پاۆلودار وبلىسىندا مۇمكىندىگى شەكتەۋلى تۇرعىننىڭ پاتەر كەزەگىنەن زاڭسىز شىعارىلعانى انىقتالدى. بۇل تۋرالى پاۆلودار وبلىستىق سوتىنىڭ ءباسپاسوز قىزمەتىنەن ءمالىم ەتتى, دەپ حابارلايدى Egemen.kz.
سوتتىڭ مالىمەتىنشە, پاۆلودار وبلىسىنىڭ مۇمكىندىگى شەكتەۋلى تۇرعىنى (كورۋ قابىلەتى بويىنشا 1-توپتاعى) 2006 جىلى كوممۋنالدىق تۇرعىن ءۇي قورىنان تۇرعىن ءۇي الۋ ءۇشىن كەزەككە تۇرعان. بىراق 18 جىلدان كەيىن, 2024 جىلى ونى مونيتورينگ انىقتاعان كۇيەۋىنىڭ جىلجىمايتىن م ۇلىككە مەنشىك قۇقىعى تىركەلۋىنە بايلانىستى بۇل كەزەكتەن شىعارىپ تاستاعان.
«تىركەۋگە الىنعان ساتتەن باستاپ, ونىڭ تۇرعىن ءۇيىنىڭ بار-جوعى تۋرالى قالالىق تۇرعىن ءۇي قوميسسياسى بىرنەشە رەت تەكسەرگەن. ايەل كوممۋنالدىق تۇرعىن ءۇي قورىنان ءوزىن تۇرعىن ۇيگە مۇقتاجدار تىزىمىنەن شىعارۋ تۋرالى شەشىمدى زاڭسىز دەپ تانۋ جانە تۇرعىن ءۇي كەزەگىنە قالپىنا كەلتىرۋ تۋرالى تالاپ قويۋمەن سوتقا جۇگىندى. تالاپ قويۋدى ونىڭ پاتەر يەسى ەمەستىگىمەن, بۇل پاتەردە تۇرۋعا جاعدايدىڭ جوقتىعىمەن, ورتالىقتاندىرىلعان جىلۋ نەمەسە كارىز جۇيەسى بولماۋىمەن, پاتەر جوندەۋدى قاجەت ەتەتىندىگىمەن ۋاجدەدى. ءبىرىنشى ساتىداعى سوت تالاپ قويۋدى قاناعاتتاندىرۋدان باس تارتتى», دەلىنگەن سوت حابارلاماسىندا.
اپەللياتسيا ءىستى قاراي كەلە, تالاپ قويۋشىنىڭ كۇيەۋىنىڭ - جالپى اۋدانى 44 شارشى مەتر, ەكى بولمەلى پاتەرى 4 ادامنان تۇراتىن وتباسىنىڭ تۇرۋىنا جەتكىلىكسىز ەكەندىگىن ەسكەردى. «تۇرعىن ءۇي قاتىناستارى تۋرالى» زاڭنىڭ 69-بابىنىڭ 4-تارماعىنا سايكەس تۇرىپ جاتقان تۇرعىنجايى بەلگىلەنگەن سانيتاريالىق جانە تەحنيكالىق تالاپتارعا ساي كەلمەسە ازاماتتار تۇرعىن ۇيگە مۇقتاج دەپ تانىلادى. 2011 جىلعى الەۋمەتتىك-تۇرمىستىق جاعدايدى تەكسەرۋ اكتىسى بويىنشا ۇيدە سۋ مەن جىلۋ جوق, كارىز جۇيەسى جۇمىس ىستەمەيتىنى انىقتالدى. ياعني, بۇل تۇرعىن ءۇي تۇرمىس جاعدايىنا ساي ەمەس.
«سوت تالاپ قويۋشىنى كوممۋنالدىق تۇرعىن ءۇي قورىنان تۇرعىن ۇيگە مۇقتاج دەپ تانىدى جانە اكىمشىلىك ورگاننىڭ سەنىمگەرلىك قۇقىعىن قورعاۋ قاعيداسىن بۇزۋى انىقتالدى (اكىمشىلىك پروتسەسكە قاتىسۋشىنىڭ اكىمشىلىك ورگاننىڭ قىزمەتىنە سەنىمى, ارپك-ءتىڭ 13-بابى). ارپك-ءنىڭ 12 جانە 14-باپتارىنا سايكەس, اكىمشىلىك ورگانعا, لاۋازىمدى ادامعا اكىمشىلىك پروتسەسكە قاتىسۋشىنىڭ قۇقىعىن جۇزەگە اسىرۋدان باس تارتۋعا, شەكتەۋگە نەمەسە توقتاتۋعا, سونداي-اق وعان بەلگىلەنبەگەن تالاپتاردى ساقتاۋ مىندەتىن جۇكتەۋگە تىيىم سالىنادى, اكiمشiلiك راسiمدەر تۋرالى زاڭنامانىڭ بارلىق كۇماندەرi, قايشىلىقتارى مەن تۇسiنiكسiزدiكتەرi اكiمشiلiك راسiمگە قاتىسۋشىنىڭ پايداسىنا تۇسiندiرiلەدi. زاڭدىلىق, پروپورتسيونالدىلىق, سەنىم قۇقىعىن قورعاۋ, قۇقىقتاردىڭ باسىمدىعى قاعيداتتارىن ەسكەرە وتىرىپ, ادىلدىك پەن پاراساتتىلىق ولشەمشارتتارىنا سۇيەنە وتىرىپ, ايەلدىڭ تالاپ ارىزى تولىق كولەمدە قاناعاتتاندىرىلدى», دەلىنگەن حابارلامادا.
اپەللياتسيالىق قاۋلى زاڭدى كۇشىنە ەندى.