استانادا ۇيىمداستىرىلعان 5-ءشى دۇنيەجۇزىلىك كوشپەلىلەر ويىندارى مارەسىنە جەتتى. ءدۇبىرلى دودانىڭ سالتاناتتى جابىلۋ ءراسىمى ەتنواۋىلدا ءوتتى, دەپ جازادى Egemen.kz.
8-13 قىركۇيەك ارالىعىندا وتكەن كوشپەلىلەر ويىندارىنا 89 مەملەكەتتەن 2500-دەن استام سپورتشى قاتىسىپ, 21 سپورت تۇرىنەن 97 مەدال جيىنتىعىن ساراپقا سالدى.
كوشپەلىلەر ويىندارىنىڭ جابىلۋ سالتاناتىنا تۋريزم جانە سپورت ءمينيسترى ەربول مىرزابوسىنوۆ, دۇنيەجۇزىلىك ەتنوسپورت كونفەدەراتسياسىنىڭ پرەزيدەنتى ءبىلال ەردوعان قاتىسىپ, ءسوز سويلەدى. ە.مىرزابوسىنوۆ بايراقتى باسەكە ۇلتتىق سپورتىمىزدى ۇلىقتاپ, سالت-ءداستۇرىمىزدى دارىپتەپ, مادەني مۇرامىزدى تورتكۇل دۇنيەگە پاش ەتكەن بىرەگەي وقيعا رەتىندە تاريحتا قالعانىن اتاپ ءوتتى.
«مەملەكەت باسشىسى قاسىم-جومارت توقاەۆتىڭ تىكەلەي باستاماسىمەن قازاق توپىراعىندا ۇيىمداستىرىلعان دۇنيەجۇزىلىك كوشپەلىلەر ويىندارى – ءمانى تەرەڭ, مازمۇنى باي بىرەگەي جوبا. ونىڭ تۇركى الەمىنىڭ التىن بەسىگى – قازاق جەرىندە جالاۋىن جەلبىرەتكەنى – ءبىز ءۇشىن زور مارتەبە ءارى شىن ماقتانىش. ويىنداردا 30-دان استام ەلدىڭ سپورتشىلارى مەدال يەلەندى. جۇلدە العان مەملەكەتتەر قاتارىندا مۇحيتتىڭ ارعى جاعىنان كەلگەن كانادا مەن مەكسيكا سپورتشىلارى دا بار. ءدۇبىرلى دوداعا 90-عا جۋىق مەملەكەتتىڭ قاتىسۋى, 30-دان استام ەلدىڭ جۇلدەگەرلەر قاتارىنان كورىنۋى – دۇنيەجۇزىندە كوشپەلىلەر ويىندارىنا دەگەن قىزىعۋشىلىقتىڭ ارتىپ كەلە جاتقانىن اڭعارتادى. كەلەسى, 6-شى دۇنيەجۇزىلىك كوشپەلىلەر ويىندارىن باۋىرلاس مەملەكەت – قىرعىز رەسپۋبليكاسى قابىلدايدى. قىرعىز ەلىنىڭ الداعى باسەكەنى جوعارى دەڭگەيدە وتكىزۋىنە تىلەكتەسپىن. كوشپەلىلەر وليمپياداسىنىڭ بەدەلى بيىكتەي بەرسىن!», دەدى ەربول مىرزابوسىنوۆ.جابىلۋ سالتاناتىنىڭ سوڭىندا ويىنداردىڭ رەسمي نىشانى سانالعان تورسىقتى كەلەسى ويىنداردى قابىلدايتىن قىرعىز رەسپۋبليكاسىنىڭ مادەنيەت, اقپارات, سپورت جانە جاستار ساياساتى ءمينيسترى التىنبەك ماقسۇتوۆقا تابىس ەتىلدى.