كوركەمسوزدىڭ كورنەكتى وكىلى

حالىقارالىق پەن كلۋب ۇيىمداستىرعان كونفە­رەن­تسياعا رەسەيدەن جازۋشى, باسپاگەر گەورگي پرياحين, ايگىلى فرانتسۋز جازۋشىسى, ساياحاتشى جانە اۋدارماشى يۆ گوتە, تۇرىك جازۋ­شىسى, سىرتقى ساۋدا بو­يىنشا جەتەك­شى مامان, وتستاۆكاداعى پولكوۆنيك يكرامي ءوزتۋران, وزبەك اقىنى, دراماتۋرگ, تاريحشى جانە اۋدارماشى حۋرشيد داۆرون, ازەربايجاندار­دىڭ بەلگىلى ادەبيەتتانۋشى­سى, فيلولوگيا عىلىمدارى­نىڭ دوكتورى نيزامي مامەدوۆ ليتۆادان كەلگەن ورىس جازۋشىسى, «انتيبۋكەر», «زناميا» جۋرنالى, ي.بەلكين سىيلىقتارىنىڭ لاۋرەا­تى ەرگالي گەر, قىرعىز جازۋشىسى, كينورەجيسسەر دالميرا تىلەپبەرگەن ارنايى كەلىپ, قازاق پروزاسى پاتريارحىنىڭ شىعارماشىلىعىن ءار قى­رىنان تالداپ, بايانداما جاسادى. كونفەرەنتسيانى قازاق پەن كلۋبىنىڭ پرە­زيدەنتى, پروزاشى, جۋرناليست بيگەلدى عابدۋللين جۇرگىزىپ, قازاق ادەبيەتى مەترىنىڭ عاسىرلىق مەرەيتويى ۇلتتىق رۋحانيات­تاعى ايشىقتى وقيعا ەكەنىن اتاپ ءوتتى. كونفەرەنتسيادا الماتى قالاسى اكىمدىگىنىڭ وكىلى, ادەبيەتتانۋشى عالىم ماماي احەت, مادەنيەت جانە اقپارات مينيستر­لىگى قۇ­جات­تاما جانە باسپا ءىسى كو­ميتەتى­نىڭ توراعاسى رۋستام ءالي, قىزىلوردا وبلىسى اكىمىنىڭ ورىنباسارى شاحماردان بايمانوۆ قازاق ادەبيەتى­نىڭ الىپ تۇلعا­­سى­نىڭ ءومىرى مەن شىعار­­ماشى­لىعىنىڭ ماڭىزى­نا توق­تالىپ, كونفەرەنتسيا قا­تىسۋشىلارىن قۇتتىقتادى.

