30 قازاندا الماتى قالاسىندا اۆتوكولىكتەرگە ارنالعان مۋلتيمەديالىق جۇيەلەر وندىرۋمەن اينالىساتىن Kazakhstan Mobility Engineering زاۋىتىنىڭ رەسمي اشىلۋ ءراسىمى ءوتتى. بۇل زاۋىت «استانا موتورس» كومپانياسىنىڭ قۇرىلىمىنا كىرەدى. ءىس-شاراعا قر ونەركاسىپ جانە قۇرىلىس ءمينيسترى قانات شارلاپاەۆ, Motrex كومپانياسىنىڭ باس ديرەكتورى كيم دجۋن سون, «استانا موتورس» نەگىزىن قالاۋشى نۇرلان سماعۇلوۆ جانە باس ديرەكتور بەكنۇر نەسىپباەۆ قاتىستى, دەپ حابارلايدى Egemen.kz.
2023 جىلدىڭ ءساۋىر ايىندا «استانا موتورس» كومپانياسى Motrex Co Ltd. كومپانياسىمەن مەموراندۋمعا قول قويىپ, وڭتۇستىك كورەيا تەحنولوگياسى نەگىزىندە مۋلتيمەديالىق قۇرىلعىلاردى قازاقستاندا ءوندىرۋ قۇقىعىنا يە بولدى. زاۋىتتىڭ تەحنيكالىق ىسكە قوسىلۋى 2024 جىلدىڭ قىركۇيەك ايىندا ءوتتى, جانە العاشقى جابدىقتار پارتياسى Hyundai Trans Kazakhstan زاۋىتىنا Tucson جانە Elantra مودەلدەرىنە ورناتۋ ءۇشىن جەتكىزىلدى.
اشىلۋ سالتاناتىنا قاتىسقان مينيستر قانات شارلاپاەۆ زاۋىتتىڭ ىسكە قوسىلۋى قازاقستان مەن وڭتۇستىك كورەيا اراسىنداعى ىنتىماقتاستىققا ماڭىزدى ۇلەس قوساتىنىن جانە ەلدىڭ اۆتوموبيل سالاسىنىڭ دامۋىنا اسەر ەتۋى مۇمكىن ەكەنىن اتاپ ءوتتى. ءوز سوزىندە ول جوبانىڭ قازاقستاننىڭ ونەركاسىپتىك وسۋىنە ماڭىزدىلىعىن اتاپ ءوتىپ, مەملەكەت ينۆەستيتسيا سالۋشى جانە ءوندىرىس سالۋشى كومپانيالاردى قولدايتىنىن, سونداي-اق كاسىبي كادرلار دايارلاۋ مەن ەكونوميكانى دامىتۋعا ۇلەس قوساتىنىن قوستى. ونىڭ ايتۋىنشا, نەگىزگى ماقسات - وتاندىق رەسۋرستار مەن قۇرامداس بولشەكتەردى بارىنشا پايدالانىپ, جوعارى دەڭگەيدە لوكاليزاتسياسى بار ءوندىرىستى قۇرۋ.
كيم دجۋن سون دا ىنتىماقتاستىقتىڭ بولاشاعىنا سەنىم ءبىلدىرىپ, زاۋىتتىڭ سالا ءۇشىن ماڭىزدىلىعىن اتاپ ءوتتى. سونىمەن قاتار وسى كۇنى «استانا موتورس» كومپانياسى Sanico Electronics كومپانياسىمەن مەموراندۋمعا قول قويدى, وعان سايكەس قازاقستاندىق تاراپ مۋلتيمەديالىق جۇيەلەرگە ارنالعان انالىق پلاتالار مەن كورپۋستاردى SMT جانە PRESS تەحنولوگيالارىن قولدانا وتىرىپ ءوندىرۋ قۇقىعىنا يە بولادى. بۇل كەلىسىم اۆتوكومپونەنتتەر ءوندىرىسىن ودان ءارى لوكاليزاتسيالاۋعا جانە قازاقستاندىق مامانداردىڭ بىلىكتىلىگىن ارتتىرۋعا ىقپال ەتەدى.
«استانا موتورس» كومپانياسىنىڭ باس ديرەكتورى بەكنۇر نەسىپباەۆ كورەيلىك سەرىكتەستەرمەن ىنتىماقتاستىق تەك كومپانيا ءۇشىن عانا ەمەس, قازاقستاننىڭ بۇكىل اۆتوموبيل سالاسى ءۇشىن ماڭىزدى قادام ەكەنىن اتاپ ءوتتى. ول ونەركاسىپ مينيسترلىگى مەن مينيستر قانات شارلاپاەۆقا سالانى قولداعانى ءۇشىن العىس ايتىپ, بۇل ىنتىماقتاستىقتىڭ تەك باسى ەكەنىنە سەنىم ءبىلدىردى. سونداي-اق نەسىپباەۆ قازاقستان پرەزيدەنتى قاسىم-جومارت توقاەۆتىڭ جاقىندا جاساعان مالىمدەمەسىندە اۆتوموبيل ونەركاسىبىنىڭ ءوسۋىن لوكاليزاتسيانى تەرەڭدەتۋدى قاجەت ەتەتىن نەگىزگى باعىت رەتىندە اتاعانىن ەسكە سالدى.
بارلىق تاراپ اۆتوكومپونەنتتەر ءوندىرۋ زاۋىتى قازاقستان ءۇشىن ستراتەگيالىق ماڭىزعا يە دەگەن پىكىرگە توقتادى, ويتكەنى ونىڭ قىزمەتى تەك وتاندىق اۆتوونەركاسىپ پەن لوكاليزاتسيانى دامىتۋعا عانا ەمەس, شاعىن جانە ورتا بيزنەستى قولداۋعا, سونداي-اق ماشينا جاساۋ سالاسىندا بىلىكتى كادرلار جۇيەسىن قالىپتاستىرۋعا دا ىقپال ەتەدى.