پەتروپاۆل. 15 ماۋسىم. دۇنيەجۇزىلىك دونور كۇنى وبلىستا قان تاپسىرۋشىلار قاتارى كوپ بولدى. بۇل تۋرالى egemen ءتىلشىسى حابارلادى.
قان قۇيۋ ورتالىعىنا العاشقىلاردىڭ قاتارىندا گۇلنارا زايتدينوۆا جەتتى. ول ادام ءومىرىنىڭ اراشاسى رەتىندە شيرەك عاسىرعا جۋىق بەلسەنە اتسالىسىپ كەلەدى.
«20 جاسىمدا العاش رەت قان تاپسىرىپ ەدىم. سودان بەرى وسى داستۇردەن قول ۇزگەن جوقپىن. وسىندا جىلىنا 3-4 رەت كەلەمىن. «قۇرمەتتى دونور» سانالامىن», دەيدى ول.
بۇل كۇنى وزدەرىنىڭ ازاماتتىق پارىزدارىنا ۇلكەن جاۋاپكەرشىلىكپەن قاراعان 5 ادامعا ارنايى سىيلىقتار ۇلەستىرىلدى. سولاردىڭ ءبىرى قالالىق ءماسليحاتتىڭ حاتشىسى ءلاززات جامۇقانوۆا دەپۋتاتتار, مەملەكەتتىك قىزمەتشىلەر, اسكەريلەر دە اكتسيانى بەلسەندى قولداۋشىلار بولىپ تابىلاتىنىن جەتكىزدى. وزگە قان تاپسىرۋشىلارعا دا سىي-كادەلەر جاسالدى.
وبلىستىق قان قۇيۋ ورتالىعى باس دارىگەرىنىڭ ورىنباسارى ناتاليا سولودۋحينانىڭ ايتۋىنشا, بىلتىر 7,5 مىڭ ليتر قان جينالسا, بيىل 10600 ليترگە جەتكىزۋ بەلگىلەنگەن.
العاشقى كۇنى 200 پەتروپاۆلدىق ەرىكتى تۇردە قان تاپسىردى. اكتسيا جالعاسۋدا.
ءومىر ەسقالي.
دەرەك, سۋرەت: egemen.kz