ساۋدا جانە ينتەگراتسيا ءبىرىنشى ۆيتسە-ءمينيسترى ايجان بيجانوۆا پاۆلودار وبلىسىنا جۇمىس ساپارى بارىسىندا بيزنەس وكىلدەرىمەن كەزدەسىپ, ىشكى ساۋدا سۋبەكتىلەرى وتاندىق تاۋارلاردى قولجەتىمدى ورىندارعا ورنالاستىرۋعا مىندەتتى ەكەنىن ايتتى, دەپ حابارلايدى Egemen.kz.
ۆيتسە-ءمينيستردىڭ ايتۋىنشا, بۇل بارلىعىنا بىردەي قويىلاتىن تالاپ. تالاپتى ورىنداماعاندارعا اكىمشىلىك جازا قولدانىلادى.
«مەملەكەتتىك قولداۋعا يە بولعان بيزنەس وكىلدەرى 30 پايىزعا تاعى 20-نى قوسۋعا مىندەتتى. ياعني سورەلەردىڭ 50 پايىزىندا قازاقستاندا وندىرىلگەن ازىق-ت ۇلىك تاۋارلارى جانە 20 پايىزىندا ازىق-ت ۇلىككە جاتپايتىن تاۋارلار بولۋى ءتيىس. بۇل وتاندىق وندىرۋشىلەردى قولداۋعا مۇمكىندىك بەرەدى», دەدى ايجان بيجانوۆا.
ونىڭ ايتۋىنشا, بيىل ىشكى ساۋدا سۋبەكتىلەرى ءۇشىن نەسيەلەردى ارزانداتۋعا, سونىڭ ىشىندە ساۋدا نىساندارىن سالۋ مەن جاڭعىرتۋعا 4 ملرد تەڭگە بولىنگەن. ونىڭ ورنىنا ىشكى ساۋدا سۋبەكتىلەرى وتاندىق ءونىم شىعارۋدى ىنتالاندىرۋى كەرەك.
سونداي-اق ول ەكسپورت پەن يمپورت اراسىنداعى ساۋدا تەڭگەرىمىنىڭ جاقسارعانىن اتاپ ءوتتى. ونىڭ ىشىندە شيكىزاتتىق ەمەس ەكسپورتتىڭ ءوسۋى مەن يمپورتتىڭ تومەندەۋى بار. 2024 جىلى ەكسپورتتالاتىن ءونىم جەلىسى جانە جاڭا ارىپتەس ەلدەردىڭ سانى كەڭەيگەن. ەلەكتروندىق ساۋدا دا بەلسەندى دامىپ جاتىر.
ساۋدا مينيسترلىگى نارىقتاردىڭ زاماناۋي ينفراقۇرىلىمىن قالىپتاستىرا وتىرىپ, ىشكى ساۋدانى جاڭعىرتۋ بويىنشا جۇمىس جۇرگىزىپ جاتىر. 2025 جىلعا قاراي قازاقستاننىڭ بارلىق بازارلارى جاڭعىرتىلۋى ءتيىس.