قر دەنساۋلىق ساقتاۋ مينيسترلىگى ماڭعىستاۋ وبلىسىنىڭ مۇنايلى اۋدانىندا تاماقتان ۋلانىپ قالعان وقۋشىلاردىڭ جاي-كۇيى تۋرالى اقپارات ۇسىندى, دەپ حابارلايدى Egemen.kz.
«ماڭعىستاۋ وبلىسىندا ينفەكتسيادان زارداپ شەككەن 98 بالانىڭ بارلىعى وبلىستىق كوپبەيىندى بالالار اۋرۋحاناسىنىڭ ينفەكتسيالىق بولىمشەسىندە ستاتسيونارلىق ەم الدى, ۇيلەرىنە شىعارىلىپ, تۇرعىلىقتى جەرى بويىنشا امبۋلاتوريالىق باقىلاۋعا الىندى», دەپ حابارلادى دسم-ءنىڭ ءباسپاسوز قىزمەتى.
ەسكە سالا كەتەيىك, 6 قىركۇيەكتە مۇنايلى اۋدانىنىڭ «№8 جالپى ءبىلىم بەرەتىن مەكتەپ» كمم-ءنىڭ 466 وقۋشىسى ءتۇرلى شاعىمدارمەن مەديتسينالىق مەكەمەلەرگە جۇگىنگەن. ونىڭ 98-ءى اۋرۋحاناعا جاتقىزىلىپ, ەكى بالا قارقىندى تەراپيا بولىمشەسىندە ەمدەلگەن.