تۇركىستان وبلىسىنىڭ پروكۋراتۋراسى مال شارۋاشىلىعىن دامىتۋعا سۋبسيديا رەتىندە بولىنگەن 200 ملن تەڭگەدەن استام قارجىنى جىمقىرۋ سحەماسىن انىقتادى, دەپ حابارلايدى Egemen.kz ۆەدومستۆونىڭ ءباسپاسوز قىزمەتىنە سىلتەمە جاساپ.
ساۋران اۋدانىنىڭ تۇرعىنى «و» دەگەن ازامات 20 تۇلعانىڭ ەلەكتروندى تسيفرلىق قولتاڭباسىن پايدالانىپ جالعان مالىمەتتەردى كورسەتىپ, ءۇش جىل ىشىندە يەلىكتەرىندە شىن مانىندە جوق ءىرى قارا مالدارعا مەملەكەتتەن سۋبسيديا (203 ملن تەڭگە) العان.
«اتالعان ازاماتتىڭ زاڭسىز ءىس-ارەكەتىنىڭ ناتيجەسىندە مەملەكەتكە ەلەۋلى زالال كەلتىرىلگەن. وبلىس پروكۋراتۋراسى قاراجاتتى جىمقىرۋ فاكتىسى بويىنشا قۇجاتتاردى سدتبت-نە تىركەپ (قىلمىستىق كودەكستىڭ 189-بابى 4–تارماعى «سەنiپ تاپسىرىلعان بوتەن مۇلiكتi يەمدەنiپ الۋ نەمەسە تالان-تاراجعا سالۋ») سوتقا دەيىنگى تەرگەپ-تەكسەرۋ ارنايى پروكۋرورلارعا (وبلىس پروكۋراتۋراسىنىڭ قىلمىستىق قۋدالاۋ باسقارماسى) جۇكتەلگەن», دەلىنگەن وبلىستىق پروكۋراتۋرانىڭ حابارلاماسىندا.
كۇدىكتىنىڭ 2 اي مەرزىمگە قاماۋعا الىنعانى حابارلاندى.