رەسەي 2026 جىلعى 1 ماۋسىمنان باستاپ ەۋرازيالىق ەكونوميكالىق وداق (ەاەو) ەلدەرىنەن اۆتوكولىك ارقىلى اكەلىنەتىن تاۋارلارعا قاتىستى جاڭا تسيفرلىق ءتارتىپتى ىسكە قوسپاق. بۇل وزگەرىس قازاقستاننىڭ ەكسپورتتىق جەتكىزىلىمدەرىنە دە اسەر ەتۋى مۇمكىن, دەپ حابارلايدى Egemen.kz.
جاڭا جۇيە يمپورتتىق تاۋارلاردى باقىلاۋدى كۇشەيتۋ جانە كولەڭكەلى ساۋدانى ازايتۋ ماقساتىندا ازىرلەنىپ وتىر.
جاڭا تارتىپكە سايكەس, سىرتقى ەكونوميكالىق قىزمەتكە قاتىسۋشىلار تاۋار جەتكىزىلىمى تۋرالى الدىن الا مالىمەت ۇسىنۋى ءتيىس. ولاردىڭ قاتارىندا: ساتۋشى مەن ساتىپ الۋشى دەرەكتەرى, تاۋار تۋرالى اقپارات, كولىك قۇرالىنىڭ مالىمەتى, جەتكىزۋ كۇنى جانە قامتاماسىز ەتۋ تولەمى تۋرالى دەرەكتەر بار.
رەسەي بيلىگى ءىرى كومپانيالاردان VPN قولدانۋشىلارىن شەكتەۋدى تالاپ ەتتى
جۇيە تەكسەرىستەن كەيىن ءاربىر جەتكىزىلىمگە ارنايى تسيفرلىق يدەنتيفيكاتور – QR-كود قالىپتاستىرادى. بۇل كود تاۋاردىڭ زاڭدى تۇردە تاسىمالداناتىنىن راستايدى.
رەسەي ۇكىمەتى بۇل باستاما نارىقتاعى اشىقتىقتى ارتتىرىپ, «كولەڭكەلى يمپورتتى» ازايتۋعا جانە تۇتىنۋشىلار قۇقىعىن قورعاۋعا باعىتتالعانىن مالىمدەدى.
رف فەدەرالدىق كەدەن قىزمەتى جاڭا ءتارتىپ اياسىندا شەكارادا ءموبيلدى باقىلاۋ توپتارى جۇمىس ىستەيتىنىن حابارلادى. ولار اۆتوكولىكتەردى ىرىكتەپ تەكسەرەتىن بولادى.
بيزنەس وكىلدەرى جاڭا جۇيەنى قولداعانىمەن, داۋلى جاعدايلاردى جەدەل شەشۋ تەتىكتەرىن جەڭىلدەتۋ قاجەتتىگىن اتاپ ءوتتى. سونداي-اق راسىمدەردى بارىنشا ىڭعايلى ەتۋ ماسەلەسى كوتەرىلدى.
رەسەيدەگى جاپپاي توبەلەستەن كەيىن قازاقستان ازاماتتارى قاماۋعا الىندى
زاڭنامالىق وزگەرىستەر رەسەي پارلامەنتىندە تولىق ماقۇلدانىپ, جۇيەنى ەنگىزۋدىڭ جول كارتاسى دايىندالىپ جاتىر. جاڭا جۇيەنىڭ تولىق ىسكە قوسىلۋى 2026 جىلدىڭ 1 ماۋسىمىنا جوسپارلانعان.