بەيجىڭدە قىتاي جانە ورتالىق ازيا ەلدەرى: قازاقستان, وزبەكستان, تۇرىكمەنستان, قىرعىزستان جانە تاجىكستاننىڭ مەملەكەتتىك باسقارۋ اكادەميالارى باسشىلارى قاتىسۋىمەن سەمينار ءوتتى. وندا جينالعاندار مەملەكەتتىك باسقارۋ سالاسىنداعى قىتاي تاجىريبەسىمەن, ونىڭ ىشىندە يننوۆاتسيالىق جوبالارمەن تانىسىپ, بىرلەسكەن باستامالار كەلەشەگىن تالقىلادى, دەپ حابارلايدى Egemen.kz استانا مەملەكەتتىك قىزمەت حابىنىڭ ءباسپاسوز قىزمەتىنە سىلتەمە جاساپ.
ساپاردىڭ العاشقى كۇنى استانا مەملەكەتتىك قىزمەت حابى باسقارۋشى كوميتەت توراعاسى اليحان بايمەنوۆتىڭ قىتاي ۇلتتىق باسقارۋ اكادەمياسى ءبىرىنشى ۆيتسە-پرەزيدەنتى لي ي مىرزامەن رەسمي كەزدەسۋى ءوتتى.
لي ي بىلتىر قۇرىلعان مەملەكەتتىك باسقارۋ اكادەميالارى جەلىسى تاجىريبە الماسۋ جانە قاتىسۋشىلاردىڭ الەۋەتىن ارتتىرۋدىڭ ماڭىزى جوعارى ەكەنىن ايتتى. سونداي-اق مەملەكەتتىك باسقارۋ مەن مەملەكەتتىك قىزمەت سالاسىنداعى مويىندالعان تۇعىرناما رەتىندە استانا مەملەكەتتىك قىزمەت حابىنىڭ وسى قاۋىمداستىقتاعى ەرەكشە ءرولىن اتاپ ءوتتى.
اليحان بايمەنوۆ ءوز كەزەگىندە اكادەميالار جەلىسى «ۇدايى تاجىريبە مەن ءبىلىم الماساتىن جاقسى ينستيتۋتسيونالدىق نەگىز» ەكەندىگىن ايتا وتىرىپ, بىلتىرعى باستامالاردىڭ بەلسەندى تۇردە ىسكە اسىرىلىپ جاتقانىن جەتكىزدى. بيىل قازاقستانعا اتقارۋشى ۆيتسە-پرەزيدەنت سي چۋنتاو باستاعان قىتاي ۇلتتىق باسقارۋ اكادەمياسى دەلەگاتسياسى, سونداي-اق گانسۋ پروۆينتسيالارى مەن شىڭجاڭ وندىرىستىك-قۇرىلىس كورپۋسى مەملەكەتتىك باسقارۋ اكادەميالارى جەتەكشىلىگى مەن پروفەسسورلارى كەلگەن.
ەكىنشى كۇنى «باسقارۋشىلىق الەۋەتتى مودەرنيزاتسيالاۋ بويىنشا بىرلەسكەن جۇمىس» اتتى سەمينار ءوتىپ, وندا قىتاي جانە ورتالىق ازيانىڭ بارلىق ەلدەرى مەملەكەتتىك باسقارۋ اكادەميالارى باسشىلارى, سونداي-اق استانا مەملەكەتتىك قىزمەت حابى وكىلدەرى ءوز ويلارىن ورتاعا سالدى.
سونىمەن قاتار ساپار باعدارلاماسى اياسىندا دەلەگاتسيالار حانچجوۋ قالاسى مەملەكەتتىك باسقارۋ اكادەمياسى, «حانچجوۋ قالالىق ميى» باسقارۋ پلاتفورماسى, سونداي-اق قحر-نىڭ ەكى ءىرى تسيفرلىق كومپانياسى قىزمەتىمەن تانىستى.
iFLYTEK كومپانياسى (بەيجىڭ) سينحروندى اۋدارما, ءبىلىم بەرۋ, مەديتسينا سالاسىنداعى جاساندى ينتەللەكت قولدانۋ جوبالارىن قاتىسۋشىلار نازارىنا ۇسىندى.
«AliBaba» كومپانياسى (حانچجوۋ) 25 جىلداعى ەلەكتروندى كوممەرتسيادان باستاپ مەديتسينا, تۋريزم, ءبىلىم بەرۋگە دەيىنگى جانە باسقا دا سالالارداعى جەتىستىكتەرىمەن تانىستىردى.
چجەتسزيان پروۆينتسياسىنداعى تسزينشان جانە سياوگۋچەن اۋىلدارى جەرگىلىكتى ءوزىن-ءوزى باسقارۋ مەن اۋىلداردى قايتا جاڭعىرتۋ بويىنشا وزىق مىسالدارمەن ءبولىستى.
ەسكە سالا كەتەيىك, 2023 جىلى بەيجىڭدە قىتاي-ورتالىق ازيا مەملەكەتتىك باسقارۋ اكادەميالار جەلىسىن قۇرۋ تۋرالى كەلىسىمگە قول قويىلعان. وعان 6 مەملەكەتتىڭ - قىتاي, قازاقستان, قىرعىزستان, وزبەكستان, تاجىكستان جانە تۇرىكمەنستان مەملەكەتتىك باسقارۋ اكادەميالارى, سونداي-اق استانا مەملەكەتتىك قىزمەت حابى كىرگەن. جەلىنىڭ ماقساتى - كادرلاردى دايارلاۋ مەن قايتا دايارلاۋدى قوسا العاندا, مەملەكەتتىك باسقارۋدى ترانسفورماتسيالاۋ سالاسىندا تاجىريبە مەن ءبىلىم الماسۋ.