جەزقازعان-قىزىلوردا اۆتوكولىك جولىنا كۇردەلى جوندەۋ باستالاتىنى تۋرالى حابار جاريا ەتىلسە دە, كوپشىلىك اراسىندا «سونىڭ سوڭى قالاي بولار ەكەن؟ سوزبۇيداعا سالىنىپ كەتپەي مە؟» دەگەن سەكىلدى ۇمىتتەن گورى كۇدىككە تولى اڭگىمە ءالى كۇنگە دەيىن ايتىلىپ قالادى. قانشاما جىلدان بەرى «جول جوندەۋ ءانى-مىنە باستالادى» دەگەن سۇيىنشىلەگەن ءسوزدىڭ سوڭى قۇردىمعا كەتىپ, جوعالىپ تىنعانىنا تالاي مارتە كۋا بولعان كوڭىلدەردىڭ الاڭىن, ارينە, تۇسىنۋگە بولادى. بىراق بۇل جولعى قامدانىس بۇرىنعىدان وزگەرەك.
ويتكەنى جەزقازعان – قىزىلوردا جولىنىڭ 208 شاقىرىمىنا قاتىستى 8 لوت نەگىزىندە جاريالانعان تەندەردى قىتايدىڭ 4 كومپانياسى جەڭىپ الدى. ولاردىڭ ءبارى دە ۇلىتاۋ وبلىسىنا كەلىپ تىركەۋدەن ءوتتى. قازىر جەڭىمپاز كومپانيالار كۇردەلى قۇرىلىس جۇرگىزۋگە دايىندىق جۇمىستارىن باستاپ تا كەتتى. بۇعان جۋىردا كوزىمىز جەتتى.
نەگىزگى جولعا جاپسارلاسا اينالما جول سالۋ قازىردىڭ وزىندە باستالىپ جاتىر. سونداي-اق كەلەشەكتە بوي كوتەرەتىن 8 ۆاحتالىق قالاشىقتىڭ دا ورنى انىقتالىپ, تەگىستەلۋدە. قالاشىقتاردا جۇمىسكەرلەرگە قاجەتتى جاتىن بولمەلەر, جۋىنۋ, اسحانا, ت.ب. وسى ءتارىزدى بارلىق جاعداي جاسالادى.
ال ساعاتىنا 160 توننا ءونىم بەرەتىن اسفالت-بەتون زاۋىتى بۇرىننان جۇمىس ىستەپ تۇر ەكەن. بۇل زاۋىتتىڭ ءونىمى قازىر قىزىلوردا جاعىندا سالىنىپ جاتقان جولدىڭ قاجەتىنە پايدالانىلىپ جاتسا, كەيىن جەزقازعان جاعىنداعى جولدى اسفالت-بەتونمەن قامتاماسىز ەتەدى. ال الداعى ۋاقىتتا تاعى دا وسىنداي 3 زاۋىت سالىناتىن بولادى.
ء«بىز جۇمىستى 8 ۋچاسكەدە ءبىر مەزگىلدە باستايمىز. سوندىقتان بيىلعى كۇز, قىس مەزگىلىندە بارلىق نەگىزگى جۇمىسقا قاجەتتى شارۋالاردى رەتتەپ العىمىز كەلەدى», دەيدى قىتايلىق كومپانيانىڭ وكىلى تسيان سياۋ دون.
«ۋاقىتتى بوسقا جىبەرمەي قازىر اينالما جول, قالاشىقتار, اسفالت-بەتون زاۋىتتارىن سالىپ الساق, كەلەر كوكتەمدە جۇمىستى باستاۋ وزىمىزگە جەڭىل بولادى. سوندىقتان ىسكە كىرىسىپ جاتىرمىز. ەگەر ماتەريالدىق بازامىز مىقتى بولسا, جوندەۋ جۇمىسىن كوپكە سوزبايمىز, 2026 جىلدىڭ سوڭىنا دەيىن بىتىرەمىز», دەيدى تاعى ءبىر مەردىگەر سونگ داي فۋ.
ارينە, جول قۇرىلىسىنا نەگىزىنەن جەرگىلىكتى ازاماتتار تارتىلاتىنى انىق. سونداي-اق جەرگىلىكتى كومپانيالار سەرۆيستىك قىزمەت كورسەتۋگە دايىن. قازىر ولار قىتايلىق ارىپتەستەرىمەن ەكىجاقتى كەلىسىمشارت جاساسىپ جاتىر.
«قازاۆتوجول» ۇك» اق ۇلىتاۋ وبلىسى فيليالىنىڭ ديرەكتورى سۇڭعات راحىمجانوۆ: «بۇل جولدىڭ قۇرىلىسىن ايماق حالقى كوپتەن كۇتىپ جۇرگەنى بەلگىلى. مىنە, ەندى دايىندىق جۇمىسى باستالىپ جاتىر. مەردىگەرلەر تاراپىنان قۇرىلىسقا ەكى مىڭعا تارتا جۇمىسكەر كەرەك ەكەنى ايتىلىپ وتىر. بۇل وسىنشاما جۇمىس ورنى اشىلاتىنىن ايعاقتايدى. دەمەك, ءبىزدىڭ ازاماتتارىمىزدىڭ جول قۇرىلىسىنا اتسالىسۋعا تولىق مۇمكىندىگى بار», – دەدى.
جالپى قۇنى 108 ملرد تەڭگە بولاتىن جوبانىڭ قۇرىلىسى ايماققا جاڭا لەپ الىپ كەلىپ جاتىر. ۇلىتاۋلىقتاردىڭ سول قۇرىلىستىڭ بەلورتاسىنان تابىلاتىنىنا ارينە, ەش كۇمان جوق.
ۇلىتاۋ وبلىسى