*يسپانيا اۋماعىنداعى ناتو اسكەري بازاسىندا گرەكتىڭ جويعىش ۇشاعى اپاتقا ۇشىرادى. ۇشاق اۋەگە كوتەرىلە بەرە انگاردىڭ ۇستىنە قۇلاپ, جارىلعان. وقيعا سالدارىنان يسپانياعا بىلىكتىلىكتەرىن جەتىلدىرۋگە كەلگەن 8 فرانتسيالىق اسكەري ۇشقىش پەن 2 گرەكيالىق اسكەري ۇشقىش قازا تاپتى. تاعى 13 ادام ءتۇرلى دەڭگەيدە دەنە جاراقاتىن الدى.
* كۇرد كوتەرىلىسشىلەرىنىڭ كۇشتەرى سيريانىڭ اين ءال-اراب (كوباني) قالاسىن تولىقتاي ءوز باقىلاۋىنا الدى. قالا تۇرىك شەكاراسىنا جاقىن ماڭدا ورنالاسقان. قالانى «يسلام مەملەكەتى» قارۋلى جاساقتارىنان تازارتۋعا ءبىرنەشە ايعا سوزىلعان ۇرىس قيمىلدارىنان كەيىن قول جەتىپ وتىر. اقش-تىڭ اسكەري-اۋە كۇشتەرى سيريالىق كۇردتەرگە اۋەدەن قولداۋ كورسەتكەن.
* پاكىستاننىڭ ارنايى قىزمەتتەرى تەرروريزمگە قاتىسى بار دەگەن كۇدىكپەن كەم دەگەندە 9 مىڭ ادامدى تۇتقىنداعان. قاماۋعا الىنعانداردىڭ اراسىندا 3 مىڭنان استام مولدا مەن مەدرەسە مۇعالىمدەرى, سونداي-اق, 3,5 مىڭداي اۋعاندىق بوسقىن بار. ۇستالعانداردىڭ ەڭ كوبى, ياعني 6702 ادام نەگىزىنەن پۋشتۋندار تۇراتىن حايبەر-پاحتۋنحۆا پروۆينتسياسىنىڭ ۇلەسىنە تيەدى.
* 2011 جىلدىڭ قاڭتارىندا جاپپاي نارازىلىق شەرۋلەرى بارىسىندا تاعىنان تايدىرىلعان مىسىر پرەزيدەنتى حوسني مۇباراكتىڭ ەكى ۇلى تۇرمەدەن شىعارىلدى. «اسسوشەيتەد پرەسس» اگەنتتىگىنىڭ حابارلاۋىنا قاراعاندا, اليا مەن گامال قاماۋدان بوساتىلعاننان كەيىن ەل استاناسى – كاير قالاسىنىڭ وڭتۇستىگىندە ورنالاسقان ءوز ۇيلەرىنە جول تارتىپتى.
* كۋبا رەۆوليۋتسياسىنىڭ كوسەمى فيدەل كاسترو العاش رەت اقش پەن كۋبا اراسىندا ديپلوماتيالىق قارىم-قاتىناس قايتا ورناۋىنا بايلانىستى تۇسىنىك بەردى. «رەيتەر» اگەنتتىگىنىڭ حابارلاۋىنشا, ول اقش پرەزيدەنتى باراك وباما مەن قازىرگى كۋبا باسشىسى راۋل كاسترو باستاعان جاقىنداسۋ تۋرالى قادامداردى قۇپتايتىنىن ءبىلدىرىپتى. بىراق اقش ساياساتىنا سەنبەيتىنىن دە اشىق ايتقان.
* رەسەي تاجىكستانداعى اسكەري بازاسىن كۇشەيتۋ نيەتىندە. مۇنداي شەشىمگە تاراپتار رەسەي قورعانىس ءمينيسترىنىڭ ورىنباسارى اناتولي انتونوۆتىڭ دۋشانبەگە ساپارى بارىسىندا كەلسە كەرەك. انتونوۆتىڭ سوزىنە قاراعاندا, تاجىكستان قارۋلى كۇشتەرىن نىعايتۋ ارقىلى رەسەي ءوزىنىڭ قاۋىپسىزدىگىن دە نىعايتا تۇسەدى.
* ارگەنتينا پرەزيدەنتى كريستينا فەرناندەس دە كيرشنەر ەلدىڭ بارلاۋ ۆەدومستۆوسىن تاراتۋ تۋرالى جوسپارى بار ەكەنىن جاريا ەتتى. ونىڭ پىكىرىنشە, اتالعان ۆەدومستۆو جەمقورلىقتىڭ وشاعىنا اينالعان. پروكۋرور البەرتو نيسماننىڭ قازاسى سىرتىندا دا اگەنتتىكتىڭ جەمقورلىققا سالىنعان قىزمەتكەرلەرى تۇرۋى ىقتيمال.
* امەريكالىق ميللياردەر دونالد ترامپ رەسپۋبليكاشىلار تاراپىنان پرەزيدەنتتىك سايلاۋعا قايتا تۇسۋگە ۋادە بەرىپ وتىر. مەن بۇل لاۋازىمدى اتقارا الاتىنىما تولىق سەنىمدىمىن, دەيدى ول. ترامپتىڭ پىكىرىنشە, رەسپۋبليكاشىلار قاتارىنان باسقا لايىقتى ۇمىتكەر كوزگە كورىنىپ تۇرعان جوق. ترامپ 2008 جانە 2012 جىلدارعى پرەزيدەنتتىك سايلاۋعا تۇسەمىن دەپ الىپ, ارتىنان تايقىپ شىققان ەدى.
اقپارات اگەنتتىكتەرىنىڭ ماتەريالدارى نەگىزىندە ازىرلەندى.