قوستاناي. 28 قاڭتار. ل.تولستوي اتىنداعى قوستاناي وبلىستىق امبەباپ كىتاپحاناسىندا ءىلياس ەسەنبەرلينىڭ تۋعانىنا 100 جىل تولۋىنا ارنالعان «ەلىنىڭ ەرتەڭى ءۇشىن ەڭبەك ەتكەن ەسەنبەرلين» اتتى ەسكە الۋ كەشى ءوتتى. وندا جينالعان جۇرتشىلىق ەسەنبەرليننىڭ اتباسارداعى مۋزەيىنەن اكەلگەن, جازۋشىنىڭ كوزىندەي كورىنەتىن ول تۇتىنعان زاتتاردى تاماشالادى. بۇل تۋرالى egemen.kz ءتىلشىسى حابارلادى.
ءىلياس ەسەنبەرليننىڭ 100 جىلدىعىن 2015 جىلى يۋنەسكو اياسىندا اتاپ ءوتۋ تۋرالى شەشىم قابىلدانعان بولاتىن. بۇل ەسىم قازاق ادەبيەتى مەن مادەنيەتى الىپتارىنىڭ قاتارىنان ويىپ ورىن الادى. ونىڭ شىعارمالارى ەلىمىزدىڭ ۇلتتىق يگىلىك بولىپ تابىلادى.
ءى.ەسەنبەرلين جيىرماسىنشى جۇزجىلدىقتا ەل باسىنا تۇسكەن قارالى كۇندەردىڭ تاريحي شىندىعىن كەلەر ۇرپاققا جەتكىزە بىلگەن قازاق حالقىنىڭ كەمەڭگەر پەرزەنتتەرىنىڭ ءبىرى. كىتاپحاناداعى بۇل شارا ءى.ەسەنبەرليننىڭ شىعارمالارىن ەل ىشىندە كەڭىنەن ناسيحاتتاۋ, جازۋشىنىڭ ءومىرى مەن شىعارماشىلىعى جايىندا جۇرتشىلىق بىلە ءتۇسسىن دەگەن ماقساتپەن ۇيىمداستىرىلدى. كىتاپحانا قىزمەتكەرى ەلۆيرا ساپابەكوۆا: «جازۋشىنىڭ شىعارمالارى جاس ۇرپاقتى وتانسۇيگىشتىككە, ەلدىڭ تاريحىن قۇرمەتتەي بىلۋگە تاربيەلەيدى. ونىڭ تاريحى روماندارى قازاق تاريحى جونىندە وتە مول ماعلۇماتتار بەرەدى. ول وسىنىسىمەن دە قىمبات», دەدى.
كەشكە ءى.ەسەنبەرليننىڭ اتباسار قالاسىنداعى ادەبي-مەموريالدىق مۋزەيىنىڭ عىلىمي قىزمەتكەرى ءۇمىتجان بەكەنوۆا, مۋزەيدىڭ قور ساقتاۋشىسى قۇرالاي جاقىپوۆا جازۋشىنىڭ تۇتىنعان زاتتارىن, قۇندى جادىگەرلەردى كورسەتتى. كەشكە قوستاناي قالاسىنداعى جوعارى وقۋ ورىندارىنىڭ, ورتا مەكتەپتەردىڭ وقىتۋشىلارى, ستۋدەنتتەر, جالپى جۇرتشىلىق وكىلدەرى, كىتاپحانا وقىرماندارى قاتىستى.
كەش سوڭىندا قوناقتارعا «كوشپەندىلەر» كوركەم ءفيلمى كورسەتىلدى.
شاراعا ارنالىپ ۇيىمداستىرىلعان كىتاپ كورمەسىنە ءىلياس ەسەنبەرلين مۇراجايىنان اكەلىنگەن ەكسپوناتتار قويىلدى. كەش بارىسىندا جينالعانداردىڭ نازارىنا ەلەكتروندى كورسەتىلىمدەر ۇسىنىلدى.
ءنازيرا جارىمبەتوۆا.
دەرەك, سۋرەت: egemen.kz.