سولتۇستىك قازاقستان تاريحي-ولكەتانۋ مۋزەيىنىڭ 100 جىلدىعى جانە «وتىرار» مەملەكەتتىك ارحەولوگيالىق مۋزەي-قورىعى» رمقك-ءنىڭ 45 جىلدىعىنا وراي قىزىلجار قالاسىندا «وتىرار عاسىرلار توعىسىندا» تاقىرىبىندا كوشپەلى كورمە اشىلدى, دەپ حابارلايدى Egemen.kz.
«وتىرار عاسىرلار توعىسىندا» كورمەسى كورەرمەندەرگە عاسىرلار بويى ۇلى جىبەك جولىنداعى ماڭىزدى ساۋدا جانە مادەني ورتالىق بولعان وتىرار ولكەسىنىڭ باي تاريحى مەن مادەنيەتى تۋرالى كوبىرەك بىلۋگە بىرەگەي مۇمكىندىك بەرەدى. كورمەدە وتىرار القابىنداعى حالىقتىڭ بايىرعى تۇرمىس-تىرشىلىگى, سالت-ءداستۇرى مەن نانىم-سەنىمىمەن سىر شەرتەتىن ارحەولوگيالىق جادىگەرلەر قويىلعان.
كەلۋشىلەر تەك ەكسپوناتتارمەن عانا ەمەس, ءوڭىردىڭ تاريحىن جانە الەمدىك مادەنيەتتە الاتىن ايرىقشا ورنىن, ماڭىزىن تەرەڭىرەك تۇسىنۋگە كومەكتەسەتىن ءبىرشاما قۇجاتتارمەن, فوتوماتەريالدارمەن جانە تاريحي-مادەني مۇرالارمەن, ساۋلەت, ءبىلىم, ونەر سالاسىنداعى جەتىستىكتەرىمەن, جالپى ايتقاندا ورتاعاسىرلىق قالانىڭ تاريحىمەن تانىستى.
كورمە 4 قاراشاعا دەيىن وتەدى.