استانادا پوليتسيا تۇراقتى تۇردە الاياقتىق جاسادى دەگەن كۇدىككە ىلىنگەن پاۆلودار تۇرعىنىن ۇستادى. ايەل جوق جيھازدى ساتىپ وتىرعان, دەپ حابارلايدى Egemen.kz.
قۇقىق قورعاۋ ورگاندارىنىڭ مالىمەتىنشە, پاۆلودارلىق تۇرعىن ساتىپ الۋشىلارعا الدىن الا تولەم اۋدارتىپ وتىرعان.
«پاۆلودار تۇرعىنى جوق جيھازدى ساتۋ بويىنشا «بيزنەس» ۇيىمداستىردى. 30 جاستاعى قىز سايتتا ارزان تۇرمىستىق زاتتاردى ساتۋ تۋرالى حابارلاندىرۋلار ورنالاستىردى. ول نيەت بىلدىرۋشىلەرگە ءموبيلدى بانكينگ ارقىلى 5-تەن 30 مىڭ تەڭگەگە دەيىنگى شاعىن الدىن الا تولەمدى اۋدارۋدى ۇسىندى. بۇگىندە پوليتسياعا ونعا جۋىق الدانعان ازامات جۇگىنىپ, كۇدىكتىگە قاتىستى قىلمىستىق ءىس قوزعالدى», دەلىنگەن حابارلامادا.
پوليتسەيلەر ازاماتتاردان قىراعى بولۋدى, ساق بولۋدى, وزدەرىنىڭ جەكە جانە بانكتىك دەرەكتەرىن, سونداي-اق SMS-حابارلامالاردىڭ مازمۇنىن بەرمەۋدى سۇرايدى.
«كۇماندى ساتۋشىلاردان تاۋارلار مەن قىزمەتتەردى ساتىپ الماڭىز, الەۋمەتتىك مەديا مەن مەسسەندجەرلەردە ەكى فاكتورلى اۋتەنتيفيكاتسيانى قولدانىڭىز. ەسىڭىزدە بولسىن, ءسىزدىڭ جەكە جيناقتارىڭىز بەن جەكە دەرەكتەرىڭىزدىڭ قاۋىپسىزدىگى ءسىزدىڭ قولىڭىزدا», دەدى پوليتسيا قىزمەتكەرلەرى.