سەنات دەپۋتاتتارى نۇرلان بەكنازاروۆ, نۇرتورە ءجۇسىپ جانە ايگۇل قاپباروۆا «وڭتۇستىك» ارنايى ەكونوميكالىق ايماعىندا بولىپ, «ONTUSTIK» وڭىرلىك تەلەارناسىنىڭ, شىمكەنت قالاسىنداعى №11 اۋرۋحانانىڭ جانە «بال تەكستيل» جشس ۇجىمدارىمەن كەزدەستى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
كەزدەسۋگە قاتىسۋشىلار اتوم ەنەرگەتيكاسىن دامىتۋدىڭ كەلەشەگىن, ونىڭ الەۋەتىن جانە قازاقستاننىڭ ەنەرگەتيكالىق بولاشاعى مەن قاۋىپسىزدىگىنە قوسقان ەلەۋلى ۇلەسىن تالقىلادى.
سەناتورلار اتوم ەنەرگەتيكاسى اسىرەسە, ونەركاسىپتە جانە ەكونوميكالىق ءوسىپ-وركەندەۋ كەزىندە ەنەرگياعا ءوسىپ كەلە جاتقان سۇرانىستى قاناعاتتاندىرۋ بويىنشا اسا ماڭىزدى ەكەنىن ايتتى. نۇرلان بەكنازاروۆ ەكونوميكانىڭ تۇراقتى دامۋى جانە رەسۋرستىق ەكونوميكادان جوعارى تەحنولوگيالىق يندۋسترياعا كوشۋ ءۇشىن سەنىمدى بازالىق ەنەرگيا قاجەت ەكەنىن جەتكىزدى.
«قازىرگى زامانعى رەاكتورلاردىڭ نەگىزگى ەرەكشەلىگى – سىرتقى جانە ىشكى توتەنشە جاعدايلاردا قوندىرعىنىڭ تۇراقتىلىعىن جوعارى دەڭگەيدە قامتاماسىز ەتەتىن بەلسەندى جانە ءپاسسيۆتى قاۋىپسىزدىك جۇيەلەرىنىڭ ۇيلەسىم تاباتىنى. سونىمەن قاتار راديواكتيۆتى قالدىقتارمەن جۇمىس جونىندەگى قولدانىستاعى زاڭنامادا اتوم ەلەكتر ستانسالارى مەن باسقا دا سالالاردا, ونىڭ ىشىندە مەديتسينا, ونەركاسىپ جانە عىلىمي زەرتتەۋلەردە ولاردى قاۋىپسىز ساقتاۋعا قويىلاتىن تالاپتار ناقتى رەتتەلگەن», دەدى نۇرلان بەكنازاروۆ.
نۇرتورە ءجۇسىپ ءوز كەزەگىندە الداعى جالپىحالىقتىق رەفەرەندۋم مەملەكەت ءۇشىن عانا ەمەس, بۇكىل قازاقستان حالقى ءۇشىن سالماعى زور شەشىم قابىلداۋدىڭ شەشۋشى ءساتى بولاتىنىن اتاپ ءوتتى.
«الداعى رەفەرەندۋمنىڭ ناتيجەسى ەلىمىزدىڭ ودان ءارى دامۋىنىڭ كىلتى بولماق. اتوم ەلەكتر ستانساسىن سالۋ – ەلەكتر ەنەرگياسىنىڭ تۇراقتى كوزىمەن قامتاماسىز ەتۋدىڭ جولى عانا ەمەس, سونىمەن قاتار ساباقتاس سالالاردى: زاماناۋي تەحنولوگيانى, قۇرىلىس, عىلىم مەن ءبىلىم بەرۋدى دامىتۋدىڭ قۋاتتى كاتاليزاتورى. ونىڭ ەلىمىزگە ەنەرگيا تاپشىلىعى جاعدايىن جاقسارتۋعا جانە ەنەرگياعا تاۋەلدىلىكتى ازايتۋعا مۇمكىندىك بەرەتىنىن ءتۇسىنۋ ماڭىزدى. اتوم ەلەكتر ستانساسىنىڭ قۇرىلىسى وسى جولداعى ماڭىزدى قادامداردىڭ ءبىرى بولۋى ءتيىس», دەدى نۇرتورە ءجۇسىپ.