بۇل تۋرالى ءماجىلىس دەپۋتاتى اسحات ايماعامبەتوۆ تەلەگرام پاراقشاسىندا جازدى, دەپ حابارلايدى Egemen.kz.
ونىڭ ايتۋىنشا, ونكولوگيالىق ناۋقاستاردى ەمدەۋدى قارجىلاندىرۋ ءۇشىن قوسىمشا قاراجات بولىنگەن.
«بيۋدجەت جوباسىندا ونكولوگيانى ەمدەۋگە بولىنەتىن قارجىنى 20 ميلليارد تەڭگەگە, ال ونكوگەماتولوگيانى 5 ميلليارد تەڭگەگە قىسقارتۋ تۋرالى ۇسىنىس بولدى. الايدا, ءبىز بۇل قىسقارتۋعا قاتاڭ تۇردە قارسىلىق ءبىلدىرىپ, قوسىمشا قاراجات ءبولۋ تۋرالى تۇزەتۋ ەنگىزدىك. دەنساۋلىق ساقتاۋ مينيسترلىگىمەن بىرلەسكەن جەمىستى جۇمىسىمىزدىڭ ارقاسىندا ونكولوگيالىق ناۋقاستاردى ەمدەۋدى قارجىلاندىرۋ ءۇشىن قوسىمشا 25 ميلليارد تەڭگە ءبولۋ تۋرالى تۇزەتۋىمىز قولداۋ تاپتى. بۇل – وتە قۋانىشتى جانە ماڭىزدى جاڭالىق», دەپ جازدى اسحات ايماعامبەتوۆ.
سونىمەن قاتار, ايماعامبەتوۆ سوڭعى جىلدارى ونكولوگياعا قارسى كۇرەستە پرەزيدەنتتىڭ قولداۋىنىڭ ارقاسىندا ايتارلىقتاي جەتىستىكتەرگە قول جەتكىزىلگەنىن تىلگە تيەك ەتتى. سونداي-اق, كەشەندى جوسپار بەكىتىلگەنىن جانە مامانداندىرىلعان ورتالىقتىڭ قۇرىلىسى اياقتالۋعا جاقىن ەكەنىن اتاپ ءوتتى.
«سونىمەن قاتار, ۇلتتىق ونكولوگيا ورتالىعىنداعى پروتوندىق تەراپيا ورتالىعىنىڭ قۇرىلىسىن اياقتاۋعا 4,2 ميلليارد تەڭگە ءبولۋ تۋرالى ۇسىنىسىمىز دا قابىلداندى.قازىرگى ۋاقىتتا ورتالىق ازيادا پروتوندىق تەراپيا ورتالىعى جوق, سوندىقتان ءبىزدىڭ پاتسيەنتتەر قىمبات ەم الۋ ءۇشىن شەتەلگە بارۋعا ءماجبۇر. قازاقستاندا بۇل ورتالىق جىل سايىن 300-دەن استام ناۋقاسقا ءومىر سۇرۋگە مۇمكىندىك بەرىپ, شەتەلدە ەمدەلۋگە قاجەتتى ۇلكەن شىعىنداردان بوساتادى», دەلىنگەن جازبادا.