سەنات دەپۋتاتتارى سۇيىندىك الداشەۆ پەن بەكبول ورىنباساروۆ ماڭعىستاۋ وبلىسىندا مۇناي-گاز سالاسىنىڭ قىزمەتكەرلەرىمەن جانە مۇنايشىلارمەن كەزدەسۋ وتكىزدى, دەپ حابارلايدى Egemen.kz.
اتالعان كەزدەسۋدە ەلىمىزدەگى ەلەكتر قۋاتى تاپشىلىعىن الدىن الا بولدىرماۋدىڭ بىردەن-ءبىر ءتيىمدى جولى رەتىندە اەس سالۋ قاجەتتىگىنە ەرەكشە نازار اۋدارىلدى. جيىن بارىسىندا سەناتورلار اەس جوباسىن جۇزەگە اسىرۋ حالىقارالىق ەڭ جوعارى ستاندارتتار مەن ەل مۇددەسىنە سايكەس كەلەتىنىن جەتكىزدى.
«ەنەرگەتيكالىق تاۋەلسىزدىك – قازاقستاننىڭ تۇراقتى دامۋىنىڭ كەپىلى. ءبىز اتوم ەلەكتر ستانساسىنىڭ تۇراقتى ەنەرگيا كوزى عانا ەمەس, سونىمەن بىرگە ۇزاق مەرزىمدى كەلەشەكتە ەلىمىزدىڭ ەنەرگەتيكالىق قاۋىپسىزدىگىن قامتاماسىز ەتۋدىڭ كەپىلى ەكەنىن تۇسىنەمىز. مەملەكەت باسشىسىنىڭ باستاماسىن قولداپ, رەفەرەندۋمعا بەلسەنە قاتىسۋ – ءبىزدىڭ تۇراقتى بولاشاققا ورتاق قادامىمىز», دەدى سۇيىندىك الداشەۆ.