زاماناۋي كومپانيالار ساتتىلىك تۇراقتى بولۋى ءۇشىن بولاشاق كوشباسشىلاردى دامىتۋعا ايرىقشا ءمان بەرەدى. ونىڭ ەڭ ءتيىمدى جولدارىنىڭ ءبىرى – تالىمگەرلىك. بۇل ءادىس قىزمەتكەرلەردى دامىتىپ قانا قويماي, كوماندالىق مادەنيەتكە ۇيرەتىپ, كومپانيا قۇندىلىقتارىن كۇشەيتەدى, دەپ جازادى Egemen.kz.
مەديتسينالىق تەحنولوگيالار جانە اقپاراتتىق جۇيەلەر ورتالىعى (متاجو) كادرلاردى دامىتۋعا جانە تالىمگەرلىكتىڭ ءتيىمدى تاسىلدەرىن ەندىرۋگە ايرىقشا كوڭىل بولەدى. ودان بولەك, ورتالىق تالىمگەرلىك باعدارلامالارى اياسىندا ءپىب جۇيەسىنىڭ قىزمەتكەرلەرىن دە وقىتادى. پەرسونالدى باسقارۋ سالاسىنىڭ ساراپشىسى جانە HR ورتالىق جەتەكشىسى اينۇر كاماروۆا بۇل ءتاسىلدى كومپانيادا قولدانۋدىڭ قىر-سىرىمەن ءبولىستى.
«تالىمگەرلىك – ءبىلىم مەن تاجىريبەنى بەرۋ جولى عانا ەمەس, ول – قىزمەتكەرلەردى ستراتەگيالىق دامىتۋدىڭ قۇرالى. LinkedIn زەرتتەۋىنىڭ مالىمەتتەرىنە سايكەس, قىزمەتكەرلەردىڭ 94%-ى, ەگەر وعان وقۋ مەن وسۋگە مۇمكىندىكتەر بەرىلسە, كومپانياداعى جۇمىسىن جالعاستىرا بەرۋگە دايىن. تالىمگەرلىك كومپانيا قىزمەتكەرلەرىنە كاسىبي جانە جەكە دامۋعا جاعدايلار جاساي وتىرىپ, نەگىزگى كادرلاردى وزىندە ۇستاپ قالۋعا كومەكتەسەدى. ودان بولەك, بيزنەستىڭ ماڭىزدى مىندەتتەرىن شەشۋگە جاردەمدەسەدى», دەدى اينۇر كاماروۆا.
ونىڭ ايتۋىنشا, زەرتتەۋلەر قىزمەتكەرلەردىڭ 84%-ى كومپانيا وعان ءوز سالاسى بويىنشا ءبىلىم مەن تاجىريبەنى جاڭارتۋعا قاجەتتى وقۋ مەن داعدىلاردى دامىتۋ مۇمكىندىگىن بەرەدى دەپ كۇتەدى. وسىلايشا, تالىمگەرلىك باعدارلاماسىن جولعا قويعان كومپانيالار كادر تۇراقسىزدىعىن تومەندەتىپ, كوماندانىڭ جالپى تيىمدىلىگىن ارتتىرا الادى.
