قاراعاندى وبلىسىنداعى دالا ءورتىن ءسوندىرۋ جۇمىستارى جالعاسىپ جاتىر

مينيسترلىكتىڭ ايتۋىنشا, قازىرگى ۋاقىتتاعى وبلىستاعى ايىر, شوپتىكول, قىزىلشىلىك, اتانتاي, تەرەكتى  ەلدى مەكەندەرىنە ءورت قاۋىپى ءتونىپ تۇرعان جوق.

ال توتەنشە جاعدايلار ۆيتسە-ءمينيسترى ەرلان نۇرپەيىسوۆ قازىر قاراعاندى وبلىسىندا ءجۇر. دالالىق ءورت ءسوندىرۋ شتابتارى جۇمىسىن جالعاستىرىپ جاتىر.

« اشىق اۋماقتا الدىن الا اقپارات بويىنشا اۋدانى 35 مىڭ گەكتار جەردەگى قۇرعاق ءشوپ وتقا وراندى. قاتتى ەكپىندى جەل, تاۋلى جەرلەر جانە ءورت وشاقتارىنا كىرمە جولداردىڭ بولماۋى ءورتتى ءسوندىرۋ جۇمىستارىن قيىنداتىپ تۇر. ءورتتى سوندىرۋگە قاراعاندى وبلىسى تجد جانە جەرگىلىكتى اتقارۋشى ورگاندارىنىڭ كۇشتەرى مەن قۇرالدارىنان 386 ادام, 64 بىرلىك تەحنيكا, قر تجم مەن قورعانىس مينيسترلىگىنىڭ اۋە كەمەلەرى جۇمىلدىرىلدى. ولار 4 جاۋىنگەرلىك ۋچاسكەگە ءبولىنىپ, ءورتتى سوندىرۋگە جۇمىستانىپ جاتىر», دەلىنگەن ۆەدومستۆو حابارلاماسىندا. 

بۇگىن 18:30-داعى جاعداي بويىنشا اۋە كەمەلەرى ءورت وشاقتارىنا 30 رەت 50-دەن استام توننا كولەمىندە سۋ توككەن.

ۇلتتىق ۇلان, كۋۆسكي ورمانشىلىعىنان, جەرگىلىكتى اتقارۋشى ورگانداردان, قاراعاندى جانە اقمولا وبلىستارى تجد, قر تجم 52859 اسكەري بولىمىنەن قوسىمشا كۇشتەر مەن قۇرالدار جىبەرىلگەن. قارقارالى اۋدانىندا 2 بىرلىك جىلجىمالى تاماقتانۋ پۋنكتى جاساقتالىپ, ازىق-ت ۇلىك جانە وزگە دە كەرەك- جاراق قامتاماسىز ەتىلگەن.

قاراعاندى وبلىسى تجد 8 721 2 51 72 23 جەدەل جەلى تەلەفونى جۇمىس ىستەپ تۇر.

ايتا كەتەيىك, قاراعاندى جانە پاۆلودار وبلىستارىنىڭ شەكارا اۋماعىنداعى ءورتتىڭ جالپى اۋدانى 45 مىڭ گا قۇرادى.

بۇعان دەيىن توتەنشە جاعدايلار مينيسترلىگى پاۆلودار وبلىسىنداعى دالا ءورتى الدىن الا 10 مىڭ گا القاپتا وقشاۋلانعانىن حابارلاعان ەدى.