سايوتەستەگى جاڭا مادەنيەت ءۇيى

سايوتەس اۋىلدىق كلۋبى باس­تاۋىن 1965 جىلى تەمىرجول عيماراتىنان اشىلعان قى­زىل بۇرىشتان الادى, اتالعان قىزىل بۇرىشتا كينوزال جۇمىس ىستەدى. 1983 جىلى قاڭتار ايىندا ارنايى شتات بەرىلىپ, اۋداندىق مادەنيەت ءۇيى جانىنان ماتەريالدىق-تەحنيكالىق بازاسى جيناقتالىپ, اۋىل كلۋبى اشىلدى. الپىس جىلعا تاياۋ ۋاقىتتان بەرى باسپاناسى بولماعان مادەنيەت ۇجىمى بيىل سۋ جاڭا عيماراتقا قول جەتكىزىپ, تولايىم قۋانىشقا كەنەلدى.

قۇنى 691 ميلليون تەڭگەگە كەلىسىم-شارت جاساقتالعان سايوتەس اۋىلدىق مادەنيەت ءۇيىنىڭ قۇرىلىسىن مەردىگەر «اس قۇرىلىس» جشس جۇرگىزدى. «اۋىل – ەل بەسىگى» باعدارلاماسى اياسىندا سا­لىنعان جاڭا عيماراتتىڭ 200 ورىندىق كونتسەرت زالى جانە ۇيىرمەلەرگە ار­نالعان بىرنەشە زالى بار. ادىسكەر, انسامبل, حور, ۆوكال, كورەرمەن زالى, ساحنا, گريمەر, كوستيۋمەر, بي, دومبىرا, قولونەر ۇيىرمەلەرى, جارىق-دىبىس ستۋ­ديالارى مەن ماماندارعا ارنالعان كابينەتتەر, كونتسەرت جانە ۇيىرمە زالدارى قازىرگى زاماناۋي تالاپقا ساي جابدىقتالعان. ماڭعىستاۋ اۋداندىق اكىم­دىگى ماماندارىنىڭ ايتۋىنشا, عي­ماراتتا اۋىل كىتاپحاناسى دا ورنالاسقان.

«كلۋبتا 1983–2010 جىلدار ارالى­عىندا ءان, دومبىرا ۇيىرمەلەرىمەن 10 كوركەمونەرپاز جۇمىس ىستەگەن بولسا, قازىرگى تاڭدا قۇرامى 12 ادامعا تولىپ, 131 كوركەمونەرپازى بار 6 قۇ­رى­لىم حالىققا مادەني قىزمەت كورسەتىپ وتىر. سايوتەس اۋىلدىق كلۋبى ۇجى­مىنا جىل سايىن كاسىبي ماماندار قوسىلىپ, حالىقتىڭ مادەني دەمالىسىن ۇيىمداستىرىپ كەلەدى. ۇزاق جىلعى تاجىريبەسى مەن كاسىبي بىلىكتىلىگىنىڭ ناتيجەسىندە اۋىلدىق كلۋب جانىنداعى «اق­مارجان» انالار انسامبلىنە, سايوتەس دومبىراشىلار ءانسامبلى مەن «نازقوڭىر» بي انسامبلىنە مادەنيەت جانە اقپارات ءمينيسترىنىڭ 2023 جىلعى ماۋسىم ايىنداعى بۇيرىعىمەن «حالىقتىق», «ۇلگىلى» اتاقتارى بەرىلدى. 2015 جىلدان باستاپ كلۋبتىڭ ساپا قۇرامى ادىسكەر شتاتىمەن تولىقتى», دەيدى اۋىلدىق كلۋب مەڭگەرۋشىسى كۇلاش جايىم.

جاڭا مادەني نىسان اۋىل اجارىن ارتتىرىپ, ونەرىن ورىستەتە تۇسەرى انىق.

ماڭعىستاۋ وبلىسى