الماتىدا اسكەري-تەحنيكالىق مەكتەپ الاڭىندا 118 تۇلەكتىڭ سالتاناتتى اسكەري انت قابىلداۋ ءراسىمى ءوتتى, دەپ حابارلايدى Egemen.kz.
قورعانىس مينيسترلىگىنىڭ مالىمەتىنشە, مەكتەپ وقۋشىلارى بارلاۋشى, ۇشقىشسىز باسقارىلاتىن قۇرىلعى وپەراتورى, زەنيتشى, بارلاۋشى حيميك, رادياتسيالىق جانە حيميالىق بارلاۋ سالاسىنىڭ مامانى سياقتى ماماندىقتار بويىنشا وقۋدى اياقتاپ وتىر. ۇزدىك تۇلەكتەر العىس حاتتارمەن ماراپاتتالدى.
كۋرسانتتار ۇشقىشسىز باسقارىلاتىن قۇرىلعىلارى باسقارۋ, درونداردى انىقتاۋ-جويۋ تۇرعىسىندا جانە ينجەنەرلىك دايىندىق ەلەمەنتتەرى بويىنشا ءوز شەبەرلىكتەرىن كورسەتتى.
«وسىندا وقىپ جۇرگەندە ارقايسىمىزعا جاڭا دۇنيەنىڭ ەسىگى اشىلعانداي بولدى. مەن بارلاۋ حيميگى ماماندىعىن مەڭگەردىم. مۇندا العان ءبىلىم مەن داعدىلار ازاماتتىق سالادا دا كادەگە جارارىنا سەنىمدىمىن», دەدى تۇلەك ماۋلەن نۇرداۋلەت.
ايتا كەتسەك, الماتى اسكەري-تەحنيكالىق مەكتەبىن جىل سايىن 700-دەن استام تۇلەك ءتامامدايدى. وقۋ ورنى ەكى باعدارلاما بويىنشا – ازاماتتاردى قارۋلى كۇشتەردەگى قىزمەتكە تەگىن دايىندايدى جانە رەزەرۆتى قالىپتاستىرۋ ءۇشىن اقىلى وقىتادى. اتالعان مەكتەپ – ارميادا دا, ازاماتتىق ومىردە دە سۇرانىسقا يە 28 ماماندىق بويىنشا ءبىلىم بەرەدى.