1897 جىلى قالا حالقىنىڭ سانى نەبارى 10-15 مىڭ ادام بولسا, 1939 جىلعا قاراي 75 مىڭعا دەيىن ءوستى. كەڭەستىك كەزەڭدە ءىرى زاۋىتتاردىڭ اشىلۋى حالىق سانىنىڭ 400 مىڭعا دەيىن وسۋىنە ىقپال ەتتى. 2018 جىلى شىمكەنت استانا جانە الماتىمەن قاتار رەسپۋبليكالىق ماڭىزى بار قالا مارتەبەسىن الىپ, ميلليوننان استام حالقى بار قالالاردىڭ بىرىنە اينالدى, دەپ جازادى Egemen.kz.
بۇگىنگى تاڭدا شىمكەنت تۇرعىندارىنىڭ سانى 1 ميلليون 200 مىڭ ادامعا جۋىقتاعان. ال 2035 جىلعا قاراي قالا تۇرعىندارىنىڭ سانى 1 ميلليون 900 مىڭ ادامعا دەيىن وسەدى دەپ جوسپارلانعان.
«حالىقتىڭ تىعىزدىعى كوممۋنالدىق قىزمەت شىعىندارىن وڭتايلاندىرۋعا مۇمكىندىك بەرەدى, ال اۋا مەن سۋ ساپاسى سياقتى ەكولوگيالىق پروبلەمالاردى شەشۋ نەگىزىنەن باسقارۋ ماسەلەلەرىمەن بايلانىستى. قالانىڭ ءارى قاراي دامۋى ءۇشىن تۇراقتى جانە ساپالى باسقارۋ قاجەت. سوعان قاراماستان, شىمكەنت ءوزىنىڭ قولايلى كليماتىنىڭ, ىڭعايلىلىعىنىڭ جانە جاسىل جەلەكتىڭ كوپتىگىنىڭ ارقاسىندا ءومىر سۇرۋگە جايلى قالا بولىپ قالا بەرەدى. مەن شىمكەنتتى ەلىمىزدىڭ ەڭ ادەمى قالالارىنىڭ ءبىرى دەپ ەسەپتەيمىن», دەيدى ساراپشىلار.
سونىمەن قاتار قالا تۇرعىندارىنىڭ ەتنيكالىق قۇرامى ايتارلىقتاي وزگەرىستەرگە ۇشىراپ جاتىر. بۇرىن شىمكەنتتە وزگە ۇلت وكىلدەرى باسىم بولسا, قازىر حالىقتىڭ 70 پايىزىن قازاقتار قۇرايدى.
ايتا كەتەرلىگى, شىمكەنت قالالىق پد كوشى-قون قىزمەتىنىڭ بولىمشەلەرىندە 42 654 شەتەلدىك ۋاقىتشا تىركەۋگە تۇرسا, ونىڭ ىشىندە ەڭ كوپ – 39 418 ادام وزبەكستاننان كەلگەن.