اتا-اناسى ءبىر جاستاعى بالاسىنىڭ ولىمىنە اقتاۋلىق دارىگەرلەردى كىنالادى

ءبىر جاسار ابدۋللا وتەگەننىڭ قىزۋى كۇندە كوتەرىلەتىن بولعان. بالانىڭ اكەسى ەرمەك نۇرباەۆتىڭ ايتۋىنشا, ولاردى الدىمەن ۋچاسكەلىك پەدياتر قاراعان, بىراق دەنە قىزۋى تۇسپەي, بالالار جۇقپالى اۋرۋلار اۋرۋحاناسىنا جىبەرىلگەن. ول جەردە دارىگەرلەر نارەستەدە جەدەل رەسپيراتورلىق ۆيرۋستىق ينفەكتسيا بار دەپ بولجاپ, قىزۋىن ءتۇسىرىپ, ءدارى-دارمەك جازىپ ۇيىنە قايتارعان.

«ەمدەۋ ناتيجە بەرمەدى جانە ءبىز جەكە ينفەكتسيونيستكە جۇگىنۋىمىزگە تۋرا كەلدى. ول جۇقپالى اۋرۋلار اۋرۋحاناسىنىڭ قويعان دياگنوزىن تەكسەرىپ, ەمدەۋدى جالعاستىرۋدى ۇسىندى. الايدا بالانىڭ قىزۋى تۇسپەي, قايتادان جۇقپالى اۋرۋلار اۋرۋحاناسىنا باردىق. جەدەل جاردەم جانە تاكسي ارقىلى قايتا كەلگەنىمىزگە قاراماستان,  18 ساۋىرگە دەيىن اۋرۋحاناعا جاتقىزۋ جۇرگىزىلگەن جوق. ءتورتىنشى رەت كەلگەندە  ءبىزدى اۋرۋحانا قابىلدادى, بىراق بۇل دەمالىس كۇنى بولعان ەدى. بىزگە قايتادان جرۆي دياگنوزى  قويىلدى. ءبىر اپتادان كەيىن عانا دياگنوز پنەۆمونيا مەن تسيتومەگالوۆيرۋسقا وزگەرتىلدى»,  دەدى بالانىڭ اكەسى ەرمەك نۇرباەۆ.

ەرمەك نۇرباەۆ بالاسىنىڭ اۋرۋحانادا قىزىلشامەن اۋىرعانىن, بۇل وعان قوسىمشا اۋىرتپالىق بولعانىن ايتا كەتتى.

«9 مامىر كۇنى تاڭەرتەڭ ۇلىمنىڭ جاعدايى ناشارلاپ, 10 مامىر كۇنى تاڭەرتەڭ ول وزدىگىنەن تىنىس الا الماي, جانساقتاۋ بولىمىنە جاتقىزىلدى. 11 مامىردا جۇرەگى توقتاپ قالدى. بۇرىن تاماق ءىشىپ, ءجۇرىپ-تۇرعان بالا جۇقپالى اۋرۋلار اۋرۋحاناسىندا ەمدەلگەننەن كەيىن جاتىپ قالدى. قورىتىندىدا ءولىم سەپسيستەن بولعانى كورسەتىلگەن. ءبىز دارىگەرلەرگە ۇلىمىزدىڭ ءومىرى مەن دەنساۋلىعىن اماناتتادىق, بىراق ولاردىڭ سالعىرتتىعى مەن قاتەلىگى ءبىزدى بالامىزدان ايىردى», دەدى ەرمەك نۇرباەۆ.

بالانىڭ اكەسىنىڭ ايتۋىنشا, ۇلىنىڭ ولىمىنە قاتىستى ءىستى قاراۋدى ءوتىنىپ, پرەزيدەنت اكىمشىلىگىنە, دەنساۋلىق ساقتاۋ مينيسترلىگىنە جانە باس پروكۋراتۋراعا ارىز جازعان.

