اراب ۇيلەستىرۋ توبى ەلىمىزدەگى جوبالارعا 7 ملرد دوللار قارجى قۇيماق. بۇل تۋرالى استانادا وتكەن يسلام دامۋ بانكى, ساۋد ارابياسىنىڭ دامۋ قورى, وپەك حالىقارالىق دامۋ قورى, كۋۆەيت ەكونوميكالىق دامۋ قورى جانە ابۋ-دابي دامۋ قورى سىندى ينستيتۋتتاردى بىرىكتىرەتىن اراب ۇيلەستىرۋ توبىنىڭ وتىرىسىندا ءمالىم بولدى.
كەزدەسۋدىڭ باستى ماقساتى – ەلىمىزدەگى باسىمدىققا يە ينفراقۇرىلىمدىق جانە الەۋمەتتىك جوبالاردى قارجىلاندىرۋ.
ءىس-شاراعا پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى نۇرلان بايبازاروۆ, يسلام دامۋ بانكى توبىنىڭ پرەزيدەنتى مۇحاممەد سۇلەيمان ءال-دجاسسەر, اراب ينۆەستيتسيالىق قورلارى مەن ەلىمىزدىڭ مەملەكەتتىك ورگاندارى ءارى كۆازيمەملەكەتتىك كومپانيا باسشىلارى قاتىستى.
كەڭەستى قورىتىندىلاي كەلە تاراپتار وپەك قورىمەن جەكە سەكتورداعى وپەراتسيالار تۋرالى نەگىزدەمەلىك مامىلەگە كەلدى. كەلىسىم بويىنشا ەل ەكونوميكاسىنا ۇزاقمەرزىمدى تىكەلەي ينۆەستيتسيا قۇيىلادى. باستاپقى كەزەڭدە ول 7 ملرد دوللاردى قۇراۋى مۇمكىن.
بولاشاقتا قارجىلاندىرۋ كولەمىن ۇلعايتۋ دا جوسپارلاندى. دەلەگاتسيا وكىلدەرى ەلىمىزدىڭ الەۋمەتتىك-ەكونوميكالىق جانە ينفراقۇرىلىمدىق دامۋ جونىندەگى كۇش-جىگەرىنە جوعارى باعا بەردى. نۇرلان بايبازاروۆ كەلگەن قوناقتارعا ەلىمىزدىڭ ينۆەستيتسيالىق مۇمكىندىگىنە قىزىعۋشىلىق تانىتقانى ءۇشىن العىس ءبىلدىردى.