الماتىدا «داعدارىس پەن تۇراقسىزدىق جاعدايىندا ۇيىمدار مەن باق اراسىنداعى ءتيىمدى كوممۋنيكاتسيالار» سەمينارى ءوتتى. ونى قر مادەنيەت جانە اقپارات مينيسترلىگى, نارحوز ۋنيۆەرسيتەتى, قازاقستانداعى بۇۇ جاھاندىق كوممۋنيكاتسيالار دەپارتامەنتىنىڭ وكىلدىگى — قازاقستانداعى بۇۇ اقپاراتتىق بيۋروسىنىڭ باسشىسى ۇيىمداستىردى, دەپ حابارلايدى Egemen.kz.
سەميناردىڭ اشىلۋىندا نارحوز ۋنيۆەرسيتەتىنىڭ پرەزيدەنتى قانات قوجاحمەت, قر مادەنيەت جانە اقپارات مينيسترلىگىنىڭ باق سالاسىنداعى مەملەكەتتىك ساياسات دەپارتامەنتىنىڭ ديرەكتورى قاينار احەتوۆ, قازاقستانداعى بۇۇ جاھاندىق كوممۋنيكاتسيالار دەپارتامەنتىنىڭ وكىلى — قازاقستانداعى بۇۇ اقپاراتتىق بيۋروسىنىڭ باسشىسى ۆلاستيميل سامەك ءسوز سويلەدى.
ء«ىس-شارا قازاقستان رەسپۋبليكاسى مادەنيەت جانە اقپارات مينيسترلىگىنىڭ سالالىق جۋرناليستيكانى دامىتۋ جونىندەگى جول كارتاسىن جۇزەگە اسىرۋ اياسىندا وتۋدە. سونىمەن قاتار, مەملەكەت باسشىسى قاسىم-جومارت توقاەۆتىڭ «ادىلەتتى قازاقستان: قۇقىق ءتارتىبى, ەكونوميكالىق ورلەۋ, قوعامدىق وپتيميزم» اتتى جولداۋىن نەگىزگە الدىق. قوعامنىڭ بارلىق سەكتورىن بىلىكتى ماماندارمەن قامتاماسىز ەتۋ — ەڭ ماڭىزدى مىندەت, ال بۇگىنگى سەميناردىڭ اياسىندا ءبىز قازىرگى قوعامنىڭ جوعارى تالاپتارىنا ساي كەلەتىن سالالىق جۋرناليستەردى دايارلاۋ ماسەلەسىن تالقىلاپ جاتىرمىز.
بۇل شارا ءبىزدىڭ ۋنيۆەرسيتەت ءۇشىن ەرەكشە ماڭىزعا يە, سەبەبى Narxoz University STRATEGY 2030 ستراتەگياسىن بەلسەندى تۇردە دامىتۋدا. تۇراقتى دامۋ ماقساتتارى اياسىندا ءبىلىم بەرۋدى باستى ماقسات ەتە وتىرىپ, ءوز جەتىستىكتەرىمىزبەن ماقتانامىز. Narxoz ۋنيۆەرسيتەتى تەك قازاقستاندا عانا ەمەس, حالىقارالىق ارەنادا دا كوشباسشى ورىنداردى يەلەنۋدە.
بۇگىنگى سەمينارىمىز ءتيىمدى كوممۋنيكاتسيالار تاقىرىبىنا ارنالادى. اقپاراتتىق اعىندار قارقىندى دامىپ جاتقان قازىرگى الەمدە تۇراقسىزدىق پەن بەلگىسىزدىك ءبىزدىڭ كۇندەلىكتى ءومىرىمىزدىڭ اجىراماس بولىگىنە اينالدى. وسىنداي كەزدە داعدارىستار تەك سىناق قانا ەمەس, سونىمەن قاتار دامۋ, سەنىمدى نىعايتۋ جانە اشىقتىقتى ارتتىرۋ مۇمكىندىگىنە اينالادى», دەدى نارحوز ۋنيۆەرسيتەتىنىڭ باسقارما توراعاسى قانات قوجاحمەت.
