بۋحارەست قالاسىندا قازاقستاننىڭ رۋمىنياداعى ەلشىسى داۋلەت باتىراشەۆ رۋمىنييانىڭ ساۋدا-ونەركاسىپ پالاتاسىنىڭ ء(سوپ) پرەزيدەنتى ميحاي دارابانمەن كەزدەستى. كەزدەسۋ بارىسىندا قازاقستان مەن رۋمىنيا ساۋدا-ەكونوميكالىق ىنتىماقتاستىعىنىڭ دامۋ مۇمكىندىكتەرى, سونىڭ ىشىندە ەكى ەل ساۋدا-ونەركاسىپ پالاتالارى باعىتى بويىنشا ىقپالداستىعى جايى تالقىلاندى.
تاراپتار قازاقستان مەن رۋمىنيانىڭ جانە جالپى ورتالىق ازيا مەن شىعىس ەۋروپا وڭىرلەرىنىڭ ەكونوميكالىق جاعدايى جونىندە پىكىر الماستى. تۋريزم, اۋىل شارۋاشىلىعى, قۇرىلىس, كولىكتىك-ترانزيت سالالارىندا ەكىجاقتى ەكونوميكالىق بايلانىستاردىڭ قولدا بار, بىراق تولىعىمەن جۇزەگە اسىرىلماعان مۇمكىندىكتەرىن, قازاقستان مەن رۋمىنيا اراسىنداعى سىرتقى ساۋدا كولەمىنىڭ ەلەۋلى ءوسۋىن اتاپ ءوتتى. وسى ورايدا, قازاقستاندىق ديپلومات م.داراباندى ەلىمىزدىڭ ەكونوميكالىق الەۋەتىن تولىق كورسەتەتىن پرەزيدەنت ن.ءا.نازارباەۆتىڭ «نۇرلى جول» جولداۋىنىڭ, «قازاقستان-2050» ستراتەگياسىنىڭ, 2015-2019 جىلدارعا ارنالعان يندۋستريالىق-يننوۆاتسيالىق دامۋ باعدارلاماسىنىڭ نەگىزگى قاعيدالارى جونىندە حاباردار ەتتى.
م.دارابان قازاقستان مەن رۋمىنيانىڭ ىسكەرلىك توپتارى اراسىنداعى ەكىجاقتى بايلانىستاردى نىعايتۋ مەن ارتتىرۋعا مۇددەلىلىگىن ءبىلدىردى. ونىڭ اقپاراتى بويىنشا, رۋمىنيا ءسوپ قۇرامىنا ەلدىڭ 630 مىڭعا جۋىق شاعىن جانە ورتا بيزنەستىڭ مۇشەلەرى كىرەدى. سونىمەن قاتار, ول قازاقستاننىڭ كونستانتسا تەڭىز پورتىنىڭ تەرمينالدارىن (جۇك, مۇناي جانە استىق) پايدالانۋ مۇمكىندىگىن قاراستىرۋدى ۇسىندى.
كەلىسسوزدەر قورىتىندىلارى بويىنشا, ەكى ەل كاسىپكەرلەرى اراسىندا تىكەلەي بايلانىستار ورناتۋ ماقساتىندا قازاقستاننىڭ سىرتقى ساۋدا پالاتاسىنىڭ باسقارما توراعاسى س.ەسىمبەكوۆتىڭ بۋحارەستكە ساپارى تۋرالى جانە قازاقستان مەن رۋمىنيا ىسكەر توپتارى بيزنەس-فورۋمىنىڭ وتكىزىلۋى جونىندە ۋاعدالاستىقتارعا قول جەتكىزىلدى.
كەزدەسۋگە, سونىمەن قاتار, قازاقستاننىڭ قۇرمەتتى كونسۋلى پەترۋ ليفيچيۋ مەن ءسوپ-ءتىڭ حالىقارالىق ماسەلەلەر جونىندەگى كەڭەسشىسى, ەلشى پەترۋ رۋسسۋ قاتىستى.
«ەگەمەن-اقپارات».