تالىمگەرلىك باعدارلاماسى بارىنشا ءتيىمدى بولۋى ءۇشىن ناقتى بيزنەس ماقساتتارعا قول جەتكىزۋگە كومەكتەسەتىن ستراتەگيالىق تاسىلدەردى قولدانعان دۇرىس. متاجو ساراپشىلارىنىڭ ۇسىنىستارىنا سۇيەنە وتىرىپ, باعدارلامانى ءساتتى قۇرۋدىڭ نەگىزگى ءتورت قادامىن ايقىنداۋعا بولادى:
ماقساتتاردى ماقۇلداۋ. تالىمگەرلىك ناقتى بيزنەس ماقساتتارعا قول جەتكىزۋگە باعىتتالۋى ءتيىس: كليەنتتەردىڭ قاناعاتتانۋ دەڭگەيىن جاقسارتۋ, يننوۆاتسيالاردى ەنگىزۋ, كادر تۇراقسىزدىعىن تومەندەتۋ. تالىمگەرلەر ءوز قاراماعىنداعى قىزمەتكەرلەردىڭ كومپانيانىڭ ماقساتتارىن كوزدەيتىن باعىتتاردا دامۋىنا كومەكتەسەدى. دايىنداۋ جانە قولداۋ. تالىمگەرلىك تالىمگەرلەردىڭ دە, ونىڭ قاراماعىنداعىلاردىڭ دا دايىندىعىن قاجەت ەتەدى. وقۋ تالىمگەرلەرگە ءوزىنىڭ كەرى بايلانىس داعدىلارىن دامىتۋىنا, ال قاراماعىنداعى قىزمەتكەرلەرگە ماقساتتارىن ايقىنداپ, كوممۋنيكاتسيانى جاقسارتۋعا كومەكتەسەدى. تۇراقتى كەزدەسۋلەر مەن ناتيجەلەردى باقىلاۋ ماڭىزدى. قاتىسۋشىلاردى دۇرىس تاڭداۋ. تالىمگەرلىكتىڭ ءساتتى بولۋى كوپ جاعدايدا جۇپتى دۇرىس تاڭداۋعا بايلانىستى. كومپانيالار قاتىسۋشىلاردىڭ تەك كاسىبي داعدىلارىنا عانا ەمەس, جەكە قاسيەتتەرىنە, كوزقاراستارى مەن ىنتاسىنا ءمان بەرۋى كەرەك. سونداي-اق, ارتۇرلىلىكتى قامتاماسىز ەتىپ, قاتىسۋشى قىزمەتكەرلەردىڭ ءتۇرلى ساناتتاعى ادامداردان جاڭا تاجىريبە جيناۋىنا مۇمكىندىك بەرۋ قاجەت. تالىمگەرلىك فورماتتارىنىڭ ارتۇرلىلىگى. تالىمگەرلىك فورمالدى جانە بەيفورمالدى جاعدايلاردا دا ءوتۋى مۇمكىن. ياعني, تۇراقتى ترەنينگتەر مەن ۆەبينارلاردان بولەك, كوفە ءىشۋ بارىسىنداعى بەيفورمالدى اڭگىمەلەسۋ تۇرىندە دە وتكىزۋگە بولادى. ءتاسىلدىڭ ەكى ءتۇرى دە ماڭىزدى: بەيفورمالدى قارىم-قاتىناس سەنىمدى كۇشەيتسە, فورمالدى كەزدەسۋلەر وقۋ پروتسەسىن جۇيەلەيدى.تالىمگەرلىك – كوشباسشىلىق قاسيەتتەردى قالىپتاستىرۋدىڭ ءتاسىلى. جەكەلەگەن قىزمەتكەرلەردىڭ دامۋىنا عانا ەمەس, سونىمەن قاتار كومپانيا ىشىندە مىقتى مادەنيەت قۇرۋعا دا كومەكتەسەدى. ءساتتى جۇزەگە اسىرىلعان تالىمگەرلىك باعدارلاماسى قانداي قيىن مىندەتتەرگە دايىن كوشباسشىلاردى تاربيەلەپ, كومپانيانىڭ تۇراقتى دامۋىن قامتاماسىز ەتەدى. متاجو مۇنداي باعدارلامالاردى ءوز قىزمەتكەرلەرىن قولداپ, ولاردىڭ ءوسىپ-دامۋىنا جاعداي جاساۋ ءۇشىن باعدارلاماسىنا ەنگىزەدى. بىلىكتى جاستار كومپانيانى العا جەتەلەيتىن مىقتى كاسىبي ماماندار قوعامداستىعىن قۇرا الادى.