ءبىر عاسىر ءومىر ءسۇرىپ, ولمەس تۋىندىلارى ارقىلى حح عاسىردىڭ كوركەم شەجىرەسىن حاتقا ءتۇسىرىپ كەتكەن قايتالانباس قالام يەسىنىڭ ادەبي جانە قوعامدىق قىزمەتىنىڭ ماڭىزدى كەزەڭدەرىن اشىپ كورسەتۋگە جانە رۋحاني مۇراسىن كەيىنگى ۇرپاققا اماناتتاۋدى قاراستىرعان كونفەرەنتسيا كەڭ اۋقىمدا ءوتتى. «ەشقاشان مەرەيتويىن تويلاماعان, ماقتاۋدان, جىلتىر سوزدەن بويىن اۋلاق ۇستاعان ءبىر ادام بولسا, ول – ءابدىجامىل نۇرپەيىسوۆ» دەيدى مودەراتور ب.عابدۋللين. «قان مەن تەر» تريلوگياسىن وقىرمان پىشاق ۇستىنەن ۇلەسىپ الىپ, قولدان-قولعا تيگىزبەي وقىعان, ەڭسە تىكتەگەن ەكپىندى 50 جاسىندا دا, ساناۋلى شىعارمالارى ونداعان ميلليون تيراجبەن قايتا-قايتا باسىلىپ, شارتاراپقا اتى دۇركىرەپ جاتقان 60 جاسىندا دا, ودان كەيىنگى الەمدىك دەڭگەيگە كوتەرىلگەن ساليقالى 80, 90 جاسىندا دا مەرەيتويىن تويلاۋعا ءۇزىلدى-كەسىلدى قارسى بولعان «قيقار» مىنەزىنەن جۇرت حاباردار. تەك ءبىر مارتە عانا, وزگە تۇگىلى وزىنە-ءوزى اياۋسىز سىن كوزىمەن قارايتىن كلاسسيكتىڭ بۇلجىماس قاعي­داعا اينالعان بۇل قاتال مىنەزى­نە شىداماعان جاقىن دوستارى سىر­تىنان اقىلداسا كەلىپ, الىس-جاقىننان جازۋشى جاقىن تۇتقان سىيلاستارىنىڭ باسىن قوسىپ, «ابە دوستارىن شاقىرادى» دەگەن اتاۋمەن 85 جاسىن اتاپ وتۋگە ارەڭ كوندىرەدى. اعىل-تەگىل قىزىل سوزگە جانى قاس, ماقتان مەن جاعىمپازدىققا جيرەنە قارايتىن جازۋشى بۇكىل كەش بويىنا تەك ءۇش ادامنىڭ عانا تىلەك ايتۋىنا رۇقسات ەتەدى. جازۋ ونەرىنە, جەكە باسىنا مۇنشاما قاتال تالاپپەن قاراعان قالامگەردىڭ ومىردەن وتكەننەن كەيىنگى العاشقى مەرەيتويىن لايىقتى اتاپ وتۋدە قالامداس باۋىرلاردىڭ كەشەگى كۇنى ەسە جىبەرگەن ادالدىق پەن ادىلدىكتى قالپىنا كەلتىرگىسى كەلگەن نيەتىنەن كورىنىپ تۇردى.

قازاقستان جازۋشىلار وداعى باس­قارما توراعاسى مەرەكە قۇلكەنوۆ­تىڭ ايتۋىنشا, حالىقارالىق پەن كلۋبتىڭ نە ەكەنىن, ونىڭ قالاي جۇمىس ىستەيتىنىن, جالپى العاشقى ۇلگى مودەلىن كورسەتكەن – ءابدىجامىل نۇرپەيىسوۆ. ۇلكەن كلۋبتىڭ ۇلكەن سىيلىعىن تاعايىنداعان دا ءوزى. «اۋدارماشىمەن بىرگە جاعالاسىپ جۇمىس ىستەگەن ءبىر جازۋشى بولسا, ول دا ءا.نۇرپەيىسوۆ. باسقا تىلگە اۋدارىلعان شىعارمالارىنىڭ تاعدىرىنا دا الاڭداپ قاراپ وتىراتىن.  ءومىر بويى تالانتتى ادامدارعا كومەكتەسۋمەن كەلدى. ءومىر بويى ادەبيەتتەگى حالتۋراعا قارسى جۇمىس ىستەدى. سول سەبەپتى وعان قارسى ادامدار دا كوپ بولدى. از جازسا دا, بار قازاقتىڭ جۇرەگىن تەربەتكەن تىڭ شىعارمالار جازدى» دەيدى جازۋشى.

