ساۋد ارابيا كورولدىگىنىڭ قاجىلىق جانە ۇمرا مينيسترلىگى 2025 جىلعى قاجىلىق ماۋسىمى ءۇشىن قازاقستانعا 10 مىڭ قاجىلىق ورنىن ۇسىندى, دەپ حابارلايدى Egemen.kz.
قمدب ءباسپاسوز قىزمەتى تاراتقان مالىمەتكە سايكەس, قازاقستاندىقتاردىڭ قاجىلىق ساپارىن ارنايى بايقاۋدان وتكەن 15 تۋريستىك كومپانيا ۇيىمداستىرادى.
قمدب مالىمەتىنشە, تۋروپەراتورلار اراسىنداعى بايقاۋعا 21 كومپانيا قۇجاتتارىن ۇسىنعان. الايدا, ولاردىڭ ۇشەۋى ليتسەنزياسىنىڭ بولماۋى جانە دۇرىس ەمەستىگى ءۇشىن بايقاۋعا جىبەرىلمەسە, تاعى ۇشەۋىنىڭ تاجىريبەسى ءالى 5 جىلعا تولماعانى انىقتالعان. بۇل بايقاۋ تالاپتارىنا قايشى.
- تۋروپەراتورلاردان كەلگەن وتىنىشتەر مەن تالاپ ەتىلگەن قۇجاتتار ورتاعا سالىنىپ, ارقايسىسى مۇقيات قارالدى. كوميسسيا مۇشەلەرى جوعارىداعى ەرەجەگە سۇيەنە وتىرىپ تۋروپەراتورلاردى بالدىق جۇيەمەن باعالادى. كونكۋرستان ءوتىپ, ساۋد ارابيا كورولدىگى قاجىلىق جانە ۇمرا مينيسترلىگىنە قاراستى قاجىلىقتىڭ ەلەكتروندى جۇيەسىنە رەسمي تىركەلەتىن 15 تۋروپەراتور جيناعان قاجىلارى مەن قارجىلىق مۇمكىنشىلىگىنە قاراي قاجىلىق ورىندارىن الادى, – دەلىنگەن قمدب حابارلاماسىندا.
2024 جىلى قازاقستاننان 5081 ادام مۇسىلماندىق پارىزىن وتەگەن ەدى.