«وتاۋ» جانە «ناۋرىز» باعدارلامالارى بويىنشا قوسىمشا قابىلداۋ جۇرگىزىلەدى. قوسىمشا ءوتىنىم قابىلداۋ 16 قىركۇيەكتە باستالىپ, 25 قىركۇيەككە دەيىن جالعاسادى. ءوتىنىمدى «باسپانا ماركەت» پورتالىندا بەرۋگە بولادى.
«وتباسى بانك» يپوتەكالىق باعدارلامالارعا ءبىرشاما وزگەرىس ەنگىزبەكشى. ناقتىراق ايتقاندا, وپەراتور «وتاۋ» باعدارلاماسىنىڭ شارتتارى مەن «ناۋرىز» باعدارلاماسىنىڭ شارتتارىن تەڭەستىرۋدى جوسپارلاپ وتىر. كليەنتتەردىڭ تاجىريبەسىن زەرتتەپ, ازاماتتاردىڭ ءوتىنىش-تىلەگىن تىڭداعاننان كەيىن «وتباسى بانك» ەكى باعدارلامانىڭ شارتىن ءبىر جۇيەگە كەلتىرۋ تۋرالى شەشىم قابىلداعان.
بانك باعدارلاما شارتتارىنا بىرقاتار وزگەرىس ەنگىزبەك. اتاپ ايتقاندا, كەزەكتە تۇرعان حالىقتىڭ الەۋمەتتىك وسال توپتارى ءۇشىن «وتاۋ» باعدارلاماسىنىڭ مولشەرلەمەسى 9%-دان 7%-عا دەيىن تومەندەيدى; «وتاۋ» باعدارلاماسىنىڭ قاتىسۋشىلارى ءوتىنىش بەرەردىڭ الدىندا دەپوزيت اشا الادى; نەسيەنىڭ ماكسيمالدى سوماسى ۇلعايتىلادى – استانا, الماتى قالالارىندا 36 ملن تەڭگە جانە باسقا وڭىرلەردە 30 ملن تەڭگە; الماتى مەن استانادان پاتەر الاتىندارعا قويىلاتىن تىركەۋ تالابى الىنىپ تاستالدى. سونىمەن قاتار بىرىڭعاي بالدىق ەسەپ جۇيەسى ەنگىزىلەدى. وعان سايكەس, دەپوزيت بويىنشا سىياقى سوماسىنا ءار 1 000 تەڭگە ءۇشىن 1 ۇپاي جازىلادى. نەكەگە تىركەلگەن بولسا 5 ۇپاي, بالالارى بولسا, قوسىمشا 10 ۇپاي بەرىلەدى. حالىقتىڭ الەۋمەتتىك وسال توپتارى مارتەبەسى ءۇشىن تاعى 10 ۇپاي قاراستىرىلعان. سونداي-اق جاسى 35-كە دەيىنگى ازاماتتارعا 5 ۇپاي قوسىلادى.
ەكى باعدارلامادا بيىل ىسكە قوسىلدى. باعدارلاماعا قاتىسۋ ءۇشىن ەرلى-زايىپتىلاردىڭ جانە كامەلەتكە تولعان بالالارىنىڭ 5 جىل قاتارىنان جەكە باسپاناسى بولماۋى نەگىزگى تالاپ بولىپ سانالادى. ۇيگە الەۋمەتتىك كەزەكتە تۇرعاندار ءۇشىن يپوتەكا مولشەرلەمەسى 7%-دى قۇرايدى, وزگە ازاماتتار ءۇشىن – 9%. العاشقى جارنا – 20%. يپوتەكاعا نيەتتى ازاماتتاردىڭ شوتىندا 1 ملن تەڭگە كولەمىندە جيناقتالعان دەپوزيتى بولۋى شارت.