ادەبيەت – مادەنيەتتەر اراسىن­داعى التىن كوپىر. مەملەكەتتەر اراسىندا سوعىس بولسا دا, شايقاستان ىرگەسى سوگىلىپ, جەر بەتىنەن جوق بولىپ جويىلىپ كەتسە دە, ولاردىڭ اراسىنداعى ورتاق مادەنيەت جو­يىل­ماق ەمەس. مۇنىڭ نەگىزگى كورى­نىسى كوركەم اۋدارما, جازۋشى ەڭ­بەگىنەن تاراپ جاتادى. 1960-جىل­داردىڭ وزىندە-اق قازاقتىڭ جاس جازۋ­­شىسىنىڭ شىعارمالارى فران­­تسۋزدىڭ اتاقتى قالامگەرى لۋي اراگوننىڭ نازارىن اۋدارادى. كونفەرەنتسياعا كەلگەن فرانتسۋز ادەبيەتشىسى يۆ گوتەنىڭ ايتۋىنا قاراعاندا, سول كەزەڭدە فران­تسۋز ءباسپاسوزى نۇرپەيىسوۆتىڭ شىعار­مالارىنا وڭ باعا بەرگەن. گوتە اسىرەسە, «قان مەن تەردىڭ» العاشقى تاراۋى «ىمىرتتىڭ» اۋدارماسى تۋرالى كەڭىرەك ايتتى.

– كازاكوۆ ونى قازاقشادان فرانتسۋز اۋديتورياسىنا ارنايى بەيىمدەپ اۋدارعان. ول كەزدە ازيا دەيتىن ەلدە جاتقان قازاقتار تۋرالى فرانتسۋزداردىڭ تۇسىنىگى ورىستاردىڭ تۇسىنىگىندەي بولماشى عانا ەدى. بۇل رومان كەرمەك تاتى­عان تەرەڭ قۇدىقتىڭ سۋى سەكىلدى ءوز ەلىن­دە دە جارىققا شىقپاۋى, كەيىن­گى تاراۋلارى جازىلماي قالۋى دا مۇم­كىن ەدى. «قان مەن تەردىڭ» العاش­قى تاراۋى «ىمىرتتى» امەري­­كانىڭ, فرانتسيانىڭ, باسقا دا ادە­بيەتى دامىعان ەلدەردىڭ ۇلى شىعار­ما­لارمەن سالىستىرۋعا بولادى. سوندىقتان دا كەڭەس وداعى­نان تىسقارى ەلدە العاش رەت جاريا­لانعان فرانتسۋز اۋدارماسى ءا.نۇرپەيىسوۆتىڭ شىعارماشىلىعى ءۇشىن تۇبەگەيلى بەتبۇرىس بولعان ۇل­كەن وقيعا ەدى. ادەبي رومان كەڭىستىگىن كورسەتۋگە مۇمكىندىك بەرەتىن, كەيىن بىزگە ەتەنە تانىس سانالاتىن سول زاماننىڭ كەلبەتىن كورسەتكەن شىعارما. اراگون مەن كازاكوۆ ءا.نۇرپەيىسوۆتى الەمدىك ادەبيەتتىڭ اينالىمىنا ەنگىزدى. ايتسام, فرانتسۋزدىڭ ماقتانشاعى دەرسىزدەر, بىراق فرانتسيا ءا.نۇر­پەيىسوۆكە الەم تەرەزەسىن اشىپ بەردى. جازۋشىنىڭ كۇشى مىنادا: رەتسەنزەنت ول تۋرالى جازىپ وتىرىپ نۇرپەيىسوۆتىڭ ءوز ستيلىمەن جازادى. ياعني جازۋشىنىڭ ءسوز قولدانىسى جۇقپالى دەرت سياقتى, رەتسەنزەنتتىڭ ءوزىن ۋلاعان. ناتي­جەسىندە, ستيليستيكالىق شاعىلىسۋ پايدا بولعان. ءبىز قىراننىڭ سام­عاۋىن, جۋساننىڭ ءيىسىن, تەربەلگەن دالانى كورەمىز جانە وسىنىڭ ءبارى ءبىر رەتسەنزيانىڭ شەڭبەرىنەن بايقالادى. بۇل جازۋشىنىڭ شىعار­ماشىلىق قۋاتىنىڭ مىقتى ەكەنىن كورسەتەدى, – دەيدى يۆ گوتە.

