ماڭعىستاۋ وبلىسى ادىلەت دەپارتامەنتىنىڭ ورىنباسارى قاداعالاۋ ورگانىنىڭ اكتىسىن ۋاقتىلى قاراماعانى ءۇشىن سوت قاۋلىسىمەن 8 اەك كولەمىندە ايىپپۇل تۇرىندە اكىمشىلىك جاۋاپكەرشىلىككە تارتىلدى, دەپ حابارلايدى Egemen.kz.
باس پروكۋراتۋرانىڭ حابارلاۋىنشا, اكىمشىلىك قۇقىق بۇزۋشىلىق تۋرالى ءىس پروكۋروردىڭ ۇسىنۋىمەن قاراۋ مەرزىمىن رەتتەيتىن «پروكۋراتۋرا تۋرالى» كونستيتۋتسيالىق زاڭىنىڭ تالاپتارىن ورەسكەل بۇزعانى ءۇشىن قوزعالعان.اتاپ ايتقاندا, لاۋازىمدى تۇلعا زاڭدا بەلگىلەنگەن مەرزىمگە قاراماستان, قالالىق پروكۋراتۋرانىڭ ۇسىنۋىن ءبىر ايدان استام ۋاقىت بويى تيىسىنشە قاراۋ جونىندە شارالارىن قابىلداماعان.
«پروكۋراتۋرانىڭ تالابىنان كەيىن ۇسىنۋدىڭ قاراۋ قورىتىندىسىمەن 8 جەكە سوت ورىنداۋشى تارتىپتىك جاۋاپتىلىققا تارتىلدى, مەملەكەت كىرىسىنە 11 ملن تەڭگەدەن استام قارجى ءوندىرىلدى. مەملەكەتتىك قىزمەتكەر ءوز كىناسىن تولىق مويىنداپ, سالىنعان ايىپپۇلدى تولەدى», دەلىنگەن حابارلامادا.
ەسكە سالا كەتەيىك, پروكۋراتۋرا اكتىلەرىن قاراماۋ, سول سياقتى تيىسىنشە ورىنداماۋ نە پروكۋروردىڭ زاڭدى تالاپتارىن ورىنداماۋ قازاقستان رەسپۋبليكاسىنىڭ زاڭدارىندا بەلگىلەنگەن جاۋاپتىلىققا الىپ كەلەتىندىگى ەسكەرتىلەدى.