تۇڭعىش رەت اسىق اتۋدان اشىق تۋرنير ءوتتى

رەسپۋبليكا پارتياسىنىڭ ۇيىمداستىرۋىمەن وتكەن بۇل ءىس-شارادا 40 ويىنشى باق سىنادى. ءتۋرنيردىڭ فينالدىق كەزەڭىنە 17 وبلىس, 3 مەگاپوليستەگى ىرىكتەۋدىڭ قورىتىندىسىنا سايكەس, 21 جاستان اسقان 2 مىڭعا جۋىق قاتىسۋشىنىڭ اراسىنان 1-2 ورىن العان 40 سپورتشى عانا جولداما الدى.

«وسىنداي ءتۋرنيردى ۇيىمداستىرۋ يدەياسى جارتى جىل بۇرىن تۋىنداپ, ايماقتاردا ىرىكتەۋ جارىستارىن وتكىزدىك. اسىق اتۋ – كوپشىلىكتىڭ جادىندا اۋىل بالالارىنىڭ كۇندەلىكتى ويىنى رەتىندە ساقتالىپ قالعان. ۇلتتىق ويىنىمىزدى بۇقارالىق دەڭگەيگە كوتەرۋ ماقساتىندا, باس جۇلدەگە اۆتوكولىك تىگۋ ارقىلى قىزىعۋشىلىقتى ارتتىرعىمىز كەلدى. ىرىكتەۋ كەزەڭدەرىندە دە جۇلدەگەرلەر اقشالاي سىياقىمەن ماراپاتتالدى. وسى ءتۋرنيردى الداعى جىلدارى داستۇرگە اينالدىرساق جانە جاسوسپىرىمدەردى دە قامتىساق دەگەن جوسپارىمىز بار. سەبەبى جاس بۋىندى قازىردەن ۇلكەن دودالارعا دايىنداي بەرۋىمىز كەرەك. جارىس بارىسىندا باسەكەلەستىك وتە جوعارى بولدى. ءادىل بولۋ ءۇشىن, ارنايى كامەرا دا قويدىردىق. جاڭا ەسىمدەردى شىعارىپ, ولارعا مۇمكىندىك بەرۋ - مىندەتىمىز», دەدى «كوشپەندىلەردىڭ اسىق سپورتى» حالىقارالىق فەدەراتسياسىنىڭ پرەزيدەنتى ولجاس قۇسپەكوۆ.

ناتيجەسىندە مىڭنان وزا شاپقان انۋاربەك نۇرجىگىت JAC تەمىر تۇلپارىن تىزگىندەسە, كۇمىس جۇلدەگەر نۇرلان جومارت 1 000 000 تەڭگە سىياقى الدى. ال قولا جۇلدەگەر عارىشبەك ق ۇلىبەك 500 000 تەڭگە سىياقىمەن ماراپاتتالدى. جەڭىسكە دەگەن جىگەرى ءۇشىن جەتىسۋ وبلىسىنىڭ وكىلى قاستاي ماناسقا ارنايى كۋبوك بەرىلدى.