سەمينار بارىسىندا بيزنەس-جۋرناليستيكا, ىسكەرلىك كوممۋنيكاتسيالار مەن مەديا سالاسىنىڭ جەتەكشى ماماندارى انتيكريزيستىك باسقارۋ بويىنشا ءوز تاجىريبەلەرىمەن ءبولىسىپ, ورتاق ستراتەگيالاردى تالقىلادى.
سەميناردىڭ ءبىرىنشى مودۋلىندە قاتىسۋشىلارعا داعدارىسقا قارسى كوممۋنيكاتسيالىق ستراتەگيالاردى ازىرلەۋگە قاتىستى پرەزەنتاتسيالار ۇسىنىلدى, سونداي-اق قالىپتاسقان جاعدايعا تەز جانە ءتيىمدى ارەكەت ەتۋ ءۇشىن ءىس-قيمىل جوسپارىن دايىنداۋ بويىنشا پراكتيكالىق كەڭەستەر بەرىلدى.
مادەنيەت جانە اقپارات مينيسترلىگىنىڭ باق سالاسىنداعى مەملەكەتتىك ساياسات دەپارتامەنتىنىڭ ديرەكتورى قاينار احەتوۆ جۋرناليستەرمەن سىندارلى قارىم-قاتىناس ورناتۋ قوعامنىڭ سەنىمى مەن مەملەكەتتىك جۇيەنىڭ تۇراقتىلىعىنا ىقپال ەتەتىنىن ايتتى. وسى ورايدا مەملەكەتتىك جانە جەرگىلىكتى اتقارۋشى ورگانداردىڭ ءباسپاسوز حاتشىلارىنا ۇلكەن جاۋاپكەرشىلىك جۇكتەلەدى.
«2017 جىلدان باستاپ مەملەكەتتىك ورگاننىڭ ءبىرىنشى باسشىسىنا تىكەلەي باعىناتىن باق-پەن ءوزارا ءىس-قيمىل جونىندەگى ۋاكىلەتتى تۇلعانىڭ مارتەبەسى بەلگىلەندى. بۇل مەملەكەتتىك ورگانداردان اقپارات الۋدىڭ ساپاسى مەن تيىمدىلىگىنە اسەر ەتتى. بۇل رەتتە ءباسپاسوز حاتشىلارى مەن ءباسپاسوز قىزمەتى باسشىلارىنىڭ مارتەبەسى كوتەرىلدى. ءباسپاسوز قىزمەتتەرىنىڭ قىزمەتىن رەتتەيتىن بىرقاتار قۇجاتتار قابىلدانىپ, ولاردىڭ ماقساتتارى مەن مىندەتتەرى ايقىندالدى. بۇقارالىق اقپارات قۇرالدارىمەن ءوزارا ءىس-قيمىل جانە رەسمي حابارلامالار بەرۋ ەرەجەلەرى قابىلداندى. ءاربىر مينيسترلىك پەن اگەنتتىكتىڭ باق-پەن ءوزارا ارەكەتتەسۋىندە, كوممۋنيكاتسيا ستراتەگيالارىن باق-تىڭ ءارتۇرلى تۇرلەرىنە بەيىمدەۋدە وزىندىك ەرەكشەلىكتەرى بار. قارقىندى دامىپ جاتقان مەديا-ورتادا ءبىز مەملەكەتتىك ورگاندار مەن باق اراسىنداعى بايلانىستى جاقسارتۋعا ءتيىسپىز», دەپ ءتۇسىندىردى دەپارتامەنت وكىلى.