كونفەرەنتسيادا, سونداي-اق بەلگىلى كينورەجيسسەر, «تاناريس» كوم­پانياسىنىڭ جەتەكشىسى سەرگەي ءازىموۆتىڭ «سوڭعى ساپار» اتتى فيلمىنەن  13 مينۋتتىق ەپيزود كورسەتىلدى. رەجيسسەر كىندىگى تۋعان حالقى­نا جالعانعان, جىلدىڭ كەز كەل­گەن مەزگىلىندە تۋعان جەرىنە ات باسىن تىرەپ, مازداعان وشاعىنا جىلى­نىپ قايتاتىن جازۋشىنىڭ بەلا­رانى­مەن كەزدەسكەن ءساتىن بەينەلەگەن.

ادەبيەت دەيتىن كيەلى دۇنيەگە قىلاۋ تۇسىرمەي, قالاي اسپەت­تەپ, جازۋ ونەرىن قالاي ايالاۋ كەرە­گىن قالامىمەن كورسەتىپ, بۇگىندە كوڭىل­­دەن كوشىپ بارا جاتقان ءداس­تۇردى قايتا جاڭعىرتقان جازۋشى – ءا.نۇرپەيىسوۆ. ونىڭ ءوز شىعار­مالارىن ءومىر بويى تۇزەپ-كۇزەپ, جوندەۋمەن اينالىسقان جازۋشى بولعانىن وقىرمان قاۋىم جاقسى بىلەدى. مۇنىڭ سەبەبىن جانىندا جارتى عاسىر ءىنى بولعان بەلگىلى جازۋشى سماعۇل ەلۋباي كەڭىنەن تارقاتىپ, ءتۇسىندىردى. «نەگە بۇلاي ەتتى؟» دەيتىن بولساق, ابەنىڭ ءومىرىنىڭ سوڭعى جاعىندا دۇنيەگە سمارتفون, ينتەرنەت دەگەن جويقىن كۇش كەلىپ, كەرەقارىس كىتاپتارعا قاۋىپ ءتوندىردى. ال ابەڭنىڭ الدىڭعى بۋىن زامانداستارى اۋەزوۆ, مۇسىرەپوۆ, مۇقانوۆتار بۇل دۇلەيدى كورمەي كەتتى. ولار قالاعانىنشا جازدى. «حالىق وقي ما, وقىماي ما؟» دەگەن ماسەلەگە باس اۋىرتقان جوق. ابەكەڭنىڭ ءارى باعى, ءارى سورى بولار, ۇلكەن كىتاپتاردىڭ ۇرپاقتىڭ قولىنا ىلىنبەۋىن كوزىمەن كوردى. جاسى دا, جاسامىسى دا سمارتفون كەلگەن سوڭ, كىتاپتى ىسىرىپ تاستادى. جامان جازسا, لاقتىرىپ تاس­تايتىن, جاقسى جازسا, ماڭدايىنان سيپايتىن وقىرماننىڭ الدىندا ابىرويلى بولعىسى كەلدى. ءوزى ومىردەن وتكەننەن كەيىن حالىقپەن, وقىرمانمەن تىلدەسەتىن جالعىز قۇرال, ول كىتاپ بولاتىن. سول كىتاپ ءمىنسىز بولسىن دەپ ارماندادى دا, جوندەۋمەن ءوتتى. مىناۋ ومىرگە ادام باقىتتى بولۋ ءۇشىن كەلەدى, بىراق باقىتسىز بولىپ وتەدى. ادامعا بەرىلگەنى – باقىتسىز تاعدىرى. «قان مەن تەردە» ءبىر باقىتتى ادام بار ما؟ «سوڭعى پارىزدا» باقىتتى ادام بار ما؟ ءبارى باقىتسىز جانە ومىردەن دە باقىتسىز بولىپ وتەدى» دەپ سماعۇل ەلۋباي جازۋشىنىڭ ەش قالامگەرگە ۇقسامايتىن ەرەكشە قىرلارى تۋرالى سىر اقتاردى. «نەگە باقىتسىزدىق تۋرالى جازدى, سەبەبى ول باقتىتسىز ۇرپاقتىڭ جىرشىسى ەدى» دەپ تولىقتىردى مودەراتور بيگەلدى عابدۋللين. 

