ۇلتتىق مەرەكە – رەسپۋبليكا كۇنى قارساڭىندا پرەزيدەنت قاسىم-جومارت توقاەۆتىڭ جارلىعىمەن ءبىر توپ ازاماتتار مەملەكەتتىك ناگرادالارمەن ماراپاتتالدى. ءتۇرلى سالا وكىلدەرى اراسىندا قۇقىق قورعاۋ ورگاندارىنىڭ قىزمەتكەرلەرى جانە اسكەري قىزمەتشىلەر دە بار, دەپ جازادى Egemen.kz.
اقوردانىڭ ءباسپاسوز قىزمەتىنەن ءمالىم ەتىلگەندەي, اسكەري جانە قىزمەتتىك بورىشىن ۇلگىلى اتقارعانى, زاڭدىلىق پەن قۇقىقتىق ءتارتىپتى قامتاماسىز ەتۋدە, ەلدىڭ ۇلتتىق قاۋىپسىزدىگى مەن قورعانىس قابىلەتىن نىعايتۋ كەزىندە كورسەتكەن ەرلىگى ءۇشىن اسكەري قىزمەتشىلەر مەن قۇقىق قورعاۋ ورگاندارى وكىلدەرىنىڭ ءبىر ءتوبى ى جانە ءىى دارەجەلى «داڭق» وردەنىمەن, ءىى جانە ءىىى دارەجەلى «ايبىن» وردەنىمەن, «ەرلىگى ءۇشىن» جانە «جاۋىنگەرلىك ەرلىگى ءۇشىن» مەدالدارىمەن ماراپاتتالدى.
اتاپ ايتقاندا, سۋعا باتىپ بارا جاتقان ادامدى قۇتقارعانى ءۇشىن ر.قوشقارباەۆ اتىنداعى ءىىى دارەجەلى «ايبىن» وردەنىن ۇلتتىق ۇلاننىڭ «شىعىس» وڭىرلىك قولباسشىلىعىنىڭ اعا جاۋىنگەرى ج.پەرمابەك الدى.
«ەرلىگى ءۇشىن» مەدالىمەن پاۆلودار وبلىسى پوليتسياسىنىڭ ۋچاسكەلىك اعا ينسپەكتورى ە.قويكەن, اقتوبە قالاسىنىڭ پوليتسيا ينسپەكتورى ف.نۇرمانوۆ, تالدىقورعان قالاسىنىڭ پوليتسيا ينسپەكتورى س.سەرىكقالي ۇلى, ءجاسوسپىرىمدى ورتتەن قۇتقارعانى ءۇشىن اتىراۋ قالاسى پوليتسياسىنىڭ ۋچاسكەلىك ينسپەكتورى د.قورعانباەۆ ناگرادتالدى.