قوستاناي وبلىسىندا 8, 12 جانە 13 جاستاعى بالالار زورلاعان بەس جاسار قىزدىڭ اناسىنىڭ ۇستىنەن قىلمىستىق ءىس قوزعالماق. ايەلگە جەلىدە قىزىنا قاستاندىق جاساعاندار تۋرالى اقپاراتتى ايتقانى ءۇشىن ايىپ تاعىلدى, دەپ حابارلايدى Egemen.kz.
وقيعا تۋرالى قىزدىڭ اناسى “نە مولچي” قورىنا ايتىپ بەرگەن. دەرەكتەرگە سۇيەنسەك 6 شىلدە كۇنى اناسى 5 جاسار قىزىنا جاڭا ۆەلوسيپەد اكەلىپ قۋانتپاق بولعان. ويناپ جۇرگەن قىزىن ءبىراز ىزدەپ تابا الماعان. كەيىن قىزى البا-جۇلبا كيىممەن قولىندا ءبىر قاپ ويىنشىقتارمەن ءوزى ۇيگە قاراي كەلگەن.
- اناسى قاتتى قورققانىنان قىزىنا ۇرىسقان. قازىر سول ارەكەتىنە قاتتى وكىنەدى. سەبەبى ول كەزدە قىزدىڭ دا جاعدايى ناشار بولعان. ول ەشتەڭە ايتپاعان جانە تۇيىقتالىپ قالعان. كەيىن ءبىراز كۇننەن سوڭ عانا بولعان جايتتى اتاسىنا ايتىپ بەرگەن.
انىقتالعانداي ءۇش بالا ءبۇلدىرشىندى قامىس اراسىنا اكەتىپ ەكەۋى ۇستاپ تۇرىپ, قىزدىڭ جىنىس مۇشەلەرىن ۇستاعان. قارسىلاسىپ جىلاعاندا تاسپەن ۇرعان. ءۇش ۇل دا قىزعا زورلىق كورسەتكەن. كەيىن ەشكىمگە ايتپاۋى ءۇشىن ءبىر قاپ ويىنشىق بەرگەن, – دەلىنگەن جازبادا.
استانا ادۆوكاتتار القاسىنىڭ ادۆوكاتى يليا لۋنەۆ بۇل وقيعانىڭ كۇتپەگەن جالعاسى بولعانىن جازدى.
- 14 جاسقا دەيىنگى بالالار قىلمىستىق جاۋاپكەرشىلىككە تارتىلمايتىنى بەلگىلى, سايكەسىنشە قىلمىس جاساعاندار ەشقانداي جازاعا تارتىلمادى. مۇنى جاقسى تۇسىنسە دە تەرگەۋ ءالى دە شەكسىز ساراپتامالار جاساپ, جاۋاپ الۋدا. جابىرلەنۋشى قىزدىڭ جانىن ودان ءارى جارالاۋدا. ەندى بەس جاسار جابىرلەنۋشىنىڭ اناسىنىڭ ۇستىنەن چاتتاردىڭ بىرىندە ۇلداردىڭ ەسىمدەرىن اتاعانى ءۇشىن قىلمىستىق ءىس قوزعاعىسى كەلەدى, - دەپ جازدى زاڭگەر Instagram جەلىسىندە.
لۋنەۆ قىلمىستىق كودەكستىڭ 423-بابى "سوتقا دەيىنگى ءىس جۇرگىزۋ نەمەسە جابىق سوت تالقىلاۋى تۋرالى مالىمەتتەردى جاريا ەتۋ" تۋرالى ايتىپ وتىرعانىن ءتۇسىندىردى. قىزدىڭ اناسى ەكى جىلعا دەيىن باس بوستاندىعىنان ايىرىلۋى مۇمكىن.