سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ يسپانيانىڭ 1000-نان استام قۇرىلىس كومپانيالارىن بىرىكتىرەتىن يسپان ونەركاسىپتىك ينجەنەرلەر قاۋىمداستىعىنىڭ وكىلدەرىمەن كەزدەستى. تاراپتار سۋ ينفراقۇرىلىمىن سالۋ جانە كادر دايارلاۋدا ىنتىماقتاستىق مۇمكىندىكتەرىن تالقىلادى, دەپ حابارلايدى Egemen.kz.
شەتەلدىك دەلەگاتسيا مينيسترگە يسپانيادا جانە باسقا مەملەكەتتەردە جۇزەگە اسىرىلعان ءىرى جوبالار تۋرالى ايتتى. ونەركاسىپتىك ينجەنەرلەر قاۋىمداستىعى وكىلدەرىنىڭ ايتۋىنشا, يسپاندىق قۇرىلىس كومپانيالارى قازاقستاننىڭ سۋ شارۋاشىلىعى نىساندارىندا جۇمىس ىستەۋگە نيەتتى.
سونىمەن قاتار شەتەلدىكتەر سالا ماماندارىنىڭ بىلىكتىلىگىن ارتتىرۋ بويىنشا دا قولداۋ كورسەتۋگە دايىن ەكەندىگىن ءبىلدىردى.
«بۇگىنگى تاڭدا يسپاندىق كومپانيالارمەن جەراستى سۋلارىن بارلاۋ جانە زەرتتەۋ ماسەلەسىن پىسىقتاپ جاتىرمىز. بىزگە يسپان ينجەنەرلەرىنىڭ تاجىريبەسى, سونىمەن قاتار بىرلەسىپ مامان دايارلاۋ مۇمكىندىگى قىزىق», دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.