جاڭاوزەن قالاسى تۇرعىندارىن جۇمىسپەن قامتۋ ءۇشىن جۇمىس ورىندارىن اشۋ ماڭىزدى. سورعى-كومپرەسسورلىق قۇبىرلار مەن سورعى شتانگالارىن وندىرەتىن زاۋىتتى جاڭاوزەننەن سالۋ ءبىر جاعى جۇمىسسىزدىق ماسەلەسىن ەڭسەرۋگە سەپ بولسا, ەكىنشىدەن مۇنايلى قالاداعى وندىرىسكە قاجەتتى جابدىقتاردى الىستان اربالاماي, ءوز قالاسى اۋماعىنان الدىرۋعا مۇمكىندىك بەرەدى.
زاۋىت قۇرىلىسى جاۋاپكەرشىلىگى, ياعني تاپسىرىس بەرۋشى مىندەتى «قاسكور ينجينيرينگ» جشس قۇزىرىندا. بۇل قۇرىلىم مۇناي-گاز كاسىپورىندارىنىڭ قاجەتتىلىكتەرىنە ارناپ مۇناي كاسىپشىلىگى مەن حيميالىق جابدىقتاردىڭ تۇتاس جەلىسىن شىعارادى. ماڭعىستاۋ وبلىسىنىڭ جەتەكشى ماشينا جاساۋ كاسىپورىندارىنىڭ ءبىرى رەتىندە تانىمال. كومپانيا وقشاۋلاۋ باعدارلاماسى اياسىندا 2023 جىلى سورعى-كومپرەسسورلىق قۇبىرلار مەن سورعى شتانگالارى ءوندىرىسىن جاڭاوزەن قالاسىندا زاۋىت سالىپ, كوشىرۋگە شەشىم قابىلداعان. 34 جىل ءوتىلى بار, ونىڭ ىشىندە سورعى شتانگالارىن وندىرۋدە 2 جىل, پەش دايىنداۋدا 16 جىل جانە سورعى-كومپرەسسورلىق قۇبىرلار وندىرۋدە 9 جىل تاجىريبەسى بار كومپانيا جاڭا زاۋىتقا 17,3 ملرد تەڭگە ينۆەستيتسيا تارتىپ وتىر. زاۋىتقا 300-گە جۋىق قالا تۇرعىنىن تارتۋ جوسپارلانعان.
قازىر مۇنايلى قالاداعى №1 وندىرىستىك ايماقتا جالپى اۋدانى 12 گەكتار قۇرىلىس اۋماعىندا زاۋىت قۇرىلىسى باستالعان. قۇرىلىسقا قاجەتتى بارلىق ينفراقۇرىلىمدىق جابدىقتاۋ مەن جەتكىزۋلەردىڭ دەر كەزىندە جۇزەگە اسىرىلۋى ناتيجەسىندە باس مەردىگەر «م-سترويترانس» جشس كومپانياسىنىڭ جۇمىسشىلارى باقىلاپ-وتكىزۋ پۋنكتى, اسحانا, 150 ورىندىق جاتاقحانا, تۇرمىستىق قىزمەت كورسەتۋگە ارنالعان مودۋلدىك عيماراتتارىن مونتاجداپ, زاۋىت باعانالارىن تولىقتاي تۇرعىزىپ ۇلگەرىپتى.
«زاۋىت قۇرىلىسىنىڭ دايىندىق جۇمىسى, ينفراقۇرىلىم جەتكىزۋ بيىل ءساۋىر ايىندا باستالدى. قۇرىلىس اۋماعىندا قازىر «ASM», «وتان-ينجينيرينگ» اتتى ەكى كومپانيا مەردىگەرلىك جۇمىس جۇرگىزىپ جاتىر. جۇمىستى جوسپارلانعان مەرزىمدە اياقتاۋ مىندەتىمىز, سول سەبەپتى باقىلاپ-وتكىزۋ پۋنكتى, اسحانا, جاتاقحانا, تۇرمىستىق قىزمەت كورسەتۋگە ارنالعان مودۋلدىك عيماراتتارىن بيىل قىركۇيەك ايىنىڭ سوڭىنا تامان اياقتايمىز دەپ وتىرمىز. ول نىسانداردىڭ قۇرىلىس ماتەريالدارى تولىقتاي كەلىپ, دايىن تۇر», دەيدى «م-سترويترانس» جشس كومپانياسىنىڭ ۋچاسكە باسشىسى جەڭىس تۋكاەۆ.
قۇرىلىس الاڭىندا الىپ تەحنيكالىق كولىكتەر ىڭىرسي قوزعالىپ, اۋىر تەمىر قوندىرعىلاردى تىكتەپ تۇرعىزىپ جاتىر. ءبىر كۇندە ءبىر بريگادا 10 تەمىر باعانانى تۇرعىزىپ ۇلگەرەدى ەكەن. ال جوسپارلانعان ءتورت بريگادا جيناقتالىپ, تولىق ىسكە كىرىسكەن كەزدە جۇمىستىڭ قارقىن الا تۇسەرى انىق. ماڭعىستاۋدىڭ جەلى مەن شاڭى قۇرىلىس الاڭىنىڭ استان-كەستەنىن شىعارىپ الاسۇرىپ-اق جاتىر, بىراق قۇرىش بىلەكتى قۇرىلىسشى جىگىتتەر الاڭدا ءارى اۋىر جۇمىسپەن, ءارى جەل-شاڭمەن جاعالاسىپ قىزۋ ەڭبەككە كىرىسكەن.
ماڭعىستاۋ وبلىسى