ازەربايجان ادەبيەتتانۋشىسى نيزامي مامەدوۆ: – مەن سوناۋ 1980 جىلدان بەرى ۋنيۆەرسيتەتتە تۇركى حالىقتارىنىڭ ادەبيەتىنەن ءدارىس وقىپ كەلەمىن. وسى تۇركى حالىقتارىنىڭ ىشىندە عانا ەمەس, قازاق ادەبيەتىنىڭ ورەسىندە دە ءا.نۇرپەيىسوۆ مەن ءۇشىن ءاردايىم ءبىرىنشى ورىندا تۇردى. ازەربايجان ەلىنىڭ عىلىمي ورتاسى, وقىرمان اۋديتورياسى, ادەبي ورتاسى ءالى كۇنگە دەيىن جازۋشىنىڭ وزىنە عانا ءتان شىعارماشىلىق قىزمەتىنىڭ ءتۇيىنىن تولىق دەڭگەيدە قابىلداپ بولدى دەپ ايتا المايمىن. سوڭعى جىلدارى قازاق اقىن-جازۋشىلارىنىڭ شىعارمالارى ازەربايجان تىلىنە اۋدارىلىپ ءجۇر جانە بۇل ادەبي ءۇردىس جۇيەلى جولعا قويىلعان. 2022 جىلى ازەربايجان تىلىندە «قازاق پروزاسىنىڭ انتولوگياسى» جارىق كورىپ, وندا ءا.نۇرپەيىسوۆتىڭ «سوڭعى پارىز» اتتى شىعارماسى جاريالاندى. وزىندىك قولتاڭباعا يە جازۋشى ءستيلىنىڭ سونىلىعى, بىرەگەيلىگى سونداي, ول جاساعان ءار وبراز, ءار شتريح جاڭاشىلدىققا تۇنىپ تۇرا­دى. ءوزى ومىردەن ءوتىپ كەتسە دە, وسى جاڭا­­لىقتىڭ ءبارى ەندى زەرتتەلۋى كە­رەك. شىعارماشىلىق ادامدارىنا لايىقتى باعانى ءتىرى كەزىندە عا­نا بە­رەمىز دە, شىعارمالارىنىڭ ۇلى­­لىعى تۋرالى تەك باقيعا كوش­كەن­نەن كەيىن ويلانا باستايمىز. ءا.نۇر­پەيىسوۆ, مەنىڭشە, بۇگىنگى زامانداعى كوركەمسوزدىڭ ەڭ كورنەكتى وكىلى. ول ەكىتۇرلى قوعامدىق-ساياسي جۇيە­نى كو­رىپ, ەكەۋىنە دە كۋا بولعان ادام, ءبىر جاعى كەڭەستىك جۇيە, ءبىر جاعى تاۋەل­سىز قازاقستاننىڭ ءبىر-بىرى­نە ۇقسا­مايتىن قاعيداتتارىن كورسە دە, ءوز ازاماتتىق ۇستانىمىنان, ادە­بيەتكە ادالدىعىنان اينىمادى, دەدى.

قازاق پەن كلۋبى ۇيىمداستىر­عان جازۋشىلاردىڭ حالىقارالىق كونفەرەنتسياسى تۇستەن كەيىن ءال-فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتتەرىمەن كەزدەسۋگە ۇلاستى.

