پرەزيدەنت جولداۋىندا بىرقاتار ماڭىزدى ماسەلە كوتەردى. كوبى قارجى سەكتورىنا بايلانىستى بولدى. كەلەسى جىلدان باستاپ كوممەرتسيالىق قارجى نارىعى مەن مەملەكەتتىك قارجى سەكتورىندا ەلەۋلى وزگەرىس كۇتىپ تۇر. بانكتەر ەندى ەكونوميكاعا جۇمىس ىستەيدى. ەگەر ولار كونبەسە, شەتەلدەن كورپوراتيۆتى سەكتوردى قارجىلاندىرعىسى كەلەتىن كوپتەگەن ويىنشى شاقىرىلادى.
بانك قىزمەتى تۋرالى جاڭا زاڭ ازىرلەنەدى دە, وعان بازالىق جانە ۋنيۆەرسالدى رەگۋلياتيۆ ەنگىزەدى. تەك بايىعىسى كەلەتىن, قوجايىنى ديۆيدەندتەن دامەتە بەرەتىن ساراڭداۋ بانكتەرگە زاڭدىق پرۋدەنتسيالدى تالاپ قاتال بولادى دا, ەكونوميكاعا قارجى سالعىسى كەلەتىن, ەنتۋزيازمى جوعارى (شەتەلدىك) بانكتەرگە تالاپتار جەڭىلدەتىلەدى. ال سالىق مولشەرى (كتس) قوجايىنى الاتىن ديۆيدەندكە قاتىستى بولماق. ياعني اكتسيونەرى بانكتى ساۋىن سيىر كورەتىن قارجى ينستيتۋتتارى كوبىرەك سالىق تولەمەك. ەكونوميكاعا كرەديت بەرىپ, كاسىپورىنداردى قارجىلاندىرىپ, ديۆيدەندكە تيىسپەيتىن بانكتەرگە سالىق بويىنشا جەڭىلدىكتەر جاسالادى.
ەكونوميكاعا كومەكتەسكەن بانكتەرگە كوزقاراس دۇرىس بولادى. ال حالىققا ونلاين تۇتىنۋشىلىق كرەديت قانا بەرىپ, ودان تابىستى كۇرەپ الىپ, ديۆيدەند العىسى كەلەتىندەر, 25 پايىز سالىق تولەۋگە دايىن بولعانى ءجون.
جولداۋدا ۇلتتىق قور ماسەلەسى دە ايتىلدى. ينۆەستيتسيالىق باعىت قايتا فورماتتالماق. ۇلتتىق قوردا جاتقان 60 ملرد دوللار شەتەلدەگى بىرەۋلەرگە ارزان قورلاندىرۋ بولماسىن دەدى مەملەكەت باسشىسى. بۇل نەگىزى قيىن جاعداي. ءبىزدىڭ ەكونوميكا 60 ملرد دوللاردى قورىتا المايدى. ال ۇلتتىق قور اگرەسسيۆتى ينۆەستيتسياعا ەمەس, تۇراقتى جيناۋعا نەگىزدەلگەن ەدى. ونى تابىستىلىعى 1-2% بولسا دا, 100 پايىز كەپىلدىگى بار ا كلاستى شەتەلدىك وبليگاتسيالار ارقىلى قامتاماسىز ەتىپ كەلدىك. ەندى ولاردى اۋىزداندىرماي, ءوزىمىزدىڭ ەكونوميكالىق ويىنشىلارعا 1-2%-بەن ۆاليۋتامەن بەرەتىن بولساق, ونداي وتاندىق بيزنەس اقشانىڭ 100% قايتاتىنىن قامتاماسىز ەتۋ كەرەك. سەبەبى ۇلتتىق قور – حالىقتىڭ اقشاسى.
بۇل رەتتە, پرەزيدەنت تاۋەكەلگە بارىپ وتىر. ۇلتتىق قور ينۆەستيتسياسىمەن ەكونوميكامىزدى كەرەمەت دەڭگەيگە كوتەرۋگە بولادى. بىراق ول بيزنەس جاۋاپتى بولىپ شىقپاسا, اقشامىز كوزدەن بۇل-بۇل ۇشادى.
ەندى اتاۋلى الەۋمەتتىك كومەك, جاردەماقىعا تويعا بارىپ نەمەسە كافەدە وتىرا المايدى. بۇل – وتە مىقتى شەشىم. بولاشاقتا بيۋدجەتتىڭ الەۋمەتتىك كومەگى قىسقاراتىنىن بولجاۋعا بولادى. سەبەبى نانعا اقشا الىپ وتىرعان ادامداردىڭ ءبىرازىنا شىن مانىندە نان كەرەك ەمەس.
ول الەۋمەتتىك ءاميان ارقىلى جاسالادى. كارتوچكاعا تەڭگە تۇسپەيدى. اميانعا تۇسەدى. ول جەردەن تەك بەلگىلى ءبىر تولەمدەر – ازىق-ت ۇلىك, ءدارى-دارمەك, كوممۋنالدىق تولەم جاسالادى. قولعا قاعاز اقشانى بانكوماتتان شىعارا المايدى. شىنى كەرەك, مەملەكەت باسشىسى كاپيتاليستىك سوتسياليزم جاساپ جاتىر. ونىڭ تولىق فورماتىنا 2028 جىلدارى كەلەتىن سياقتىمىز. ول جاقسى ما؟ ءادىل, جۇمىسىن سۇيەتىن, قاراپايىم, جاۋاپتى ادامدارعا قولايلى زامان تۋادى. وسى ادامدار وسەدى. جەڭ ۇشىنان بايلانىسۋعا ۇيرەنىپ قالعان, اۋىردىڭ ۇستىمەن جۇرەتىن, جەمقورلاۋ, الاياقتاۋ ادامدارعا قيىن زامان تۋادى.
ايبار ولجاەۆ,
تاۋەلسىز ساراپشى