الماتى وبلىسىندا پوليتسەيلەر اشىق كارىز قۇدىعىنا ءتۇسىپ, قىسىلىپ قالعان جىلقىنى قۇتقاردى, دەپ حابارلايدى Egemen.kz.
5 قازانعا قاراعان ءتۇنى, وبلىس ورتالىعىنىڭ جەكە تۇرعىن ءۇي سەكتورلارىنىڭ ءبىرىن پاترۋلدەۋ كەزىندە "بۇركىت-253" پپۆ پوليتسەيلەرى اشىق تۇرعان كارىز قۇدىعىنا قۇلاپ قالعان جىلقىنى بايقاپ قالدى. جاعدايدىڭ كۇردەلىلىگىن باعالاي وتىرىپ, پوليتسەيلەر جاقىن ماڭداعى پاترۋلدىك جاساقتى كومەككە شاقىردى.
- قۇتقارۋ وپەراتسياسى وڭاي بولعان جوق: جانۋاردىڭ سالماعى مەن كولەمى جۇمىستى ايتارلىقتاي قيىنداتتى. الايدا, ەرنار وماروۆ پەن ايبەك تۇرسىنوۆتىڭ قۇرامىنداعى "بۇركىت-253" پپۆ, سونداي-اق دارحان ەسىمحانوۆ پەن سەرىك ورداباەۆتىڭ قۇرامىنداعى "بۇركىت-261" پاترۋلدىك پوليتسيا ۆزۆود ءىس-قيمىلدارىنىڭ ارقاسىندا جىلقى امان-ەسەن قۇدىقتان شىعارىلدى. بارلىق جۇمىستار جانۋارعا زيان كەلتىرمەۋ ءۇشىن اسا مۇقيات ورىندالدى. بۇل وقيعا پوليتسەيلەردىڭ ارقاشان كۇردەلى جاعدايلارعا دايىن ەكەنىن جانە قيىندىقتاردان قورىقپايتىنىن دالەلدەدى, - دەپ جازدى الماتى وبلىسى پد باستىعى باۋىرجان الەنوۆ Instagram-داعى پاراقشاسىندا.