عاسىرعا جۋىق ءومىر سۇرگەن عا­جا­يىپ تۇلعانى قاستەرلەۋ ءىس-شا­را­سى ەكىن­شى كۇنى تاعى دا جالعاسىپ, الماتى قالاسىنداعى جازۋشى ءومىر سۇرگەن م.تولەباەۆ كوشەسىندەى №156 ءۇيدىڭ قابىرعاسىنا مەموريالدى تاقتا ورناتۋدان باستالدى. اڭىز تۇلعالار مەن  الىپتاردىڭ مە­كەنى بولعان ايگىلى كوشەگە ءسان بەرگەن ءۇيدىڭ قابىرعاسىنا ىلىنگەن تاق­تالار گالەرەياسى ادەبيەت الىبى­نىڭ ەسىمىمەن تولىقتىرىلدى. بۇل جازۋشىعا دەگەن – قۇرمەت, مۇراسىنا – تاعزىم.

بۇدان كەيىن دوستىق ۇيىندە جازۋشىلاردىڭ حالىقارالىق عىلىمي-تاجىريبەلىك كونفەرەنتسياسىمەن ساباقتاسقان سالتاناتتى جيىندى قازاقستان جازۋشىلار وداعى باسقارماسىنىڭ توراعاسى, جازۋشى مەرەكە قۇلكەنوۆ اشىپ, ءا.نۇرپەيىسوۆتىڭ 100 جىلدىق مەرەيتويىن ۇلىقتاۋ شاراسىنىڭ نەگىزگى ۇيىتقىسى الماتى قالاسى اكىمدىگى مەن مادەنيەت جانە اقپارات مينيسترلىگىنىڭ قولداۋىنا العىسىن ءبىلدىرىپ, مينيستر ايدا بالاەۆاعا ءسوز بەردى. ايدا عالىمقىزى مەملەكەت باسشىسى قاسىم-جومارت توقاەۆتىڭ ارنايى جولداعان قۇتتىقتاۋ حاتىن وقىپ بەردى. مينيستر سوڭعى ءۇش ايدىڭ ىشىندە جازۋشىنىڭ مەرەيتويىنا وراي وڭىرلەردە 50-گە تارتا ءىس-شارا وتكەنىن, باسىلىم بەتتەرىندە ءتۇرلى ماقالا جارىق كورگەنىن, تەلەارنالاردان «ورىندالماعان ارمان», «اڭىز عۇمىر» اتتى دەرەكتى فيلمدەر مەن ءتۇرلى باعدارلامالار ۇيىمداستىرىلعانىن اتاپ ءوتتى.

– ادەبيەتىمىزدىڭ ابىزى ءابدى­جامىل اعامىزدىڭ شىعارما­شى­لىعىمەن, تۇلعالىق بولمىسىمەن بۇرىننان ەتەنە تانىسپىن. ونىڭ قويىنداپتەرگە جازىلعان «كۋرليانديا» رومانىمەن باستالعان شىعارماشىلىق جولى «قان مەن تەر» تريلوگياسىمەن, تەرەڭگە تامىر جايعان «سوڭعى پارىز» رومانى­مەن داڭعىلعا ۇلاستى. ءار شىعارما­سى­نا ۇلكەن جاۋاپكەرشىلىكپەن قاراپ, «قان مەن تەردى» جارتى عاسىرعا جۋىق تالماي تۇزەپ, «سوڭعى پارىزىن» قايتا جازىپ, ءومىرىنىڭ سوڭىنا دەيىن ايانباي ەڭبەك ەت­تى. ابەڭنىڭ ءسوز ونەرىنە دەگەن اس­قان جاۋاپكەرشىلىگى, قالامعا سەرت بەرگەنى بۇگىنگى جاستارعا ۇلگى-ونەگە بولۋعا ءتيىس. بۇگىنگى كونفەرەنتسيا جازۋشىنىڭ شىعارماشىلىعىن جاڭا قىرىنان زەرتتەلۋگە جول اشادى دەپ ۇمىتتەنەمىن. قابىرعالى قالامگەردىڭ قۇندى تۋىندىلارى ۋاقىتپەن بىرگە دامىپ,  كەلەر ۇرپاقتىڭ رۋحاني قازىناسىنا اينالاتىنىنا زور سەنىممەن قارايمىن, – دەدى مينيستر.