بۇۇ جاھاندىق كوممۋنيكاتسيالار دەپارتامەنتىنىڭ قازاقستانداعى وكىلى جانە بۇۇ اقپاراتتىق بيۋروسىنىڭ باسشىسى ۆلاستيميل سامەك ءوز سوزىندە الەمدە كوپتەگەن قاقتىعىستار بولىپ جاتقانىنا توقتالدى.
ء«بىز تاراتاتىن اقپارات ونى الاتىن ادامداردىڭ بولاشاق تاعدىرىنا اسەر ەتەتىن كۇردەلى الەمدە ءومىر ءسۇرىپ جاتىرمىز. ماسەلەن ازاماتتاردىڭ, ايەلدەردىڭ, بالالاردىڭ قۇقىقتارى, كوشى-قون ماسەلەلەرى, ەكولوگيا, كليماتتىڭ وزگەرۋى ت.ب. بۇقارالىق اقپارات قۇرالدارىندا بۇل پروبلەمالىق تاقىرىپتاردىڭ بارلىعى ءارتۇرلى تۇسىندىرىلەدى جانە ءبىز ولارعا دۇرىس جاۋاپ بەرە ءبىلۋىمىز كەرەك. ەجەلگى قىتايدىڭ اسكەري تەورەتيگى سۋن تسزىنىڭ «سوعىس ونەرى» اتتى قىزىقتى كىتابى بار. مەنىڭ ويىمشا «اقپارات ونەرى» دەگەن جاڭا ەسسە جازۋدىڭ ۋاقىتى كەلگەن سياقتى», دەدى ول
قازاقستاندىق PR كاسىبي كلۋبىنىڭ قۇرمەتتى مۇشەسى لاۋرا بارىسوۆا داعدارىس, داعدارىسقا دەيىنگى جانە داعدارىستان كەيىنگى كوممۋنيكاتسيالار تۋرالى بايانداما جاساي وتىرىپ, سەمينارعا قاتىسۋشىلاردىڭ نازارىن مەملەكەتتىك ورگاندار مەن باق-عى اقپاراتتارعا اۋداردى. ەقىۇ-نىڭ كوممۋنيكاتسيالار جونىندەگى ۇلتتىق كەڭەسشىسى ايبار ولجاي تسيفرلىق بەدەل, ونى باسقارۋ جانە جەتىلدىرۋ تۋرالى ايتتى.
ساياسي عىلىمدار دوكتورى, پروفەسسور گۇلميرا سۇلتانباەۆا «جوعارى ءبىلىم سالاسىنداعى داعدارىس كوممۋنيكاتسياسى: ءباسپاسوز قىزمەتى جانە باق» اتتى بايانداما جاسادى. ول قازاقستانعا نەعۇرلىم تاۋەلسىز جانە اشىق ءبىلىم كەڭىستىگىن قۇرۋعا مۇمكىندىك بەرەتىن قۇرىلىمدىق رەفورمالار جۇرگىزۋ قاجەت ەكەنىن اتاپ ءوتتى.
«بىزگە جوعارى بىلىمگە ينۆەستيتسيا تارتۋ, تاۋەلسىز زەرتتەۋلەردى قولداۋ جانە ۋنيۆەرسيتەتتەر مەن قوعام اراسىنداعى ديالوگتى دامىتۋ قاجەت», دەدى پروفەسسور.
ىسكەرلىك جۋرناليستيكا, ىسكەرلىك كوممۋنيكاتسيالار جانە باق سالاسىنداعى جەتەكشى ساراپشىلارمەن پىكىر الماسۋدى قامتىعان سەمينار قاتىسۋشىلارعا جالپى قاتەلىكتەردى بولدىرماۋ جانە تابىستى ءوزارا ارەكەتتەسۋ ستراتەگيالارىن ازىرلەۋ ماقساتىندا كوممۋنيكاتسيالاردى داعدارىستى باسقارۋ بويىنشا پراكتيكالىق بىلىمدەر مەن ۇسىنىستار الۋعا مۇمكىندىك بەردى.