامۋ بانكىنىڭ پرەزيدەنتى وديل رەنو-باسسومەن كەزدەسۋ وتكىزدى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
اڭگىمەلەسۋ بارىسىندا تۇرعىن ءۇي-كوممۋنالدىق سەكتورى, شاعىن جانە ورتا بيزنەس, قارجى, ەنەرگەتيكا, مەديتسينا, اۋىل شارۋاشىلىعى, كولىك ينفراقۇرىلىمى جانە اقپاراتتىق تەحنولوگيا سياقتى ەكونوميكانىڭ ءتۇرلى سالالارىندا بىرلەسكەن ينۆەستيتسيالىق جوبالاردى جۇزەگە اسىرۋ پەرسپەكتيۆاسى تالقىلاندى.
مەملەكەت باسشىسى ەۋروپالىق قايتا قۇرۋ جانە دامۋ بانكىمەن ىنتىماقتاستىقتىڭ ستراتەگيالىق سيپاتىن, سونداي-اق قارجى ينستيتۋتىنىڭ قازاقستان ەكونوميكاسىن وركەندەتۋگە قوسقان ۇلەسىن جوعارى باعالادى.
ەقدب پرەزيدەنتى ەلىمىزدىڭ ورنىقتى دامۋىنا, ينۆەستيتسيالىق احۋالىنىڭ جاقسارۋىنا جانە ەكونوميكالىق جاڭعىرۋىنا اسەر ەتەتىن ءوزارا ىقپالداستىقتىڭ الەۋەتتى باعىتتارىنا قاتىستى جوسپارىمەن ءبولىستى. وديل رەنو-باسسو بانك قازاقستاننىڭ ينۆەستيتسيالىق جوبالارىن مۇقيات زەردەلەيتىنىن جەتكىزىپ, ينفراقۇرىلىمدىق دامۋدى الداعى ۋاقىتتا دا قولداۋعا نيەتتى ەكەنىن مالىمدەدى. ەقدب تاياۋ جىلدارى «جاسىل ەكونوميكا» تالاپتارىن ورىنداۋ اياسىندا ەلىمىزگە 2 ميلليارد ەۋرو قۇيۋدى جوسپارلاپ وتىر. بيىل ەۋروپالىق قايتا قۇرۋ جانە دامۋ بانكى قازاقستانداعى 22 جوبانى جۇزەگە اسىرۋعا 650 ميلليون دوللار بولەدى.
ەقدب پرەزيدەنتى «سامۇرىق-قازىنا» اكتسيونەرلىك قوعامىنىڭ ساتىپ الۋ ۇدەرىسىنە وڭ باعا بەردى. ونىڭ ايتۋىنشا, كرەديتور-كومپانيالاردىڭ قور ەرەجەسىنە سايكەس جۇمىس ىستەۋى اتالعان ساتىپ الۋ ۇدەرىسىنىڭ اشىقتىعىنا سەنىم جوعارى ەكەنىن كورسەتەدى.
قاسىم-جومارت توقاەۆ پەن وديل رەنو-باسسو جاھاندىق ەكونوميكانىڭ دامۋىنا قاتىستى وزەكتى ماسەلەلەر جونىندە پىكىر الماستى.