رۋدنىيدا ءۇش جاسار بالا 10 ماگنيتتى جۇتىپ قويىپ, قوستاناي وبلىستىق بالالار اۋرۋحاناسىنا جەتكىزىلگەننەن كەيىن قايتىس بولدى. ءبىر ايدان كەيىن دارىگەرلەرگە قىلمىستىق ءىس قوزعالدى. بۇل تۋرالى وسى ىسپەن اينالىساتىن ادۆوكات دامير حاميتوۆ Facebook-پاراقشاسىندا جازدى, دەپ حابارلايدى Egemen.kz.
- قوستاناي قالاسىنىڭ سولتۇستىك پوليتسيا ءبولىمى 10 ماگنيتتى جۇتىپ قويىپ, قايتىس بولعان كىشكەنتاي ساشانى قابىلداعان دارىگەرلەرگە قاتىستى قىلمىستىق كودەكستىڭ 317-بابى 3-بولىگى بويىنشا ەقدب-دا قىلمىستىق ءىستى تىركەدى. ەندى تەرگەۋ سوت-مەديتسينالىق ساراپتاما جانە فارماتسەۆتيكالىق باقىلاۋ كوميتەتىنىڭ قورىتىندىسى نەگىزىندە ءتيىستى مەديتسينالىق كومەك كورسەتپەگەن دارىگەرلەر تاراپىنا جۇرگىزىلەدى. كىنالىلەر بالانىڭ ءولىمى ءۇشىن جازالانۋى كەرەك, - دەپ جازدى زاڭگەر.
دامير حاميتوۆتىڭ مالىمەتىنشە, مەديتسينالىق جانە فارماتسەۆتيكالىق باقىلاۋ كوميتەتىنىڭ دەپارتامەنتى ءولىم دەرەگى بويىنشا تەكسەرۋ جۇرگىزگەن جانە مەديتسينالىق كومەك كەزىندە "بالاداعى وڭەشتىڭ بوگدە دەنەسى", "سەپسيس", "پەريتونيت" دياگنوستيكاسى مەن ەمدەۋدىڭ كلينيكالىق حاتتامالارى بۇزىلعانىن انىقتاعان.