جول اپاتى 16 قازان كۇنى ساعات 07:30-دا بەينەۋ-تاجەن تاس جولىندا بولعان, دەپ حابارلايدى Egemen.kz.
وبلىستىق پوليتسيا دەپارتامەنتىنىڭ مالىمەتىنشە, Jac كولىگى جول جيەگىندە تۇرعان MAN جۇك كولىگىنە سوعىلعان. جۇك كولىگى شەكارادان ءوتۋ ءۇشىن كەزەكتە تۇرعانى بەلگىلى بولدى.
«كولىكتە بارلىعى 10 ادام بولعان. ولاردىڭ تورتەۋى بەينەۋ ورتالىق اۋداندىق اۋرۋحاناسىنا جاتقىزىلدى. زارداپ شەككەندەردىڭ جاعدايى ورتاشا اۋىر. ناۋقاستار قاجەتتى ەمدى تولىق كولەمدە الىپ جاتىر. وقيعا سالدارىنان 6 ادام قازا تاپتى», دەپ حابارلادى وبلىستىق پوليتسيا دەپارتامەنتىنىڭ ءباسپاسوز قىزمەتى.
سونىمەن قاتار جول-كولىك وقيعاسىنا قاتىسقان كولىكتەردىڭ وزبەكستان رەسپۋبليكاسىندا تىركەلگەنى انىقتالعان. سونداي-اق زارداپ شەككەندەر مەن قازا تاپقاندار رەسەي فەدەراتسياسىنان كەتكەن وزبەكستان ازاماتتارى ەكەنى بەلگىلى بولدى.
اتالعان جول-كولىك وقيعاسى بويىنشا سوتقا دەيىنگى تەرگەۋ امالدارى باستالعان.