قازاقستاندا قىزداردى جاتىر موينى وبىرىنىڭ نەگىزگى قوزدىرعىشى – ادام پاپيللوماسى ۆيرۋسىنا (اپۆ) قارسى ۆاكتسيناتسيالاۋ باستالدى, دەپ حابارلايدى Egemen.kz.
قر باس مەملەكەتتىك سانيتارلىق دارىگەردىڭ 2024 جىلعى 17 قىركۇيەكتەگى № 11 قاۋلىسىنا سايكەس 11 جاستاعى قىزدار جوسپارلى تارتىپپەن ۆاكتسيناتسيالاۋعا جاتادى. سونداي-اق 12-13 جاستاعى قىزدارعا دا قوسىمشا يممۋنداۋ جۇرگىزىلەدى.
ايتا كەتەيىك, اتالعان ەكپە مەكتەپتەردىڭ مەديتسينالىق كابينەتتەرىندە اتا-انالاردىڭ نەمەسە زاڭدى وكىلدەردىڭ كەلىسىمىنەن كەيىن عانا جۇرگىزىلەدى. سونداي-اق اتا-انالاردىڭ قالاۋى بويىنشا ۆاكتسيناتسيا قىز بالا تىركەلگەن جەردەگى ەمحانالاردا دا جۇرگىزىلۋى مۇمكىن.
جاتىر موينى وبىرى - قازاقستانداعى بارلىق جاستاعى ايەلدەر اراسىندا تارالۋى بويىنشا ەكىنشى ورىندا, 25 پەن 44 جاس ارالىعىنداعى ايەلدەر ءولىمىنىڭ سەبەبى بويىنشا ەكىنشى ورىندا تۇرعان قاتەرلى ىسىك. جىل سايىن قازاقستاندا بۇل دەرتتىڭ 1900-عا جۋىق جاڭا جاعدايى تىركەلەدى.
عىلىمدار جۇرگىزگەن زەرتتەۋلەرگە سايكەس, جاتىر موينى وبىرىنىڭ نەگىزگى سەبەبى - اپۆ ينفەكتسياسىن جۇقتىرۋ.
جاتىر موينى وبىرىنىڭ الدىن الۋعا باعىتتالعان ەڭ ءتيىمدى شارا - ۆاكتسينا. اپۆ-عا قارسى ۆاكتسينا حالىقارالىق دەڭگەيدە ءوزىنىڭ تيىمدىلىگى مەن قاۋىپسىزدىگىن دالەلدەگەن. بۇگىنگى تاڭدا اپۆ-عا قارسى ۆاكتسينا الەمنىڭ 135 ەلىندە قولدانىلادى. ۆاكتسيناتسيانىڭ ارقاسىندا كوپتەگەن مەملەكەتتە ايەلدەر اراسىندا اپۆ-نىڭ تارالۋى 90%-عا تومەندەگەنىن ايتا كەتۋ كەرەك.