بيىل حيميا بويىنشا نوبەل سىيلىعى اقۋىزدىڭ كومپيۋتەرلىك ديزاينى مەن ولاردىڭ ءۇش ولشەمدىك قۇرىلىمىن جاساعان عالىمدار دەۆيد بەيكەر, دەميس حاسسابيس جانە دجون دجامپەرگە بەرىلدى. بۇل جونىندە 9 قازاندا نوبەل كوميتەتى حابارلادى, دەپ جازادى Egemen.kz.
.ۆاشينگتون ۋنيۆەرسيتەتىنىڭ پروفەسسورى دەۆيد بەيكەر «اقۋىزدىڭ كومپيۋتەرلىك ديزاينىن جاساعانى ءۇشىن» سىيلىقتى يەلەندى. ونىڭ عىلىمي ەڭبەگى اقۋىزدىڭ مۇلدە باسقا تۇرلەرىن تۇزۋگە جول اشادى.
«Google-عا قاراستى Google DeepMind كومپانياسىنىڭ قىزمەتكەرلەرى دەميس حاسسابيس جانە دجون دجامپەر اقۋىزدىڭ بارلىق ءتۇرىنىڭ قۇرىلىمىن بولجاۋ ءۇشىن جاساندى ينتەللەكتىنى قولدانعان. مۇنداي جاڭالىقتىڭ پوتەنتسيالى زور», دەپ جازىلعان نوبەل كوميتەتىنىڭ سايتى تاراتقان حابارلامادا.
ايتا كەتەيىك, نوبەل سىيلىعىنىڭ لاۋرەاتتارىنا التىن مەدال, ديپلوم مەن 11 ملن شۆەد كرونى كولەمىندە اقشالاي سىيلىق (بيىل ونىڭ كولەمى شامامەن 1,1 ملن دوللار) بەرىلەدى.