جىل باسىنان بەرى مۇگەدەكتىگى جانە اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقىلاردى تولەۋگە رەسپۋبليكالىق بيۋدجەتتەن 408,1 ملرد تەڭگە جۇمسالعان. بۇعان قوسىمشا مەملەكەتتىك الەۋمەتتىك ساقتاندىرۋ قورىنان ەڭبەككە قابىلەتتىلىگىنەن جانە اسىراۋشىسىنان ايىرىلۋ بويىنشا شامامەن 53,4 ملرد تەڭگە سوماسىنا الەۋمەتتىك تولەمدەر جۇزەگە اسىرىلعان, دەپ حابارلايدى Egemen.kz.
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, 2024 جىلعى 1 قىركۇيەكتەگى جاعداي بويىنشا مۇگەدەكتىگىنە بايلانىستى ءماج الۋشىلار سانى شامامەن 541,2 مىڭ ادامدى, اسىراۋشىسىنان ايىرىلۋ جاعدايىنداعىلار 185,7 مىڭ ادامدى قۇراعان.
ەسكە سالا كەتەيىك, مۇگەدەكتىگى بويىنشا مەملەكەتتىك الەۋمەتتىك جاردەماقىلاردىڭ مولشەرى مۇگەدەكتىكتىڭ توبىنا جانە سەبەبىنە, سونداي-اق ءتيىستى قارجى جىلىنا ارنالعان «رەسپۋبليكالىق بيۋدجەت تۋرالى» زاڭدا بەلگىلەنگەن ەڭ تومەنگى كۇنكورىس دەڭگەيىنىڭ شاماسىنا بايلانىستى بولادى. ال, اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقىلاردىڭ مولشەرى قايتىس بولعان اسىراۋشىنىڭ اسىراۋىنداعى ادامداردىڭ سانىنا, قايتىس بولۋ سەبەپتەرىنە جانە ەڭ تومەن كۇنكورىس دەڭگەيىنە بايلانىستى. بۇدان بولەك, مىندەتتى الەۋمەتتىك ساقتاندىرۋ جۇيەسىنە قاتىسۋشىلارعا الەۋمەتتىك تاۋەكەلدەر تۋىنداعان جاعدايدا ماسق-تەن الەۋمەتتىك تولەمدەر جۇزەگە اسىرىلادى.
2024 جىلعى 1 قىركۇيەكتەگى جاعداي بويىنشا 97,5 مىڭ ادام ەڭبەك ەتۋ قابىلەتىنەن ايىرىلۋىنا بايلانىستى الەۋمەتتىك تولەم, ال 64,7 مىڭعا جۋىق وتباسى اسىراۋشىسىنان ايىرىلۋىنا وراي الەۋمەتتىك تولەم العان.
ايتا كەتەيىك, تولەمدەردىڭ مولشەرى سوڭعى 2 جىلداعى ماسق-عا الەۋمەتتىك اۋدارىمدار جۇرگىزىلگەن ورتاشا ايلىق تابىس, ەڭبەككە قابىلەتتىلىگىنەن ايىرىلۋ كوەففيتسيەنتتەرى, اسىراۋىنداعى ادامدار سانى, مىندەتتى الەۋمەتتىك ساقتاندىرۋ جۇيەسىنە قاتىسۋ ءوتىلى جانە تابىستى اۋىستىرۋعا تىكەلەي بايلانىستى. بۇل تولەمدەر رەسپۋبليكالىق بيۋدجەتتەن تولەنەتىن ۇقساس جاردەماقىلارعا قوسىمشا جۇزەگە اسىرىلادى.
«2024 جىلعى 1 قاڭتاردان باستاپ مۇگەدەكتىگى جانە اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقىلاردىڭ مولشەرى ەڭ تومەن كۇنكورىس دەڭگەيىنىڭ ۇلعايۋى ناتيجەسىندە 7% - عا ءوستى. قر ۇكىمەتىنىڭ شەشىمىمەن ەڭبەككە قابىلەتتىلىگىنەن ايىرىلۋ جانە اسىراۋشىسىنان ايىرىلۋىنا بايلانىستى ماسق-تەن تولەنەتىن تولەمدەردىڭ مولشەرى دە 7% - عا ارتتى. مىسالى, 2024 جىلعى 1 قاڭتاردان باستاپ جالپى اۋرۋدان مۇگەدەكتىگى بويىنشا ءماج مولشەرى ءى-توپ ءۇشىن – 95 496 تەڭگەنى, ءىى-توپ ءۇشىن – 76 397 تەڭگەنى, ءىىى-توپ ءۇشىن 52 089 تەڭگەنى قۇرايدى. 2024 جىلعى 1 قىركۇيەكتەگى جاعداي بويىنشا ەڭبەككە قابىلەتتىلىگىنەن ايىرىلعاندارعا تولەنەتىن الەۋمەتتىك تولەمدەردىڭ ورتاشا مولشەرى 58 257 تەڭگەنى, اسىراۋشىسىنان ايىرىلعاندارعا – 61 939 تەڭگەنى قۇرايدى», دەلىنگەن ۆەدومستۆو حابارلاماسىندا.