«باس پروكۋراتۋرا ءوتىنىشتى قاراپ, ونى ودان ءارى قاراۋ ءۇشىن ىشكى ىستەر مينيسترلىگىنە جىبەردى. ءوز كەزەگىندە ءىىم ءوتىنىشتى قاراپ, تەرگەۋ جۇرگىزۋ ءۇشىن ماڭعىستاۋ وبلىسىنىڭ پوليتسيا دەپارتامەنتىنە جولدادى. وبلىستىق پوليتسيا دەپارتامەنتى قىلمىستىق ءىس جۇرگىزۋ كودەكسىنىڭ 179-بابىنىڭ 1-بولىگىنىڭ 1-تارماعىنا سايكەس, ارىزدى قاراۋسىز قالدىرعان, الايدا, ارىزدى ءىىم-نە قايتا جولداۋ كەزىندە قاراۋ قاجەت ەكەندىگى كورسەتىلگەن. ءوتىنىشتى جانە ونى ءتيىستى دەرەكتەر بازاسىندا تىركەۋگە, سونداي-اق زاڭناماعا سايكەس تەكسەرۋ جۇرگىزۋگە مىندەتتەنەدى, الايدا وبلىستىق پوليتسيا دەپارتامەنتى تەرگەۋ جۇرگىزۋ قاجەتتىلىگى تۋرالى وتىنىشپەن تولىق تانىسپاي, ارىزدى قاراۋدى اياقتادى», دەدى مارقۇمنىڭ اكەسى.

ەرمەك نۇرباەۆ بالانىڭ قايتىس بولۋ فاكتىسى بويىنشا ماڭعىستاۋ وبلىسىنىڭ دەنساۋلىق ساقتاۋ باسقارماسى تەكسەرۋ جۇرگىزگەنىن, الايدا ونىڭ ايتۋىنشا, بىرنەشە دارىگەر مەن وبلىستىق بالالار اۋرۋحاناسىنىڭ ديرەكتورى بالانىڭ قايتىس بولۋىنا قاراماستان, جۇمىسقا نەمقۇرايلى قاراعانى جانە زاڭنامانى ساقتاماعانى ءۇشىن سوگىس تۇرىندە تارتىپتىك جازامەن عانا جازالانعانىن حابارلادى.

وبلىستىق دەنساۋلىق ساقتاۋ باسقارماسى بۇل جاعدايدا بالا ەلىمىزدە قابىلدانعان دياگنوستيكالىق جانە ەمدەۋ حاتتامالارى بويىنشا تولىق ەمدەلگەنىن مالىمدەگەن.

«رەسپۋبليكالىق ورتالىقتارمەن تەلەمەديتسينا سەانستارى جۇرگىزىلدى, ەمى تۇزەتىلدى. اۋرۋ تاريحىنا دەنساۋلىق ساقتاۋ باسقارماسى دا, ماڭعىستاۋ وبلىسى بويىنشا ەمدەۋ ساپاسىن باقىلاۋ كوميتەتى دە تالداۋ جاسادى. بارلىق قورىتىندى زاڭدى وكىلدەرگە تاپسىرىلدى. سول كەزدەگى ەمدەۋشى دارىگەر ينسپەكتسيادان ءوتىپ, قازىر دەكرەتتىك دەمالىستا», دەدى ماڭعىستاۋ وبلىسى دەنساۋلىق ساقتاۋ باسقارماسىنىڭ مەديتسينالىق كومەكتى ۇيلەستىرۋ جانە انا مەن بالا دەنساۋلىعىن قورعاۋ جونىندەگى ورىنباسارى اسقار ماحمۇتوۆ.

وبلىستىق پوليتسيا مەديتسينا قىزمەتكەرىنىڭ كاسىبي مىندەتتەرىن تيىسىنشە ورىنداماۋى بويىنشا سوتقا دەيىنگى تەرگەۋ باستالعانىن مالىمدەدى.

«پوليتسيا قاجەتتى تەرگەۋ ارەكەتتەرىن جۇرگىزىپ جاتىر, باسقا اقپارات تەرگەۋ مۇددەسى ءۇشىن جاريالانبايدى»,  دەپ قورىتىندىلادى دەپارتامەنت وكىلدەرى.