قر مادەنيەت جانە اقپارات ءمينيسترى ايدا بالاەۆا مادەنيەت سالاسىنداعى بەدەلدى حالىقارالىق جاستار بايقاۋلارىنىڭ جەڭىمپازدارىن قۇتتىقتادى. ءىس-شارا «استانا بالەت» تەاترىندا ءوتتى, دەپ حابارلايدى Egemen.kz.
مينيستر جەڭىمپازداردى قۇتتىقتاي وتىرىپ, ولاردىڭ جەتىستىككە جەتۋىنە اتا-انالارى مەن ۇستازدارىنىڭ ۇلەسى زور ەكەنىن اتاپ ءوتتى.
«سىزدەرمەن جۇزدەسكەنىمە وتە قۋانىشتىمىن. بۇل كەزدەسۋ رەسپۋبليكا كۇنى قارساڭىندا ءوتۋى ءتيىس ەدى. بىراق مەرەكەگە ارنالعان اۋقىمدى ءىس-شارالارعا بايلانىستى بۇگىن عانا جولىعىپ وتىرمىز. ۇلتتىق مەرەكەمىزگە وراي, مەملەكەت باسشىسى جانە ونىڭ اتىنان ءبىز ءتۇرلى سالادا ەڭبەك سىڭىرگەن قىزمەتكەرلەردى, ءتۇرلى ماماندىق يەلەرىن قۇتتىقتادىق. ولاردىڭ قاتارىندا ۇستازدار, دارىگەرلەر, قۇتقارۋشىلار, مادەنيەت قىزمەتكەرلەرى بار», دەدى ايدا بالاەۆا.
ۆەدومستۆو باسشىسى جاس دارىنداردىڭ جەتىستىكتەرى ولاردىڭ ۇستازدارىنىڭ ۇزاق جىلعى تاباندى ەڭبەگىنىڭ ناتيجەسى ەكەنىن تىلگە تيەك ەتتى.
«سىزدەردىڭ جەتىستىكتەرىڭىز – وزدەرىڭىزدىڭ عانا ەمەس, سونداي-اق ۇستازدارىڭىز بەن اتا-انالارىڭىزدىڭ دا قاجىرلى ەڭبەگىنىڭ ناتيجەسى. ەڭبەك ادامدارى – مەملەكەتتىڭ ەڭ باستى قۇندىلىعى. سوندىقتان بۇگىندە ولاردىڭ ەڭبەگى جوعارى دەڭگەيدە مويىندالىپ, قۇرمەتتەلىپ وتىر. سىزدەرگە بالالارىڭىزدى تاربيەلەۋگە جۇمساعان كۇش-جىگەرلەرىڭىز ءۇشىن العىس ايتامىن. بۇگىندە قازاقستاندا ءتۇرلى سالادا, ونىڭ ىشىندە مادەنيەت پەن ونەر سالاسىندا جاستاردى قولداۋعا جانە تالانتىن اشۋعا باعىتتالعان كوپتەگەن باستامالار مەن جوبالار ىسكە اسۋدا. مەملەكەت باسشىسى ەل بولاشاعى جاستاردىڭ قولىندا ەكەنىن ۇنەمى ايتىپ كەلەدى. سىزدەر ءوز قاتارلاستارىڭىز بەن كەيىنگى ۇرپاققا ۇلگى بولاسىزدار. سىزدەردى الدا ۇلكەن جەڭىستەر كۇتىپ تۇرعانىنا سەنىمدىمىن», دەدى مينيستر.
كەزدەسۋ بارىسىندا قاتىسۋشىلار جاس دارىنداردى قولداۋعا جانە ولاردىڭ شىعارماشىلىق الەۋەتىن دامىتۋعا باعىتتالعان مەملەكەتتىك جوبالاردى تالقىلادى.
كەزدەسۋ سوڭىندا ايدا بالاەۆا بايقاۋ جەڭىمپازدارى مەن ولاردىڭ اتا-انالارىنا جانە ۇستازدارىنا حالىقارالىق ارەناداعى جەتىستىكتەرى ءۇشىن العىس حاتتار مەن ەستەلىك سىيلىقتار تابىستادى.