قۇقىق جانە مەملەكەتتىك باسقارۋ مەكتەبى بازاسىندا زاڭ كلينيكاسىنىڭ كەڭسەسى اشىلدى. اشىلۋ سالتاناتىنا سوت جانە زاڭ پراكتيكاسى, ادۆوكاتتىق جانە نوتارياتتىق قىزمەت پەن باق-تىڭ جەتەكشى وكىلدەرى, ستۋدەنتتەر, ماگيسترانتتار, PhD-دوكتورانتتار مەن ۋنيۆەرسيتەت قىزمەتكەرلەرى قاتىستى.
زاڭ كلينيكاسى – ەلىمىزدە كاسىبي داعدىلاردى عانا ەمەس, سونىمەن قاتار زاڭ جانە قۇقىقتىق ءتارتىپتى نىعايتۋدا الەۋمەتتىك جاۋاپكەرشىلىكتى تەرەڭ سەزىنەتىن زاڭگەرلەردىڭ جاڭا بۋىنىن تاربيەلەۋگە باعىتتالعان الەۋمەتتىك جوبا.
ءىس-شارانىڭ اشىلۋىندا ۋنيۆەرسيتەت پرەزيدەنتى قانات قوجاحمەت: «زاڭ كلينيكاسى ستۋدەنتتەردى تەوريالىق بىلىممەن قاتار دۋالدى ءبىلىم بەرۋ فورماتىنداعى پراكتيكالىق داعدىنى دامىتادى».
ۇلى اباي ايتىپ كەتكەن «اداسقاننىڭ الدى – جون, ارتى – سوقپاق» ءتامسىلدى ەسكە العان ۋنيۆەرسيتەت باسشىسى ء«بىر توپ ادام ءبىرىن-بىرىمەن قول ۇستاسىپ, قاراڭعى تۇنەكتە ءبىلىم ىزدەپ ساپارعا شىعادى. ۇستازى قاراڭعىدا اياق استىنان تاس كەزىكسە, كوتەرىپ الا جۇرىڭدەر كەرەك بولادى دەيدى. تۇنەكتەن جارىققا شىعار الدىندا ەسىك تارس جابىلىپ, سوندا ۇستازى, كىم تاس ارقالاپ كەلە جاتىر؟ كەرەك بولادى, جارىققا شىعاتىن جول وسى ارقالاعان تاستارىڭىز دەپتى. تاس كوتەرگەندەر جارىققا شىعىپ قاراسا, اياق اياستىنان تەرىپ العاندارى جاۋھار تاس بولىپ شىعادى. سوندىقتان ءبىلىم ىزدەگەن جاستار ءاردايىم ءوزىنىڭ جاۋھار تاستارىن اداسپاي تاپسىن», دەپ ءسوزىن قورىتىندىلادى.
قۇقىق جانە مەملەكەتتىك باسقارۋ مەكتەبىنىڭ زاڭ كلينيكاسىندا ستۋدەنتتەر بىلىكتى ۇستازداردىڭ جەتەكشىلىگىمەن ناقتى ىستەرگە قاتىسىپ, قۇجاتتار ازىرلەپ, كليەنتتىڭ مۇددەلەرىن قورعاپ, زاڭ كومەگىن كورسەتىپ, تەوريالىق بىلىمدەرىن ءىس جۇزىندە قولدانۋعا مۇمكىندىك الادى. ۋنيۆەرسيتەت پروفەسسورى گۇلميرا سۇلتانباەۆا اتاپ وتكەندەي, اتالمىش پراكتيكا ءبىلىم الۋشىلاردىڭ ماتەريالدى جاقسى مەڭگەرۋىنە, كاسىبي دامۋىنا ىقپال ەتەدى. كلينيكا ستۋدەنتتەردىڭ قۇقىقتىق ماسەلەلەردى شەشۋ, سىني ويلاۋ جانە توپتىق جۇمىس ورىنداۋ, سونداي-اق كوممۋنيكاتسيا, تالداۋ, دالەلدەۋ جانە شەشىم قابىلداۋ داعدىلارىن دامىتۋعا ارنالعان الاڭ رەتىندە قىزمەت ەتەدى. زاڭ كلينيكاسى ستۋدەنتتەرگە, اتا-انالارعا, الماتى تۇرعىندارىنا قولدانىستاعى قازاقستان زاڭناماسى, قۇقىقتىق نورمالارىن قولدانۋدىڭ وزەكتى ماسەلەلەرى بويىنشا اقىسىز كەڭەستەر ۇسىنادى. تەگىن زاڭ كومەگىن كورسەتۋ ستۋدەنتتەردىڭ قوعامدىق پروبلەمالارعا قاتىسۋىنا جول اشىپ, كاسىبي دامۋىنا نەگىز بولماق.
ءىس-شارا بارىسىندا «نارحوز ۋنيۆەرسيتەتى» كەاق مەن كومپلاەنس جانە ىسكەرلىك ەتيكا قاۋىمداستىعى, رەسپۋبليكالىق ادۆوكاتتار القاسى, الماتى ادۆوكاتتار القاسى, الماتى وبلىستىق ادۆوكاتتار القاسى, «زاڭ» مەديا-كورپوراتسياسى اراسىندا ىنتىماقتاستىق تۋرالى مەموراندۋمعا قول قويىلدى. اشىلۋ اياسىندا ءىس-شاراعا قاتىسۋشىلار مەن قوناقتار ءۇشىن كامپۋس-تۋر ءوتتى.
زاڭ كلينيكاسى الماتى قالاسى, جاندوسوۆ كوشەسى, 55, 1 قابات, باس كامپۋس كىرەبەرىستىڭ سول جاعىندا ورنالاسقان.