كەڭەس وداعىنداعى ەڭ جوعارعى مارتەبەلى سىيلىق – مەملەكەتتىك سىيلىقتى «قان مەن تەر» تريلوگيا­سىنىڭ اۆتورى رەتىندە ۇلى ۇستازى مۇحتار اۋەزوۆتەن كەيىن يەلەنىپ,  جۇبان مولداعاليەۆ تۇيىندەگەن ۇشتىكتىڭ قاتارىندا تاريحتان ءوز ورنىن ەنشىلەگەنى ءوز الدىنا ءبىر ەرلىك ەكەنىن كونفەرەنتسيا قاتىسۋشىلارى قايتا-قايتا ەسكە الدى. تۇركسوي ۇيىمىنىڭ باس حاتشىسى سۇلتان راەۆ تىنىمسىز ەڭبەك پەن  تاباندى تالانتىنىڭ ارقاسىندا شەبەرلىكتىڭ شىڭىنا شىققان جازۋشىنى «قازاق ادەبيەتىنىڭ عانا ەمەس, الەمدىك ادە­بيەت­تىڭ ۇلكەن تۇلعاسى, تۇركى ادەبيەتى­نىڭ شولپان جۇلدىزى. ۇلى مۇحتار اۋەزوۆتەن كەيىن قازاق ادە­بيەتىن الەمدىك دەڭگەيگە الىپ شىققان بىرە­گەي قۇبىلىس» دەپ باعالادى.

سونداي-اق كونفەرەنتسيادا ءسوز العان اقىن, مەملەكەتتىك سىيلىق­تىڭ لاۋرەاتى نۇرلان ورازالين, مەملە­كەت جانە قوعام قايرات­­كەرى قى­رىم­بەك كوشەرباەۆ, كسرو حا­لىق ءارتىسى ءاسانالى ءاشىموۆ ايتقان قالام­­گەردىڭ ادەبي-كوركەم ەڭبەگى مەن ازامات­تىق بولمىسى تۋرالى شىنايى اڭگىمە كوپتىڭ كوڭىلىن ەلجىرەتتى. قازاق­ستاننىڭ ەڭبەك سىڭىر­گەن ءارتىسى باۋىرجان قاپتاعاي وقىعان ء«ابدى­جامىل نۇرپەيىسوۆتىڭ مونولوگىنەن» جازۋشىنىڭ جان سىرىن تانىدى.

«ابەنىڭ البومى» اتتى فوتوالبوم تانىستىرىلىپ, العاش­قى ءسۇيىنشى داناسى وتباسى مەن مي­نيستر­لىككە تارتۋ ەتىلدى, جينال­عان قاۋىم جازۋشى ءومىرى مەن شىعار­ماشىلىعىن ارقاۋ ەتكەن كورمەنى تاماشالادى.

جوعارى وقۋ ورىندارىندا, ءبىلىم وشاقتارىندا, كىتاپحانالاردا, مۋزەيلەردە, اقپارات قۇرالدارىندا جىل بويى جۇزەگە اسىرىلعان تاعى­لىمدى ءىس-شارالار كەرۋەنى جازۋ­شىنىڭ اياۋلى مەكەنى, قۇتتى قونى­سى بولعان الماتى شاھارىندا كۇللى ادە­بيەتتىڭ مەرەكەسى سياقتى شارىق­تاپ بارىپ, كوركەم كۇي, ونەگەلى ءتۇ­يىن تاپتى. ۇلت ادەبيەتىنىڭ ءبىرتۋار سۋرەتكەرىنە كورسەتىلەتىن قۇرمەت مەرەي­تويمەن عانا شەكتەلمەك ەمەس.

الماتى